سالماعى 36 جىڭ كەلەتىن ءتىرى قويدى قاقتاعان سوڭ، تەك 6.9 جىڭ عانا شىققان؟ جەرگىلىكتى ورىن حابارلاندىرۋ شىعاردى 

2 – ايدىڭ 24 – كۇنى، چۇڭچيڭ قالاسى نان - ان رايوندىق بازاردى باقىلاۋ – باسقارۋ مەكەمەسى جاعداي تۋرالى حابارلاندىرۋ شىعاردى.

حابارلاندىرۋدا بىلاي دەلىنگەن: جۋىردا ينتەرنەتتە ”كەڭ جايلاۋ قاقتاعان قوي ەتى دۇكەنىندە تاماقتانعان كەزدە، سالماعى 36 جىڭ كەلەتىن ءتىرى قويدى قاقتاعان سوڭ سالماعى 6.9 جىڭ عانا بولىپ قالدى“ دەگەن مالىمەت تارالىپ، جۇرت نازارىن اۋدارعان. چۇڭچيڭ قالاسى نان - ان رايوندىق بازاردى باقىلاۋ – باسقارۋ مەكەمەسى بۇل ىسكە ايرىقشا ءمان بەرىپ، تەكسەرۋ گرۋپپاسىن قۇرىپ، تۇتىنۋشىلارمەن بايلانىس جاساۋ، دۇكەن جاۋاپتىسى مەن قىزمەتكەرلەرىنەن جاعداي ۇعىسۋ، دۇكەننىڭ زات كىرگىزۋ ەستەلىگى مەن ساۋدا ەستەلىگىن الدىرۋ، ناقتى جاعدايعا قاتىستى بەينەجازبانى كورۋ، ولشەۋ اسپاپتارىن زاڭدى باعالاۋ قۇرىلىمدارىنا اماناتتاپ تەكسەرتۋ قاتارلى جولدار ارقىلى تەكسەرۋ جۇرگىزگەن. قازىر قاتىستى جاعداي تۋرالى مىناداي حابارلاندىرۋ شىعارعان:

تۇتىنۋشى مەيتۋان تەكشەسى ارقىلى ”كەڭ جايلاۋ قاقتالعان قوي ەتى دۇكەنى نانبين جولى جۇڭلوۋ بولىمشە دۇكەنىنەن“ (جەكە ونەركاسىپ – ساۋدا دۇكەنى، تيجارات كۋالىگىنە ”نان - ان رايوندىق يەتاي اس - سۋ دۇكەنى“ دەپ جازىلعان) قاقتالعان قوي ەتى ءونىمىن ساتىپ العان، 2026 – جىلى 2 – ايدىڭ 16 – كۇنى ساعات 11:01 دە دۇكەنگە بارىپ قويدى تاڭداپ، قويدىڭ سالماعىن ولشەۋ (قويدىڭ سالماعى 36 جىڭ شىققان) جانە قويدى سويۋ بارىسىن سول جەردە باقىلاعان، قويدىڭ سانىنا، قۇيرىعىنا جەكە – جەكە بەلگى قويعان. سول كۇنى ساعات 19:00 اينالاسىندا، تۇتىنۋشى دۇكەنگە بارىپ، وسىنىڭ الدىندا قويعان بەلگىلەردى تۇراقتاندىرعان، ءبىراق، قاقتالعاننان كەيىنگى قويدىڭ سالماعى تۋرالى كۇمان ءبىلدىرىپ، تۇرقى ”كىشىرەيىپ كەتكەن“ دەپ قاراعان، سول جەردە تارازىعا تارتقان كەزدە، قويدىڭ ناقتى سالماعى 6.9 جىڭ (قويدىڭ باسى، قانى، سيراعى، تەرىسى، ىشكى مۇشەلەرى قاتارلىلار قامتىلماعان) بولىپ شىققان. تەكسەرۋگە قاراعاندا، بۇل دۇكەن قويدى ساتىپ الۋدان سويۋعا دەيىنگى ارالىقتا قويدى جۇگەرىمەن، سۇرلەنگەن شوپپەن قالىپسىز تۇردە ۇزدىكسىز جەمدەگەن ءارى سۋ بەرۋ ارقىلى قويدىڭ سالماعىن جالعاننان ارتتىرۋ ماقساتىنا جەتكەن.

بۇل دۇكەن ”جۇڭحۋا حالىق رەسپۋبليكاسىنىڭ تۇتىنۋشىلاردىڭ ۇقىق – مۇددەسىن قورعاۋ زاڭىنداعى“ قاتىستى بەلگىلەمەلەرگە قايشىلىق جاساۋ كۇمانىنا شاتىلعان، چۇڭچيڭ قالاسى نان - ان رايوندىق بازاردى باقىلاۋ – باسقارۋ مەكەمەسى ونى زاڭعا قايشى ارەكەتتەرىن توقتاتۋعا، ”بىرەۋىن قايتارسا، ءۇش ەسەسىن تولەۋ“ بەلگىلەمەسى بويىنشا تۇتىنۋشىعا قاراجاتتى تولەۋگە بۇيىرعان ءارى الداعى تەكسەرۋ جاعدايىنا قاراي وتىرىپ، زاڭ – تۇزىمگە ساي قاتاڭ ءبىرجاقتى ەتىپ، سەنىمدى تيجارات جۇرگىزەتىن بازار ءتارتىبىن باتىل قورعاپ، تۇتىنۋشىلاردىڭ زاڭدى ۇقىق – مۇددەسىن شىنايى قورعايدى.

كەلۋ قاينارى: حالىق تورابى