شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى

4 - ايدىڭ 15 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان سۋ لين جانە حانىمى ۋ فاڭشيڭمەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

4 - ايدىڭ 15 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا سۋ ليندى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

شينحۋا اگەنتتىگى، 4 - ايدىڭ 15 - كۇنى، بەيجيڭ (تىلشىلەر فىڭ شينران، دۇڭ شۋە). 4 - ايدىڭ 15 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى سۋ لينمەن كەڭەس وتكىزدى.

شي جينپيڭ سۋ ليننىڭ ۆيەتنامنىڭ مەملەكەت ءتوراعاسى بولىپ سايلانعاندىعىن تاعى ءبىر رەت قۇتتىقتادى. شي جينپيڭ بىلاي دەپ اتاپ كورسەتتى: ءسىز ۆيەتنامنىڭ مەملەكەت ءتوراعاسى بولىپ سايلانعاننان كەيىن ەڭ الدىمەن جۇڭگوعا ساپارلاي كەلدىڭىز، بۇل ءسىزدىڭ جۇڭگو - ۆيەتنام قارىم - قاتىناسىنا ايرىقشا ءمان بەرەتىندىگىڭىزدى ايگىلەيدى. سۋ لين جولداس باس بولعان ۆيەتنام كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، ۆيەتنامنىڭ، ءسوز جوق، سوتسياليزم جولىمەن بۇلجىماي ءجۇرىپ، پارتيا قۇرۋدىڭ، مەملەكەت قۇرۋدىڭ ”قوس 100 جىلدىعى“ كۇرەس نىساناسىنا قاراي ۇدەرە العا تارتاتىندىعىنا سەنەمىن. حالىقارالىق جاعداي قالاي وزگەرسە دە، جۇڭگو جاق باستان - اياق ۆيەتنامدى توڭىرەكتىك ديپلوماتيادا الدىمەن ەسكەرەتىن بەتالىس ەتىپ، ۆيەتنام جاقپەن اۋەلگى ماقساتتى ۇستانىپ، دوستىقتى جالعاستىرىپ، ىنتىماقتاسا سەلبەسىپ، ءوزارا قولداۋ كورسەتىپ، ۇزدىكسىز ”التى اناعۇرلىم“ جالپى تۇلعالىق نىساناسى بويىنشا جان - جاقتى ستراتەگيالىق سەلبەستىكتى جوعارى ساپامەن ىلگەرىلەتىپ، اناعۇرلىم جوعارى دەڭگەيدەگى ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن جەدەل قۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە اناعۇرلىم زور ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: پارتيانىڭ باسشىلىعى − سوتسياليزمنىڭ ەڭ ماندىك ەرەكشەلىگى جانە ەڭ ۇلكەن ابزالدىعى.

سوتسياليستىك ءتۇزىم مەن كوممۋنيستىك پارتيانىڭ بيلىك جۇرگىزۋ ورنىن قورعاۋ _ جۇڭگو مەن ۆيەتنام پارتيالارىنىڭ ەڭ ۇلكەن ورتاق ستراتەگيالىق مۇددەسى. ەكى جاق وسكەلەڭ ستراتەگيالىق سەرگەكتىكتى جانە قۋاتتى ستراتەگيالىق ۇستامدىلىقتى ساقتاپ، جول سەنىمى مەن ءتۇزىم سەنىمىن باستان - اياق بەكەمدەپ، رەفورمانىڭ بەتالىسىنان جازباۋعا، وزگەرىستى تۇرلەندىرمەۋگە تاباندى بولۋى كەرەك.

ەكى جاق پارتيالار ارا ارنانىڭ ەرەكشە رولىن تولىق ساۋلەلەندىرىپ، جوعارى جىكتەگىلەردىڭ بارىس - كەلىسىن جيىلەتىپ، ساياسي سەنىمدىلىكتى بەكەمدەۋى كەرەك. جوعارى جىكتەگىلەردىڭ كەڭەسى، نازاريالىق زەرتتەۋ - تالقىلاۋ، كادرلاردى باۋلۋ، سالالار بويىنشا اۋىس - كۇيىس جاساۋ، جەرگىلىكتى ورىندار سەلبەستىگى سياقتى مەحانيزمدەردەن ويداعىداي پايدالانىپ، جاڭا كەزەكتى جۇڭگو كوممۋنيستىك پارتياسى مەن ۆيەتنام كوممۋنيستىك پارتياسىنىڭ سەلبەستىك جوسپارىن ويداعىداي اتقارىپ، پارتيانى، مەملەكەتتى جونگە سالۋ نازارياسى مەن تاجىريبەلەرىن اۋىستىرۋدى، ءوزارا ۇلگى الۋدى ىشكەرىلەي ورىستەتۋ كەرەك. ساياسي حاۋىپسىزدىكتى قورعاۋدى ماڭداي الدى ورىنعا قويىپ، ديپلوماتيا، مەملەكەت قورعانىسى، قوعام حاۋىپسىزدىگى سياقتى ”3+3“ ستراتەگيالىق كەڭەس مەحانيزمىنەن ويداعىداي پايدالانىپ، ەكى ەلدىڭ جاستارىنا مۇرات - سەنىم تاربيەسىن ۇزدىكسىز كۇشەيتۋ كەرەك.

