شي جينپيڭ ا ق ش - نىڭ زۇڭتۇڭى ترامپپەن كەڭەس وتكىزدى

5 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ا ق ش - نىڭ زۇڭتۇڭى ترامپپەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

5 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ا ق ش - نىڭ زۇڭتۇڭى ترامپپەن كەڭەس وتكىزدى. كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ترامپتى قارسى الۋ سالتىن وتكىزدى.

سۋرەتتى فىڭ يۇڭبين تۇسىرگەن (شينحۋا اگەنتتىگى تاراتتى)

«حالىق گازەتى»، 5 - ايدىڭ 14 - كۇنى، بەيجيڭ (ءتىلشى ياڭ چياۋچۋ). 5 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ا ق ش - نىڭ زۇڭتۇڭى ترامپپەن كەڭەس وتكىزدى.

شي جينپيڭ بىلاي دەپ اتاپ كورسەتتى: قازىر 100 جىلدىق وزگەرىس جەدەل قۇبىلىپ، حالىقارالىق جاعدايدا وزگەرىس، بىلىقپالىق قاباتتاستى، جۇڭگو مەن ا ق ش ”تۇزاقتان“ اتتاپ ءوتىپ، ءىرى ەلدەر قارىم - قاتىناسىنىڭ جاڭا ۇلگىسىن اشا الا ما، جوق پا؟ دۇنيە جۇزىلىك سىن - سايىسقا قول ۇستاسا توتەپ بەرىپ، دۇنيە جۇزىنە اناعۇرلىم كوپ ورنىقتىلىق ۇستەي الا ما، جوق پا؟

ەكى ەل حالقىنىڭ ىرىس - قۇتى مەن ادامزاتتىڭ بولاشاعىنا، تاعدىرىنا نازار اۋدارىپ، ەكى ەل قارىم - قاتىناسىنىڭ كوركەم بولاشاعىن بىرگە اشا الا ما، جوق پا؟ بۇلار − تاريحتىڭ سۇراۋى، دۇنيە ءجۇزىنىڭ سۇراۋى، حالىقتىڭ سۇراۋى، سونداي - اق ءىرى ەل باسشىلارى بىرگە جازۋعا ءتيىستى داۋىرلىك جاۋاپ. مەن ترامپ زۇڭتۇڭمەن بىرگە جۇڭگو - ا ق ش قارىم - قاتىناسى سىندى وسى الىپ كەمەگە جاقسى جول باستاپ، رولدى جاقسى ۇستاپ، 2026 - جىلدى جۇڭگو - ا ق ش قارىم - قاتىناسىنىڭ بۇرىنعىعا مۇراگەر بولىپ، كەيىنگىگە جول اشۋىنداعى تاريحي، سيمۆولدىق جىلعا اينالدىرۋدى قالايمىن.

شي جينپيڭ بىلاي دەپ باسا دارىپتەدى: جۇڭگو جاق جۇڭگو - ا ق ش قارىم - قاتىناسىنىڭ ورنىقتى، اقاۋسىز، باياندى دامۋىنا كۇش سالادى. مەن ترامپ زۇڭتۇڭمەن بىرگە ”جۇڭگو مەن ا ق ش - نىڭ سىندارلى ستراتەگيالىق، ورنىقتى قارىم - قاتىناسىن“ ورناتۋدى جۇڭگو - ا ق ش قارىم - قاتىناسىنىڭ جاڭا ورنى ەتىپ، الداعى 3 جىلداعى، اۋەلى، ونان دا ۇزاق ۋاقىتتاعى جۇڭگو - ا ق ش قارىم - قاتىناسىنا ستراتەگيالىق جەتەكشىلىك ازىرلەۋدى قۇپتايمىن، مۇنىڭ ەكى ەل حالقىنىڭ جانە حالىقارالىق قوعامنىڭ قارسى الۋىنا يە بولاتىندىعىمىزعا سەنەمىن. ”سىندارلى ستراتەگيالىق، ورنىقتىلىق“ سەلبەستىكتى نەگىز ەتكەن بەلسەندى ورنىقتىلىق بولۋى، باسەكە تەبىنى قالىپتى ءتيىمدى ورنىقتىلىق بولۋى، الاۋىزدىقتى مەڭگەرۋگە بولاتىن قالىپتى ورنىقتىلىق بولۋى، بەيبىت، كوزەۋلى باياندى ورنىقتىلىق بولۋى كەرەك. ”جۇڭگو مەن ا ق ش - نىڭ سىندارلى ستراتەگيالىق، ورنىقتى قارىم - قاتىناسى“ ۇران عانا ەمەس، قايتا ءبىر - بىرىنە باعىتتالعان ارەكەت بولۋعا ءتيىس.

