وقۋ – اعارتۋ مينيسترلىگى: دەنە تاربيە ساباعىنىڭ ۋاقىتىن يەلەپ الۋ، ساباق ارالىعىنداعى دەمالىستا وقۋشىلاردى ساباقحانادان شىعارماۋ سياقتى ارەكەتتەردى قاتاڭ تەكسەرەدى 

شينحۋا اگەنتتىگىنىڭ ءتىلشىسى ۋاڭ پىڭ 2 – ايدىڭ 25 – كۇنى بەيجيڭنەن حابارلايدى. ءتىلشىنىڭ 2 – ايدىڭ 25 – كۇنى وقۋ – اعارتۋ مينيسترلىگىنەن ۇعىسۋىنشا، 2026 – جىلى وقۋ – اعارتۋ مينيسترلىگى وقۋشىلاردىڭ دەنە قۋاتىن كۇشەيتۋ جوسپارىن ىشكەرىلەي اتقارىپ، وقۋشىلاردىڭ دەنە قۋاتى مەن دەنساۋلىق ورەسىن جوعارىلاتۋعا كۇش سالىپ، ”ساباق كەستەسى بويىنشا اتقارماۋدان“ قاتاڭ ساقتانىپ، دەنە تاربيە ساباعىنىڭ ۋاقىتىن يەلەپ الۋ، ساباق ارالىعىنداعى دەمالىستا وقۋشىلاردى ساباقحانادان شىعارماۋ قاتارلى ارەكەتتەردى قاتاڭ تەكسەرەدى.

سول كۇنى وقۋ – اعارتۋ مينيسترلىگى بەيجيڭدە ”سالاماتتىقتى ءبىرىنشى ورىنعا قويۋ“ قىزمەتىن ىشكەرىلەي تياناقتاندىرۋ جونىندە ورنالاستىرۋ جاساۋ ءماجىلىسىن اشتى. ماجىلىستە وقۋ – اعارتۋ مينيسترلىگىنىڭ جاۋاپتىسى بىلاي دەپ تانىستىردى: جۋىرداعى جىلداردان بەرى، وقۋ – اعارتۋ مينيسترلىگى وقۋشىلاردىڭ دەنساۋلىعىن توڭىرەكتەي وتىرىپ، دەنە تاربيەلىك جاتتىقتىرۋ، ەستەتيكامەن نارلەندىرۋ، پسيحيكالىق اقاۋسىزدىق، كورۋ قۋاتىنىڭ السىرەۋىنەن ساقتانۋ، مەكتەپتەگى ازىق – تۇلىك حاۋىپسىزدىگى قاتارلى ماڭىزدى سالالارعا نازار اۋدارۋعا ۇزدىكسىز كۇش سالىپ، وقۋشىلاردىڭ جان – جاقتى جەتىلۋىن كۇش سالا جەبەگەن.

قاتىستى ساناق مالىمەتىنە قاراعاندا، قازىر مىندەتتى وقۋ – اعارتۋ كەزەڭىندەگى دەنە تاربيە، ەستەتيكالىق تاربيە وقىتۋشىلارىنىڭ جالپى سانى 2012 – جىلداعىمەن سالىستىرعاندا نەداۋىر زور مولشەردە ارتقان؛ 2024 – جىلعى ۇلگى الىپ تەكسەرۋ ناتيجەسىنە قاراعاندا، جوعارى، ورتا، باستاۋىش مەكتەپتەردەگى وقۋشىلاردىڭ دەنە قۋاتى مەن دەنساۋلىق ورەسىنىڭ جالپى جاقتان ساپالى بولۋ دەڭگەيى 2016 – جىلداعىمەن سالىستىرعاندا 9.3 پايىز ارتقان. مۇنان سىرت، ەلىمىز بويىنشا وقۋشىلاردىڭ كورۋ قۋاتىنىڭ السىرەۋ مولشەرى جالپى جاقتان ءتورت جىل بويى تومەندەگەن.

ۇعىسۋعا قاراعاندا، 2026 – جىلى وقۋ – اعارتۋ مينيسترلىگى جەر – جەردەگى تاراۋلاردى بالالار باقشاسى مەن باستاۋىش مەكتەپ سىندى ماڭىزدى كەزەڭدى مىقتى ۇستاپ، بالالاردىڭ دالادا ارەكەتتەنۋ ۋاقىتىن تولىق قامتاماسىزداندىرىپ، ەلەكتروندىق بۇيىمداردى قولدانۋىن تەجەپ، ساباقحانانى جارىقتاندىرۋدى جاقسارتىپ، وقۋشىلاردىڭ كوزدى قورعاۋ جاعىنداعى اۋىرتپالىعىن شىنايى دا ءونىمدى تۇردە جەڭىلدەتۋىنە جەتەكشىلىك ەتەدى.

كەلۋ قاينارى: حالىق تورابى