چىن دۇڭعا ”1 - دارەجەلى عارىش ۇلەسكەرى مەدالىن“ بەرۋ، چىن جۇڭرۇيگە، ۋاڭ جيەگە ”قاھارمان عارىشكەر“ داڭق اتاعىن بەرۋ ءارى ”3 - دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى

2025 - جىلى 4 - ايدىڭ 24 - كۇنى شىنجوۋ - 20 عارىشكەرلى الەم كەمەسى ءساتتى ۇشىرىلدى، عارىشكەرلەر چىن دۇڭ، چىن جۇڭرۇي، ۋاڭ جيە الەم كەمەسىنە وتىرىپ تيانحى وزەكتى بولمەسىنە ءساتتى كىردى، وربيتادا 6 ايدان استام ۋاقىت تۇرىپ، ىلگەرىندى - كەيىندى 4 رەت كابينادان شىعۋ قيمىلىن جۇرگىزىپ، 7 رەت جۇك تيەيتىن گاز تيەكتى بولمەگە كىرۋ - شىعۋ مىندەتىن اتقارىپ، 120 نەشە ءتۇرلى كەڭىستىك بەكەتى قۇرىلىسىنىڭ دارەجەسىن جوعارىلاتۋ، قورعاۋ، جوندەۋ مىندەتىن ورىنداپ، ءبىر قىدىرۋ كەڭىستىك عىلمي تاجىريبەلەرى مەن تەحنيكالىق سىناقتار ورىستەتىپ، 2025 - جىلى 11 - ايدىڭ 14 - كۇنى امان - ەسەن ورالدى. شىنجوۋ - 20 ادام الىپ ۇشۋ مىندەتى _ ەلىمىزدىڭ عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن قولدانۋ جانە دامىتۋ كەزەڭىنە وتكەندەگى 5 - رەتكى ادام الىپ ۇشۋ مىندەتى، جۇڭگو عارىشكەرلەرىنىڭ ءبىر رەتكى مىندەتتە وربيتادا تۇرۋ ۋاقىتى ەڭ ۇزاق بولۋ رەكوردىن جاراتتى، بۇل جۇڭگونىڭ عارىش ىستەرىنىڭ جوعارى دەڭگەيلى عىلىم - تەحنيكادا ءوز كۇشىنە سۇيەنىپ ءوزىن الۋەتتەندىرۋدە تىڭ قادام تاستاعاندىعىن كورسەتەدى، ەلىمىزدىڭ جالپىلىق مەملەكەت قۋاتى مەن جۇڭحۋا ۇلتىنىڭ ۇيىسقىشتىعىن جوعارىلاتۋدا، بۇكىل جۇڭحۋا ۇلاندارىنىڭ ۇلتتىق سەنىمى مەن ماقتانىش سەزىمىن ونان ارى كۇشەيتۋدە كەلەلى ماڭىز الادى. اسىرەسە، الەم كەمەسى كەڭىستىكتە كىشكەنە پارشا - پارات زاتقا سوعىلعان بولۋى مۇمكىن دەگەن توسىن جاعدايعا قاراتا، ينجەنەريا ۇجىمى ءومىردى بارىنەن جوعارى قويۋ، حاۋىپسىزدىكتى ءبىرىنشى ورىنعا قويۋ پرينسيبىن ۇستانىپ، تەز ارادا قاعىلەزدىكپەن ءۇن قوسىپ، قاتاڭ تالداۋ جاساپ، باعالاۋ جۇرگىزىپ، 3 عارىشكەر سابىرلىلىقپەن توتەپ بەرىپ، كەڭىستىكتە الەم كەمەسىنە اۋىسىپ ءتۇسىپ، ۇشۋ گرۋپپاسىنداعىلار ءبىر نيەت، ءبىر تىلەكتە بولىپ، جەر مەن كوكتى ءبىر تۇلعالاندىرىپ، شۇعىل جاعدايعا توتەپ بەرۋ جوباسى بويىنشا ءساتتى قونىپ، بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ ەرلىكپەن العا ۇمتىلۋ، ەرلىكپەن العا باسۋ رۋحىن بارىنشا سەرپىلتتى.