ەكى جاق ءبىر جاعادان باس، ءبىر جەڭنەن قول شىعارىپ، وسىزاماندانۋ جولىمەن قول ۇستاسا ىلگەرىلەۋى كەرەك. دامۋ ستراتەگياسىن ۇشتاستىرۋدى جەدەلدەتىپ، نەگىزدىك قۇرىلعىلاردى ۇلاستىرۋدى، تۇتاستىرۋدى الدىمەن ىلگەرىلەتۋ كەرەك. جاساندى زەردە، جارتىلاي وتكىزگىش، زات ينتەرنەتى سياقتى جاڭادان گۇلدەنگەن سالالارداعى سەلبەستىكتى كۇشەيتۋ كەرەك.

جۇڭگو جاق ۆيەتنامنىڭ اناعۇرلىم كوپ ساپالى ونىمدەرىنىڭ جۇڭگو بازارىنا كىرۋىن قارسى الادى. ەكى جاق ساياحات، مادەنيەت، اقپارات قۇرالدارى، وقۋ - اعارتۋ، دەنساۋلىق ساقتاۋ، دەنە تاربيە سياقتى جاقتارداعى دوستىق بارىس - كەلىستى، سەلبەستىكتى ۇزدىكسىز كۇشەيتىپ، ەكى ەل حالقىنىڭ ءوزارا ءتۇسىنىسۋىن، جاقىنداسۋىن جەبەۋى كەرەك. مەن سىزبەن بىرگە 2026 - جىلدان 2027 - جىلعا دەيىنگى ”جۇڭگو - ۆيەتنام ساياحات سەلبەستىك جىلىن“ باستاۋدى قالايمىن.

ەكى جاق بەيبىتشىلىك، دامۋ، سەلبەستىك، تەڭ يگىلىككە كەنەلۋ تۋىن بيىك ۇستاپ، سىڭار جاقتىلىققا، قورعانىمپازدىققا بىرگە قارسى تۇرىپ، دۇنيە جۇزىلىك ەركىن ساۋدا ءتۇزىلىسىنىڭ جانە كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاۋى كەرەك. دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن، دۇنيە جۇزىلىك جونگە سالۋ باستاماسىن قول ۇستاسا امالياتتا ايگىلەپ، دۇنيە جۇزىلىك سايىستارعا بىرگە توتەپ بەرۋ كەرەك.

بيىل _ جۇڭگو مەن شىعىس وڭتۇستىك ازيا ەلدەرى وداعىنىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 5 جىلدىعى، جۇڭگو جاق وسى وڭىردەگى ەلدەرمەن سايكەسۋدى جانە سەلبەسۋدى كۇشەيتىپ، جۇڭگو مەن شىعىس وڭتۇستىك ازيا ەلدەرى وداعىنىڭ اناعۇرلىم تىعىز تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

سۋ لين مىنالاردى ءبىلدىردى: بۇل _ مەنىڭ ۆيەتنامنىڭ مەملەكەت ءتوراعاسى بولىپ سايلانعاننان كەيىنگى تۇڭعىش ساپارىم، سونداي - اق باس شۋجي، مەملەكەت ءتوراعاسى شي جينپيڭنىڭ بىلتىر ۆيەتنامدا تاريحي ساپاردا بولعاندىعىنىڭ ءبىر جىلدىعىنا تۇسپا - تۇس كەلىپ وتىر، بۇل باس شۋجي جولداس ايتقان ”كورشىلەر بارعان سايىن ەتەنە بولا ءتۇستى“ دەگەندى تولىق بەينەلەدى. ۆيەتنام جاق جۇڭگو كوممۋنيستىك پارتياسىنىڭ، ۇكىمەتىنىڭ جانە حالقىنىڭ ۆيەتنام كوممۋنيستىك پارتياسىنىڭ 14 - قۇرىلتايىنا كورسەتكەن ماڭىزدى ساياسي قولداۋىنا العىس ايتادى، باستان - اياق جۇڭگو جاقپەن ءداستۇرلى دوستىقتى جالعاستىرىپ، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىن جانە ستراتەگيالىق مانگە يە تاعدىرلاس ورتاق تۇلعاسىن ۇزدىكسىز دامىتۋدى ىلگەرىلەتۋدى قالايدى.

