قوعام حاۋىپسىزدىگى ورگاندارى تاۋارعا بەرىلگەن ناشار باعانى اقىلى ءوشىرۋ قاتارلى زاڭعا قايشى ارەكەتتەرگە زاڭ بويىنشا قاتاڭ سوققى بەرەدى 

شينحۋا اگەنتتىگىنىڭ ءتىلشىسى لي ميڭحۇي 5 - ايدىڭ 14 - كۇنى بەيجيڭنەن حابارلايدى. قوعام حاۋىپسىزدىگى مينيسترلىگى ينتەرنەت حاۋىپسىزدىگى مەڭگەرمەسى 5 - ايدىڭ 14 - كۇنى تاۋارعا بەرىلگەن ناشار باعانى اقىلى ءوشىرۋ دەلوسىنان ەكى دەلو جونىندە حابارلاندىرۋ جاريالادى. قوعام حاۋىپسىزدىگى ورگاندارى وسى ەكى دەلوعا قاتىستى ەكى قىلمىستىق توپتى تالقانداپ، دەلوعا قاتىستى 7 ادامدى قولعا تۇسىرگەن.

تانىستىرۋعا قاراعاندا، بەيجيڭ قوعام حاۋىپسىزدىگى مەكەمەسى ينتەرنەت حاۋىپسىزدىگى تاراۋلارى قىزمەت بارىسىندا كوپتەگەن ەلەكتروندىق ساۋدا تەكشەلەرىندە، قىسقا كەسكىندەردىڭ پىكىر اۋماعىندا ”ناشار باعانى ءوشىرۋ جاعىندا كاسىپتىك قىزمەت وتەيمىز“ دەگەن سياقتى اقىلى ۇگىت جاساۋ ينفورماتسيالارى پايدا بولعانىن بايقاپ، تاۋارعا بەرىلگەن ناشار باعانى اقىلى ءوشىرۋ سىندى زاڭعا قايشى قيمىلدى ۇيىمداستىرۋشىلار بولۋى مۇمكىن دەپ كۇماندانعان.

تەكسەرۋ ارقىلى انىقتاۋعا قاراعاندا، گو X، شيە X اتاماندىعىنداعى ەكى قىلمىستىق توپ ەلەكتروندىق ساۋدا جاعىندا قىزمەت وتەۋ سەرىكتەستىگى دەگەن اتتى جەلەۋ ەتىپ، ساۋداگەرلەردىڭ ”ناشار باعانىڭ“ تاۋار ساتىلىمىنا ىقپال جاساۋىنان الاڭدايتىن پسيحيكاسىنان پايدالانىپ، جالعان ماتەريال جاساپ تەكشەگە ارىزدانۋ ارقىلى ناشار باعانى ءوشىرتۋ تاسىلىمەن ساۋداگەرلەرگە تاۋار جونىندە بەرىلگەن ناشار باعانى اقىلى ءوشىرۋ قىزمەتىن وتەپ، ورايدان پايدالانىپ زاڭسىز پايدا تاپقان.

2026 - جىلى 3 - ايدا بەيجيڭ ساقشى جاعى تەز ارەكەتتەنىپ، باسقا ولكە، قالالارعا بارىپ، ۇيىمداستىرۋشىنى قامتىعان دەلوعا قاتىستى ادامداردى ءساتتى ۇستادى. قازىر دەلوعا قاتىستى ادامداردىڭ بارلىعىنا قوعام حاۋىپسىزدىگى ورگاندارى جاعىنان زاڭ بويىنشا قىلمىستىق ماجبۇرلەۋ شاراسى قولدانىلدى، دەلو ىشكەرىلەي تەكسەرىلۋدە.

قوعام حاۋىپسىزدىگى مينيسترلىگى ينتەرنەت حاۋىپسىزدىگى مەڭگەرمەسىنىڭ قاتىستى جاۋاپتىسى بىلاي دەدى: ينتەرنەت بۇقارانىڭ زات ساتىپ الۋ - تۇتىنۋ، تىلدەسۋ جانە زاتقا باعا بەرۋىندەگى ماڭىزدى ارناسى رەتىندە، كاسىپورىنداردىڭ، ساۋداگەرلەردىڭ ەل اۋزىنا ءىلىنۋى مەن وبرازى جونىنەن وتە ماڭىزدى، زاڭسىز ەلەمەنتتەر ”اڭىستى جاقسارتۋ“ دەگەندى جەلەۋ ەتىپ، ەلەكتروندىق ساۋدا دۇكەندەرىنە، ماركا يەلەرىنە ناشار پىكىرلەردى ءوشىرۋ قىزمەتىن وتەسە، قوعام حاۋىپسىزدىگى ورگاندارى، ءسوزسىز، قاتاڭ سوققى بەرەدى.

كەلۋ قاينارى: حالىق تورابى