شي جينپيڭ انگليانىڭ باس ءۋازىرى ستامەرمەن كەزدەستى

1 - ايدىڭ 29 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن انگليانىڭ باس ءۋازىرى ستامەرمەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگى، 1 - ايدىڭ 29 - كۇنى، بەيجيڭ (ءتىلشى شاۋ ي - بو). 1 - ايدىڭ 29 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن انگليانىڭ باس ءۋازىرى ستامەرمەن كەزدەستى. ەكى جاق جۇڭگو مەن انگليانىڭ ۇزاق ۋاقىت ورنىقتى جالپى بەتتىك ستراتەگيالىق سەرىكتەستىك قارىم - قاتىناسىن دامىتۋىنا ماقۇل بولدى.

شي جينپيڭ مىنالاردى اتاپ كورسەتتى: قازىر حالىقارالىق جاعدايدا بىلىقپالىق تۋىلۋدا، جۇڭگو مەن انگليا بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دۇنيە جۇزىندەگى نەگىزگى ەكونوميكالىق تۇلعا رەتىندە، مەيلى دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋىندا بولسىن، الدە ەكى ەلدىڭ ەكونوميكاسى مەن حالىق تۇرمىسىن جەبەۋىندە بولسىن، پىكىرلەسۋ مەن سەلبەستىكتى كۇشەيتۋىن قاجەت ەتەدى. جۇڭگو جاق انگليا جاقپەن ۇلكەن تاريح كوزقاراسىن ۇستانىپ، الاۋىزدىقتى قايىرىپ قويىپ، ءوزارا قۇرمەت ەتىپ، جۇڭگو - انگليا سەلبەستىگىنىڭ ”كەلەشەگى زور بولۋ“ كومەسكى كۇشىن ”كەلەشەگى زور بولۋ“ ناقتى ناتيجەسىنە اينالدىرىپ، جۇڭگو - انگليا قارىم - قاتىناسى مەن سەلبەستىگىنە جاڭا جاعداي اشىپ، ەكى ەل حالقىنا باقىت جاراتۋمەن بىرگە، دۇنيە جۇزىنە دە تيىمدىلىك جاساۋدى قالايدى.

شي جينپيڭ مىنالاردى باسا دارىپتەدى: ءوزارا سەنىمدىلىك − مەملەكەت پەن مەملەكەت قارىم - قاتىناسىنىڭ نىق قاداممەن الىسقا جەتۋىنىڭ نەگىزى. جۇڭگو بەيبىت دامۋ جولىمەن جۇرۋگە باستان - اياق تاباندى بولىپ كەلەدى، ەجەلدەن ىرىقتىلىقپەن سوعىس قوزعاپ كورگەن ەمەس، باسقا ەلدىڭ سۇيەمدەي جەرىن باسىپ العان ەمەس، جۇڭگو مەيلى قالاي دامىسا دا، زورايسا دا، باسقا ەلدەرگە حاۋىپ توندىرمەيدى. جۇڭگونىڭ مادەنيەت ءداستۇرى ”تاتۋلىقتى قىمباتقا بالاۋ“، ”تاتۋ - ءتاتتى بولۋ، ءبىراق تالعاۋسىز قوستاي جونەلمەۋ“. جۇڭگو مەن انگليانىڭ ەكونوميكا - ساۋدا سەلبەستىگىنىڭ ءمانى _ ءوزارا پايدا جەتكىزىپ، تەڭ يگىلىككە كەنەلۋ. بيىل _ جۇڭگونىڭ ”15 - بەسجىلدىق“ جوباسىنىڭ باستالعان جىلى، ەكى جاق وقۋ - اعارتۋ، ەمدەۋ، فينانس، قىزمەت وتەۋ سالالارىندا ءوزارا پايدا جەتكىزۋ سەلبەستىگىن كەڭەيتىپ، جاساندى زەردە، بيولوگيا عىلىمى، جاڭا ەنەرگيا جانە تومەن كومىرتەكتى تەحنيكا سياقتى سالالاردا بىرلەسىپ زەرتتەۋ جانە كاسىپ سالالارىندا بۇرىلىس جاساۋدى ورىستەتىپ، بىرگە دامۋدى، گۇلدەنۋدى جۇزەگە اسىرۋى كەرەك. انگليا جاقتىڭ جۇڭگو كاسىپورىندارىنا ءادىل، ادىلەتتى، كەمسىتپەيتىن تيجارات - ساۋدا ورتاسىن ازىرلەۋىن ءۇمىت ەتەمىن. جۇڭگو مەن انگليا ەكەۋى دە مادەنيەتتەگى ءىرى ەلدەر، ەكەۋى دە ادامزاتتىڭ دامۋى مەن العا باسۋىنا ماڭىزدى ۇلەس قوستى. ەكى جاق گۋمانيتارلىق اۋىس - كۇيىستى جيىلەتىپ، ادامداردىڭ بارىس - كەلىسىنە اناعۇرلىم قولايلىلىق جاساۋى كەرەك. انگليا ۇكىمەتىنىڭ، پارلامەنتىنىڭ، جەرگىلىكتى ءار سالاسىنىڭ جۇڭگوعا كوبىرەك كەلىپ ساپاردا بولىپ، جۇڭگو جونىندەگى جان - جاقتى، وبيەكتيۆ، دۇرىس تانىمدى ارتتىرۋىن قارسى الامىز. جۇڭگو جاق انگلياعا قاراتا جالاڭ جاقتى ۆيزاسىز بارىپ - كەلۋ شاراسىن اتقارۋدى بەلسەنە ويلاستىرۋدى قالايدى.

