شي جينپيڭ ا ق ش زۇڭتۇڭى ترامپپەن بىرگە تيانتاندى ەكسكۋرسيالادى

5 - ايدىڭ 14 - كۇنى مەملەكەت ءتوراعاسى شي جينپيڭ جۇڭگوعا مەملەكەتتىك ساپارمەن كەلگەن ا ق ش زۇڭتۇڭى ترامپپەن بىرگە تيانتاندى ەكسكۋرسيالادى. ەكى ەلدىڭ مەملەكەت باسشىلارى عيباداتحانانىڭ تىلەۋ سارايى الاڭىندا ەستەلىك سۋرەتكە ءتۇستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 5 - ايدىڭ 14 - كۇنى، بەيجيڭ (تىلشىلەر گۇڭ حان، ۋاڭ رۇڭ). 5 - ايدىڭ 14 - كۇنى مەملەكەت ءتوراعاسى شي جينپيڭ جۇڭگوعا مەملەكەتتىك ساپارمەن كەلگەن ا ق ش زۇڭتۇڭى ترامپپەن بىرگە تيانتاندى ەكسكۋرسيالادى.

جاز باسىنداعى تيانتان الاڭى جاسىل جەلەك جامىلىپ، سالقىن سامال ەسۋدە. شي جينپيڭ عيباداتحانانىڭ تىلەۋ سارايىندا ترامپتىڭ ساپارلاي كەلگەنىن قارسى الدى.

شي جينپيڭ ترامپپەن كەڭ كوسىلگەن عيباداتحانا تىلەۋ سارايى الاڭىندا ەستەلىك سۋرەتكە ءتۇستى.

تىلەۋ سارايى قۇرىلىسىنىڭ ايبىنى اسقاق، دودەگەسى جارقىراپ تۇر. ەكى ەل مەملەكەت باسشىلارى باسپالداقپەن جوعارى كوتەرىلىپ، تىلەك تىلەۋ سارايىنا كىرىپ، ورنەكتەر مەن بەل اعاشتاردىڭ دالمە - ءدال قابىسۋى، استرونوميالىق كۇنتىزبە مەن ساراي قۇرىلىمىنىڭ كەمەلدى توعىسۋى سىندى قۇرىلىس ەرەكشەلىگىنەن بىرگە ءلاززاتتانىپ، ونداعى كۇللى عالامنىڭ جاراسىمدىلىعىن، جاعدايعا قاراي ىستەۋ ۇستانىمىن سەزىندى.

شي جينپيڭ بىلاي دەپ اتاپ كورسەتتى: 2017 - جىلى ءبىز بەيجيڭنىڭ ورتا ءوس سىزىعىن بويلاپ گۋگۇڭ سارايىن ەكسكۋرسيالادىق. بۇگىن ەكسكۋرسيالاعان تيانتان گۋگۇڭ سارايىمەن قارايلاس سالىنعان، ”اسپان دوڭگەلەك، جەر تورتكىل“ دەگەن ماعىنانى بىلدىرەدى، بۇل جۇڭگولىقتاردىڭ دۇنيەگە كوزقاراسى مەن ءومىر ءسۇرۋ فيلوسوفياسىن ايگىلەيدى. جۇڭگونىڭ ەرتە زامانعى بيلىك جۇرگىزۋشىلەرى تيانتاندا تاساتتىق بەرۋ سالتىن وتكىزىپ، مەملەكەتتىڭ تىنىش بولۋىن، جاۋىن - شاشىننىڭ مول بولۋىن تىلەپ، حالىقتى نەگىز ەتۋ، نەگىزدى بەكەمدەۋ سىندى جۇڭگونىڭ ءداستۇرلى يدەياسىن ايگىلەيتىن بولعان. جاڭا زاماندا جۇڭگو كوممۋنيستىك پارتياسى جۇڭحۋا وركەنيەتىنىڭ حالىقتىق يدەياسىنا مۇراگەرلىك ەتىپ جانە ونى دامىتىپ، بۇكىل ىنتا - پەيىلىمەن حالىق ءۇشىن قىزمەت ىستەۋ ءتۇبىرلى ماقساتىنا باستان - اياق تاباندى بولىپ، حالىقتىڭ باتىل قولداۋى مەن شىن جۇرەكتەن قۇپتاۋىنا يە بولدى.

ترامپ مىنالاردى ءبىلدىردى: سول جىلعى گۋگۇڭ ساپارى كۇنى بۇگىنگە دەيىن ەسىمدە. تيانتان 600 جىلدان استام ۋاقىت وتكەننەن كەيىن دە اسقاق بوي كوتەرىپ، جۇڭگونىڭ تاماشا كلاسسيكالىق قۇرىلىس ونەرى مەن باي مازمۇندى ءداستۇرلى مادەنيەتىن ايگىلەپ تۇر، كىسىنى سۇيىندىرەدى. ا ق ش مەن جۇڭگو ۇلى ەلدەر، ەكى ەل حالقى دا ۇلى حالىق، اقىل - پاراساتقا باي. ەكى ەل ءوزارا ءتۇسىنىسۋدى تەرەڭدەتىپ، حالىقتار دوستىعىن كۇشەيتۋى كەرەك.

ساي چي، ۋاڭ ي، يىن لي قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى