جازدا جاۋىن - شاشىن كوپ جاۋاتىندىقتان شىرعالاڭ كوپ تۋىلادى، قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى ەسكەرتۋ جاريالادى 

شينحۋا اگەنتتىگىنىڭ ءتىلشىسى سۇن پىڭچىڭ 5 - ايدىڭ 22 – كۇنى بەيجيڭنەن حابارلايدى. جۋىردا جاۋىن ءجيى جاۋعاندىقتان، قاتىناس حاۋىپسىزدىگىنە ءتيىمسىز بولدى، كەيبىر جەرلەردە جاۋىن – شاشىن بارىسىندا جول تايعاق بولعاندىقتان، قاتىناس شىرعالاڭى كوپتەپ تۋىلدى. قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى 5 - ايدىڭ 22 – كۇنى مىنانى ەسكەرتتى: جاۋىن - شاشىندى اۋا رايىنا كەز بولعاندا، ءسوزسىز، اۆتوموبيلدى ابايلاپ جۇرگىزۋ كەرەك.

قوعام حاۋىپسىزدىگى مينيسترلىگى قاتىناس باسقارۋ مەڭگەرمەسىنىڭ حابارلاۋىنشا، 5 - ايدىڭ 16 - كۇنى ساعات 7 دە 17 مينۋت مولشەرىندە، ءبىر جولاۋشىلار اۆتوبۋسى سانشي ولكەسى جينجۇڭ قالاسى زوچۋان اۋدانىنداعى ولكەلىك S322 جولىمەن سولتۇستىكتەن وڭتۇستىككە قاراي ءجۇرىپ، تۇڭيۇي قالاشىعى شىباۋ قىستاعىنداعى اينالمالى ەڭىس جول بولىگىنە كەلگەندە، اۆتوبۋس مەڭگەرۋسىز كەتىپ اۋدارىلعان، اۆتوبۋستاعى 2 ادام قازا بولىپ، 2 ادام جارالانعان. العاشقى تەكسەرۋگە قاراعاندا، شىرعالاڭ تۋىلعان اۆتوبۋس شوفەرىنىڭ جاڭبىرلى كۇنى اينالمالى ەڭىس جول بولىگىنەن وتكەندە جىلدامدىقتى شەكتەن اسىرۋى، اۆتوبۋستى دۇرىس جۇرگىزبەۋى شىرعالاڭنىڭ تۋىلۋىنىڭ تىكەلەي سەبەبى بولعان.

قوعام حاۋىپسىزدىگى مينيسترلىگى قاتىناس باسقارۋ مەڭگەرمەسى مىنانى ەسكەرتتى: جاۋىن - شاشىندى كۇنى جول تايعاق بولىپ، كورىنىمدىلىك شارت - جاعدايى ناشارلايدى، ءىشىنارا جول بولىكتەرىندە قىسقا ۋاقىت ىشىندە نوسەر جاۋۋ سەبەبىنەن سۋ ىركىلۋ جاعدايى تۋىلۋى مۇمكىن، بۇل اۆتوموبيل جۇرگىزۋ حاۋىپسىزدىگىنە اۋىر ىقپال جاسايدى. جاۋىندى كۇنى، ءسوزسىز، اۆتوموبيلدى ابايلاپ جۇرگىزۋ كەرەك، ”جىلدامدىقتى باسەڭدەتۋ، ارالىق ساقتاۋ، شىراق جاعۋ“ قاجەت، تورموزدى شۇعىل باسۋعا، رولدى قاتتى بۇرۋعا بولمايدى. شۇعىل بۇرىلىس، ەڭىس جول بولىكتەرىنەن وتكەندە، جىلدامدىقتى الدىن الا باسەڭدەتكەن ءجون، جولدى يەلەپ الۋعا، الدىڭعى اۆتوموبيلدەن زورلىقپەن باسىپ وزۋعا بولمايدى. سۋ ىركىلگەن جول بولىگىنە، كوپىردى سۋ باسقان جەرگە كەز بولعاندا، اۆتوموبيلدى توقتاتىپ باقىلاپ، حاۋىپسىز ەكەنىنە كوز جەتكىزگەننەن كەيىن ابايلاپ ءوتۋ كەرەك، ەگەر حاۋىپسىز وتۋگە مۇمكىندىك بولماسا، تاۋەكەلگە باسىپ سۋدان وتۋگە بولمايدى.

كەلۋ قاينارى: حالىق تورابى