شي جينپيڭ مىنالاردى اتاپ كورسەتتى: ءبىر مەزگىلدەن بەرى سىڭار جاقتىلىق، قورعانىمپازدىق، وكتەمدىك ساياسي ءورشي ءتۇسىپ، حالىقارالىق ءتارتىپ اۋىر سوققىعا ۇشىرادى. حالىقارالىق زاڭ ءار ەل بويسۇنعاندا عانا شىنايى ءونىمدى بولادى، ءىرى ەلدەر ءتىپتى دە باستاماشى بولۋى كەرەك، ويتپەگەندە تاعىلىققا قايتا ورالادى. جۇڭگو مەن انگليا كوپ جاقتىلىق پەن ەركىن ساۋدانى قولداپ، ناعىز كوپ جاقتىلىقتى بىرگە دارىپتەپ جانە امالياتتا ايگىلەپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتىپ، تەڭ، ءتارتىپتى كوپ ۇيەكتەنۋ مەن جالپىعا ءتيىمدى، سيىسىمدى جاھاندانۋدى جۇزەگە اسىرۋى كەرەك.

ستامەر پاتشا چارليز Ⅲ تىڭ ءتوراعا شي جينپيڭگە جولداعان سالەمىن جەتكىزدى. ستامەر مىنالاردى *بىلدىردى: 8 جىلدان بەرى جۇڭگوعا تۇڭعىش رەت ساپارلاي كەلگەن انگليانىڭ باس ءۋازىرى بولعانىما توتەنشە قۋانىشتامىن. وسى رەت انگليانىڭ ماڭىزدى ونەركاسىپ - ساۋدا، مادەنيەت سالاسىنىڭ 60 نەشە ۋاكىلىن باستاپ جۇڭگوعا ساپارلاي كەلۋىم انگليا - جۇڭگو سەلبەستىگىنىڭ كەڭدىگى مەن انگليانىڭ جۇڭگومەن سەلبەستىكتى تەرەڭدەتۋگە، كەڭەيتۋگە كۇش سالۋ بەكىمىن تولىق ايگىلەدى. انگليا مەن جۇڭگو _ دۇنيە جۇزىندەگى ماڭىزدى ەكونوميكالىق تۇلعا جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدەرى، قازىرگى اۋمالى - توكپەلى، ءالسىز حالىقارالىق جاعدايدا انگليا جاقتىڭ ءوزارا قۇرمەت ەتۋ، ءوزارا سەنىم ارتۋ رۋحى بويىنشا جۇڭگومەن ۇزاق ۋاقىت ورنىقتى جالپى بەتتىك ستراتەگيالىق سەرىكتەستىك قارىم - قاتىناس ورناتۋى توتەنشە ماڭىزدى. انگليا جاقتىڭ تايۋان ماسەلەسىندە ۇزاق ۋاقىت اتقارعان ساياساتى وزگەرگەن جوق، وزگەرمەيدى. انگليا جاق جۇڭگو جاقپەن جوعارى جىكتەگىلەردىڭ بارىس - كەلىسىن ساقتاپ، پىكىرلەسۋدى، اۋىس - كۇيىستى جيىلەتىپ، ساۋدا، قارجى قوسۋ، فينانس، قورشاعان ورتانى قورعاۋ سياقتى سالالارداعى سەلبەستىكتى كۇشەيتىپ، ءبىر - ءبىرىنىڭ ەكونوميكاسىنىڭ ارتۋىنا دەم بەرىپ، ەكى ەل حالقىنا ىرىس - قۇت اكەلۋدى قالايدى. حالىقتاردىڭ بارىس - كەلىسى جيىلەگەن سايىن، تۇسىنىستىكتى كۇشەيتۋگە ءتيىمدى بولادى، انگليا جاق جۇڭگو جاقپەن بىرگە ەكى ەلدىڭ زاڭ شىعارۋ قۇرىلىمى سياقتى ءار سالانىڭ بارىس - كەلىسىن كۇشەيتۋدى قالايدى. شياڭگاڭنىڭ گۇلدەنۋى مەن ورنىقتىلىعى ەكى ەلدىڭ ورتاق مۇددەسىنە ۇيلەسەدى، انگليا جاق شياڭگاڭنىڭ انگليا مەن جۇڭگو اراسىنداعى ەرەكشە ماڭىزدى كوپىرگە اينالعانىن قۋانا كورىپ وتىر. جۇڭگو حالىقارالىق ىستەردە شەشۋشى رول اتقارۋدا، انگليا جاق جۇڭگو جاقپەن كليمات وزگەرىسى سياقتى دۇنيە جۇزىلىك سىن - سايىسقا توتەپ بەرۋ جونىندە سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاۋدى قالايدى.

ۋاڭ ي كەزدەسۋدە بىرگە بولدى.