شي جينپيڭ بىلاي دەپ اتاپ كورسەتتى: جۇڭگو مەن ا ق ش - نىڭ ەكونوميكا - ساۋدا قارىم - قاتىناسىنىڭ ءمانى − ءوزارا پايدا جەتكىزىپ، تەڭ يگىلىككە كەنەلۋ، الاۋىزدىقتار مەن قاقتىعىس الدىندا تەڭ تۇرعىدا كەڭەسۋ − بىردەن - ءبىر دۇرىس تالعام. كەشە ەكى ەلدىڭ ەكونوميكا - ساۋدا ۇيىرمەلەرى جالپى جاقتان بارابار، بەلسەندى تابىستارعا قول جەتكىزدى، بۇل ەكى ەل بۇقاراسى مەن دۇنيە ءجۇزى جونىنەن شات حابار سانالادى. ەكى جاق وڭاي - وسپاق قولعا كەلمەگەن تاماشا جاعدايدى بىرگە قورعاۋى كەرەك.

جۇڭگونىڭ اشىق ەسىگى بارعان سايىن ايقارا اشىلادى، ا ق ش كاسىپورىندارى جۇڭگونىڭ رەفورما جاساپ، ەسىك اشۋىنا ىشكەرىلەي ات سالىسۋدا، جۇڭگو جاق ا ق ش - نىڭ جۇڭگومەن ءوزارا ءتيىمدى سەلبەستىكتى كۇشەيتۋىن قارسى الادى.

شي جينپيڭ بىلاي دەپ اتاپ كورسەتتى: ەكى جاق ءبىز كەلىسكەن ماڭىزدى ورتاق تانىمدى تياناقتاندىرىپ، ساياسي ديپلوماتيا، ەكى ارميانىڭ قارىم - قاتىناسى ارناسىنان اناعۇرلىم ويداعىداي پايدالانۋى كەرەك. ەكونوميكا - ساۋدا، دەنساۋلىق ساقتاۋ، اۋىل شارۋاشىلىعى، ساياحات، گۋمانيتارلىق، زاڭ اتقارۋ سياقتى سالالارداعى اۋىس - كۇيىستى، سەلبەستىكتى كەڭەيتۋ كەرەك.

شي جينپيڭ بىلاي دەپ باسا دارىپتەدى: تايۋان ماسەلەسى − جۇڭگو - ا ق ش قارىم - قاتىناسىنداعى ەڭ ماڭىزدى ماسەلە.

ويداعىداي شەشىلسە، ەكى ەل قارىم - قاتىناسىندا جالپى تۇلعالىق ورنىقتىلىقتى ساقتاۋعا بولادى. ويداعىداي شەشىلمەسە، ەكى ەل ۇستاسىپ، ءتىپتى قاقتىعىسىپ، تۇتاس جۇڭگو - ا ق ش قارىم - قاتىناسىن توتەنشە حاۋىپتى جاعدايعا يتەرمەلەيدى.