ۆيەتنام جاق جۇڭگونىڭ ”14 - بەسجىلدىق“ جوبانى جەڭىسپەن ورىنداعاندىعىن ءارى تاريحي تابىستارعا قول جەتكىزگەندىگىن قۇتتىقتايدى، جۇڭگو جاقتىڭ ”15 - بەسجىلدىق“ جوبانى ءساتتى اتقارىپ، جوعارى ساپالى دامۋدى جانە سوتسياليستىك وسىزامانداندىرۋ قۇرىلىسىن ۇزدىكسىز ىلگەرىلەتىپ، ەكىنشى 100 جىلدىق كۇرەس نىساناسىن ۋاعىندا جۇزەگە اسىراتىندىعىنا، سونداي - اق دۇنيە ءجۇزىنىڭ بەيبىتشىلىگى مەن دامۋىنىڭ تىرەكتى كۇشىنە جانە باستى قوزعاۋشى كۇشىنە اينالاتىندىعىنا سەنەدى.

قازىر ۆيەتنام مەن جۇڭگونىڭ قارىم - قاتىناسى بەلسەندى دامۋ بەتالىسىن ساقتاپ، ستراتەگيالىق قارىم - قاتىناسى جيىلەپ، مەملەكەت قورعانىسى حاۋىپسىزدىگى سالاسى تىلدەسۋدەن ناقتى سەلبەستىك كەزەڭىنە ءوتتى، ەكونوميكا - ساۋدا، قارجى قوسۋ جانە نەگىزدىك قۇرىلعى سەلبەستىگى ىشكەرىلەي ورىستەتىلىپ، حالىقتىق اۋىس - كۇيىس توتەنشە جيىلەپ، كوپ جاقتى قارىم - قاتىناس اناعۇرلىم جيىلەدى. ۆيەتنام جاق باس شۋجي شي جينپيڭ جولداستىڭ ۆيەتنام - جۇڭگو قارىم - قاتىناسىنا دەگەن ەرەكشە سۇيىسپەنشىلىگىن جانە دايەكتى قولداۋىن قاستەرلەيدى، جۇڭگومەن قارىم - قاتىناستى دامىتۋدى ۆيەتنامنىڭ وبيەكتيۆ قاجەتى، ستراتەگيالىق تالعامى جانە ماڭداي الدى باسىمدىعى ەتۋدەن جازباي، ءبىر جۇڭگو ساياساتىن ۇزدىكسىز قولدايدى، جۇڭگو جاقپەن ستراتەگيالىق تىلدەسۋدى جانە جوعارى دەڭگەيلى ستراتەگيالىق ىستەستىكتى كۇشەيتىپ، ەكونوميكا - ساۋدا، قارجى قوسۋ، تەمىر جول سياقتى نەگىزدىك قۇرىلعىلار مەن ساياحات سەلبەستىگىنىڭ دەڭگەيىن جوعارىلاتىپ، وقۋ - اعارتۋ، كۋرستان وتكىزۋ، عىلىم - تەحنيكا، گۋمانيتارلىق جانە جەرگىلىكتى ورىندار سەلبەستىگىن كۇشەيتىپ، قۇرلىق شەكاراسىن اناعۇرلىم ويداعىداي باسقارۋدى جانە تەڭىزدەگى بەيبىتشىلىكتى قورعاۋدى قالايدى. ۆيەتنام جاق باس شۋجي شي جينپيڭ جولداس العا قويعان دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن جانە دۇنيە جۇزىلىك جونگە سالۋ باستاماسىن قولدايدى، جۇڭگو جاقپەن بىرگە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

كەڭەستەن كەيىن ەكى جاق پارتيالار ارا، قوعام حاۋىپسىزدىگى، ءادىليا، ەكونوميكا، ءوندىرىس - قامداۋ تىزبەگى سەلبەستىگى، كەدەن سەلبەستىگى، عىلىم - تەحنيكا، حالىق تۇرمىسى، ادام كۇشى بايلىعىن اشۋ، اقپارات قۇرالدارى جانە جەرگىلىكتى ورىندار سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

كەڭەستىڭ الدىندا شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا سۋ لين مەن حانىمى ۋ فاڭلياندى قارسى الۋ سالتىن وتكىزدى. سۋ لين كەلگەندە قۇرمەت قاراۋىلى ساپ تۇزەپ قۇرمەت ءبىلدىردى. شي جينپيڭ مەن سۋ لين پارات مىنبەسىنە شىقتى، اسكەري وركەستر جۇڭگو مەن ۆيەتنام ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. سۋ لين شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى. ءوسپىرىم بالالار قولدارىنا گۇل شوقتارىن جانە جۇڭگو، ۆيەتنام ەكى ەلدىڭ پارتيا تۋىن، مەملەكەت تۋىن ۇستاپ الاقايلاپ قۇرمەت ءبىلدىردى.

سول كۇنى تۇستە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا سۋ لين مەن حانىمىنا قارسى الۋ قوناعاسىن بەردى.

سول كۇنى تۇستەن كەيىن سۋ لين جۇڭگو كوممۋنيستىك پارتياسىنىڭ تاريح كورمەسىن ەكسكۋرسيالادى.

ساي چي، ۋاڭ ي، يىن لي، ۋاڭ شياۋحۇڭ قاتارلىلار قاتىستى قيمىلدارعا قاتىناستى.

كەلۋ قاينارى: حالىق تورابى