شىنجوۋ - 20 نىڭ ادام الىپ ۇشۋ مىندەتىنىڭ تولىق تابىستى بولۋىنا قالىڭ عىلىم - تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى - قىزمەتكەرلەردىڭ، ازاتتىق ارميا كوماندير - جاۋىنگەرلەرىنىڭ اقىل - پاراساتى مەن جۇرەك قانى سىڭگەن. چىن دۇڭ، چىن جۇڭرۇي، ۋاڭ جيە جولداستار _ سولاردىڭ كورنەكتى ۋاكىلى، ولار مىزعىماس نيەتپەن پارتياعا ىلەسىپ، وتان ءۇمىتىن اقتاۋدى مۇرات ەتىپ، حاۋىپ - قاتەردەن تايسالماي، ىنتىماقتاسا سەلبەسىپ، دۇنيە جۇزىنە قۇدىرەتتى جۇڭگو جىگەرىن، جۇڭگو جالىنىن جانە جۇڭگو سەنىمىن ايگىلەدى. چىن دۇڭ جولداس عارىشقا ادام الىپ ۇشۋ مىندەتىن 3 رەت اتقارىپ، كابينادان شىعۋ قيمىلىن جيىنى 6 رەت ورىنداپ، وربيتادا 400 كۇننەن استام ۋاقىت تۇرعان تۇڭعىش جۇڭگو عارىشكەرىنە اينالدى. چىن جۇڭرۇي جولداس قايسارلىق تانىتىپ، اۋىر مىندەتتى باتىلدىقپەن ارقالاپ، دەن قويا جۇمىس جۇرگىزىپ، تۇڭعىش رەت عارىشقا ۇشقاندا 3 رەت كابينادان شىعۋ قيمىلىن ورنىقتى ورىندادى. ۋاڭ جيە جولداس تىڭعىلىقتى جاتتىعىپ، جاپالى شىڭدالىپ، داڭقپەن شىنجوۋ - 20 ۇشۋ گرۋپپاسىنا تاڭدالىپ، مىندەتتى ايتارلىقتاي ورىندادى. ولاردىڭ ەلىمىزدىڭ عارىشقا ادام الىپ ۇشۋ ىستەرىنە قوسقان ەرەن ەڭبەكتەرىن ماراپاتتاۋ ءۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى چىن دۇڭ جولداسقا ”1 - دارەجەلى عارىش ۇلەسكەرى مەدالىن“ بەرۋدى، چىن جۇڭرۇي، ۋاڭ جيە جولداستارعا ”قاھارمان عارىشكەر“ داڭق اتاعىن بەرۋدى ءارى ”3 - دارەجەلى عارىش ۇلەسكەرى مەدالىن“ بەرۋدى ۇيعاردى.

چىن دۇڭ، چىن جۇڭرۇي، ۋاڭ جيە جولداستار _ اۋەلگى ماقساتتى ۇمىتپاي، بورىشتى ەستە بەرىك ساقتاپ، ارداقتى ىسكە وزدەرىن ارناعان ءداۋىر اۆانگاردتارى، الەمدى زەرتتەۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ونەگەلى ۇلگىلەرى. پارتيا ورتالىق كوميتەتى مىناعان ۇندەدى: بۇكىل پارتيا، بۇكىل ارميا، بۇكىل ەلدەگى ءار ۇلت حالقى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتىنىڭ ءار رەتكى جالپى ءماجىلىسىنىڭ رۋحىن جاپپاي دايەكتىلەندىرىپ، ءتورتىنشى جالپى ءماجىلىستىڭ ورنالاستىرۋىن مۇقيات تياناقتاندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكى بومبى، ءبىر جاساندى سەرىك“ رۋحى مەن عارىشقا ادام الىپ ۇشۋ رۋحىن بار كۇشپەن اسقاقتاتىپ، ماراپاتتالعان عارىشكەرلەردى ونەگە ەتىپ، تاباندىلىقتى ساقتاپ، سەنىمدى كۇشەيتىپ، قايراتتانا العا ۇمتىلىپ، قاجىرلىلىقپەن ىستەپ، سوتسياليستىك وسىزامانداندىرۋدى نەگىزىنەن جۇزەگە اسىرۋ جولىندا بىرگە كۇرەس جۇرگىزىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدىڭ جاڭا جاعدايىن ۇزدىكسىز اشايىق.

(شينحۋا اگەنتتىگى، 1 - ايدىڭ 21 - كۇنى، بەيجيڭ)

كەلۋ قاينارى: حالىق تورابى