”تايۋان دەربەستىگى“ تايۋان بۇعازىنىڭ بەيبىتشىلىگىمەن وت پەن سۋداي وتاسپايدى، تايۋان بۇعازىنىڭ بەيبىتشىلىگى مەن ورنىقتىلىعىن قورعاۋ − جۇڭگو مەن ا ق ش ەكى جاقتىڭ ەڭ ۇلكەن ورتاق بولگىشى، ا ق ش تايۋان ماسەلەسىن، ءسوز جوق، بارىنشا ابايلاپ ءبىر جاقتى ەتۋى كەرەك.

ترامپ مىنالاردى ءبىلدىردى: جۇڭگودا مەملەكەتتىك ساپاردا بولعانىمدى توتەنشە ماقتانىش سەزىنەمىن. ا ق ش - جۇڭگو قارىم - قاتىناسى وتە جاقسى، مەن ءتوراعا شي جينپيڭمەن تاريحتاعى ا ق ش - جۇڭگو باسشىلارى اراسىنداعى ەڭ ۇزاق جانە ەڭ تاماشا قارىم - قاتىناس ورناتىپ، دوسجار بەينەمەن پىكىرلەسۋدى ساقتاپ، كوپتەگەن ماڭىزدى ماسەلەنى شەشتىم. ءتوراعا شي جينپيڭ − ۇلى باسشى، جۇڭگو − ۇلى مەملەكەت، مەن ءتوراعا شي جينپيڭ مەن جۇڭگو حالقىن ايرىقشا قۇرمەتتەيمىن. بۇگىنگى ديدارلاسۋ دۇنيە ءجۇزىن جالت قاراتقان ماڭىزدى ديدارلاسۋ بولدى. مەن ءتوراعا شي جينپيڭمەن بىرگە تىلدەسۋدى، سەلبەستىكتى كۇشەيتىپ، الاۋىزدىقتاردى ۇيلەسىمدى شەشىپ، تاريحتان بەرگى ەڭ جاقسى امەريكا - جۇڭگو قارىم - قاتىناسىن باستاپ، ەكى ەلدىڭ اناعۇرلىم كوركەم بولاشاعىن اشۋدى قالايمىن. ا ق ش، جۇڭگو − دۇنيە جۇزىندەگى ەڭ ماڭىزدى، ەڭ قۋاتتى ەلدەر، ا ق ش مەن جۇڭگو سەلبەسسە، ەكى ەل ءۇشىن، دۇنيە ءجۇزى ءۇشىن كوپتەگەن ءىرى ءىس، يگى ءىس ىستەي الادى. مەن وسى رەتكى ساپارىمدا ا ق ش ونەركاسىپ - ساۋدا سالاسىنىڭ كورنەكتى ۋاكىلدەرىن باستاپ كەلدىم، ولار جۇڭگوعا ەرەكشە قۇرمەت ەتەدى جانە ءمان بەرەدى، مەن ولاردى جۇڭگومەن سەلبەستىكتى كەڭەيتۋگە بەلسەنە شابىتتاندىرامىن.

ەكى ەل مەملەكەت باسشىلارى ورتا شىعىس جاعدايى، ۋكراينا داعدارىسى، چاۋشيان تۇبەگى سياقتى كەلەلى حالىقارالىق جانە وڭىرلىك ماسەلەلەر جونىندە پىكىر اۋىستىردى.

ەكى ەلدىڭ مەملەكەت باسشىلارى ءوزارا قولداۋ كورسەتىپ، ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بيىلعى بەيرەسمي ءماجىلىسىن جانە 20 ەل توبى باسشىلار ءماجىلىسىن ويداعىداي وتكىزۋگە ءبىر اۋىزدان ماقۇل بولدى.

كەڭەس كەزىندە ترامپ شي جينپيڭگە كاسىپورىنشىلاردى ءبىر - بىرلەپ تانىستىردى.

كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ترامپتى قارسى الۋ سالتىن وتكىزدى.

ترامپ جەتكەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن ا ق ش - نىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. ترامپ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

ساي چي، ۋاڭ ي، حى ليفىڭ كەڭەسكە قاتىناستى.

كەلۋ قاينارى: حالىق تورابى