بازاردى باقىلاۋ - باسقارۋ تاراۋلارى جالعان اراق ءوندىرىپ ساتۋ ەرەكشە ءىرى تورىن تالقاندادى

حالىق گازەتىنىڭ ءتىلشىسى لين ليلي 4 - ايدىڭ 19 - كۇنى بەيجيڭنەن حابارلايدى. جۋىردا، بازاردى باقىلاۋ - باسقارۋ باس مەڭگەرمەسىنىڭ ءبىرتۇتاس سايكەستىرۋىمەن، سانشي، سىچۋان ەكى ولكەدەگى بازاردى باقىلاۋ - باسقارۋ، قوعام حاۋىپسىزدىگى تاراۋلارى بىرلەسىپ ارەكەت جاساپ، ساۋدا ماركاسى ۇقىعىنا قول سۇعۋ جانە جالعان – جارامسىز اراق ءوندىرىپ ساتۋ سىندى زاڭعا قايشى ەرەكشە ءىرى قىلمىستىق ىستەر تورىن ءساتتى تالقانداعان.

وسى رەتكى ارەكەت بارىسىندا، سانشي ولكەسىنىڭ لۇيلياڭ قالاسى، تاييۋان قالاسى وڭىرىندەگى قاتىستى زاڭعا قايشى ونىمدەردى ءوندىرۋ، جاسىرۋ، قوراپتاۋ جانە ساۋدا ماركاسىن باسۋ، پوشتامەن جىبەرۋ ورىندارىنان 7 ورىندى، ينتەرنەتتە تىكە تاراتۋ ارقىلى ساتۋ تۇيىنىنەن ءبىر ورىندى تەكسەرىپ انىقتاپ، ۇقىققا قول سۇعۋ جولىمەن جاسالعان دەگەن كۇمان تۋدىرعان 20 مىڭ ساندىققا جۋىق اق اراقتى انىقتاپ قولعا تۇسىرگەن. قازىرگە دەيىن تەكسەرىلىپ انىقتالعان دەلو سوماسى 260 ميلليون يۋان بولىپ، قوعام حاۋىپسىزدىگى ورگاندارى 22 ادامدى شاقىرتىپ، 11 ادامعا ماجبۇرلەۋ شاراسىن قولدانعان، ونىڭ ىشىندە 2 ادامدى تەكسەرىپ ايىپتاۋعا وتكىزىپ بەرگەن.

تەكسەرۋ ارقىلى، سانشي ۋىنجۇڭ ەلەكتروندىق ساۋدا شەكتى سەرىكتەستىگىنىڭ ناقتىلى باسقارۋشىسى جاۋ XX جانە ونىڭ جۇبايى ينتەرنەت تەكشەسىندە اراق ساۋداسىمەن شۇعىلدانعان. اناعۇرلىم كوپ پايداعا كەنەلۋ ءۇشىن، سانشي ولكەسى لۇيلياڭ قالاسى فىنشياڭ اراق جاساۋ شەكتى سەرىكتەستىگىنىڭ زاڭدى ۋاكىلى پەي X تى ىزدەپ بارىپ، وعان ۇقىققا قول سۇعۋ جولىمەن جياننانچۇن، ۋلياڭيە قاتارلى ايگىلى اراقتاردىڭ جالعانىن جاساپ بەرۋدى تالاپ ەتىپ، ونى ينتەرنەت ارقىلى ساتۋعا پايدالانعان. پەي X اراق ءوندىرۋ كۋالىگى جوق سانشي ولكەسى لۇيلياڭ قالاسى ۋحوۋشياڭ اراق كاسىبى شەكتى سەرىكتەستىگىنىڭ جاۋاپتىسىنا تاپسىرىس بەرىپ، ازىقتىق سپيرت، ازىقتىق قوسپا قوسىپ جاسالعان اراقتى اق اراق ورنىنا العان.

2024 - جىلدان بەرى، مەملەكەتتىك بازاردى باقىلاۋ - باسقارۋ باس مەڭگەرمەسى ساۋدا ماركاسى ۇقىعىنا قول سۇعۋعا باعىتتالعان زاڭ اتقارۋ، دەلو ءبىتىرۋ تەبىنىن ونان ارى كۇشەيتتى. 2024 - جىلدان 2025 - جىلعا دەيىن، بۇكىل ەلىمىزدەگى بازاردى باقىلاۋ - باسقارۋ تاراۋلارى ساۋدا ماركاسى ۇقىعىنا قول سۇعۋ دەلولارىنان زاڭعا قايشى تيجارات سوماسى 10 ميلليون يۋاننان اساتىن 30 دان استام دەلونى، 100 ميلليون يۋاننان اساتىن دەلودان 11 دەلونى تەكسەرىپ انىقتاعان.

كەلۋ قاينارى: حالىق تورابى