شي جينپيڭ سەربيانىڭ زۇڭتۇڭى ۆۋچيچكە ”دوستىق وردەنىن“ تابىستاۋ سالتىن وتكىزدى

5 - ايدىڭ 25 - كۇنى كەشتە مەملەكەت ءتوراعاسى شي جينپيڭ بەيجيڭدەگى حالىق سارايىندا سەربيانىڭ زۇڭتۇڭى ۆۋچيچكە ”دوستىق وردەنىن“ تابىستاۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 5 - ايدىڭ 25 - كۇنى، بەيجيڭ. 5 - ايدىڭ 25 - كۇنى كەشتە مەملەكەت ءتوراعاسى شي جينپيڭ بەيجيڭدەگى حالىق سارايىندا سەربيانىڭ زۇڭتۇڭى ۆۋچيچكە ”دوستىق وردەنىن“ تابىستاۋ سالتىن وتكىزدى.

جۇڭگو مەن سەربيانىڭ مەملەكەت تۋلارى قاز - قاتار تىزىلگەن، ارتقى كورىنىس تاقتاسىندا التىن ءتۇستى ”دوستىق وردەنىنىڭ“ ورنەگى جارقىراپ تۇر. جۇڭگو حالىق ازاتتىق ارمياسى قۇرمەت قاراۋىلى قوسىنىنىڭ قۇرمەت قاراۋىلى وردەنمەن ماراپاتتاۋ تەكشەسىنىڭ ەكى جاعىندا اسقاق تۇردى.

سالت باستالعاندا ايبىندى قۇرمەت ءۇنى كوتەرىلىپ، التىن ءتۇستى ەسىك باياۋ اشىلدى، ءتوراعا شي جينپيڭ مەن ۆۋچيچ زۇڭتۇڭ زالعا بىرگە كىردى.

ءتوراعا شي جينپيڭنىڭ حانىمى پىڭ لييۋان، ۆۋچيچ زۇڭتۇڭنىڭ حانىمى تامارا بىرگە ءجۇردى. بۇكىل زالداعى سيلى قوناقتار ورىندارىنان تۇرىپ، قىزۋ شاپالاق سوعىپ، قۇرمەتپەن قاراپ تۇردى.

شي جينپيڭ مەن ۆۋچيچ وردەنمەن ماراپاتتاۋ مىنبەسىنە شىقتى.

اسكەري وركەستر جۇڭحۋا حالىق رەسپۋبليكاسىنىڭ مەملەكەت ءانىن ورىندادى.

شي جينپيڭ ارناۋ ءسوز سويلەدى.

شي جينپيڭ بىلاي دەپ اتاپ كورسەتتى: ۆۋچيچ زۇڭتۇڭ ۇزاق ۋاقىتتان بەرى جۇڭگو - سەربيا دوستىعىنا كۇش سالىپ، ەكى ەل قاتىناسىنىڭ دامۋىن كۇش سالا ىلگەرىلەتتى، ول _ جۇڭگو مەن سەربيانىڭ جان - جاقتى ستراتەگيالىق سەرىكتەستىك قاتىناسىنىڭ بەلسەندى قۇرۋشىسى جانە باتىل قورعاۋشىسى. جۇڭگونىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە، ۆۋچيچ زۇڭتۇڭ باستان - اياق جۇڭگو جاققا ەڭ تاباندى، ەڭ ايقىن قولداۋ كورسەتىپ، قالىڭ جۇڭگو حالقىنىڭ قۇرمەتىنە بولەندى. قازىر جۇڭگو مەن سەربيا ەكى ەلدىڭ ساياسي سەنىمدىلىگى بولاتتاي بەرىك، ناقتى سەلبەستىك جەتىستىكتەرى كوز سۇرىندىرەدى، ۇرپاقتان - ۇرپاققا جالعاسقان دوستىق جۇرت جۇرەگىنە تەرەڭ ۇيالاعان، دوستىق سەلبەستىكتىڭ كلاسسيكالىق نىساندارى بىرگە ارت - ارتىنان قالىپتاسۋدا. اماليات جۇڭگو مەن سەربيا ەكى ەلدىڭ ءوزارا قولداۋ كورسەتىپ، دامۋعا بىرگە تالپىنىپ، سەلبەسىپ تەڭ يگىلىككە كەنەلىپ، ءوزارا تابىسقا جەتىپ، ەكى ەل حالقىنا شىنايى باقىت جاراتىپ، مەملەكەت پەن مەملەكەت بارىس - كەلىسىنىڭ ۇلگىسىن ورناتىپ، حالىقارالىق قوعامعا ۇلگى ەتۋگە تاتيتىن ۇلگى ازىرلەگەندىگىن دالەلدەدى.

شي جينپيڭ بىلاي دەپ باسا دارىپتەدى: ”دوستىق وردەنى“ جۇڭحۋا حالىق رەسپۋبليكاسىنىڭ سىرتقا باعىتتالعان ەڭ جوعارى داڭق وردەنى، بۇل وردەن ۆۋچيچ زۇڭتۇڭنىڭ جۇڭگو - سەربيا دوستىعىنا قوسقان ۇلەسىن وسكەلەڭ تۇراقتاندىرعاندىق بولىپ قانا قالماستان، ەكى ەل حالقىنىڭ جاڭا داۋىردەگى جۇڭگو - سەربيا تاعدىرلاس ورتاق تۇلعاسى قۇرىلىسىنا دەگەن شىنايى ءۇمىتىن دە ارقالاعان. جۇڭگو - سەربيا دوستىعى قان مەن وتتا شىڭدالۋدى باستان كەشىردى، قازىرگى حالىقارالىق اۋمالى - توكپەلى جاعدايدا ءتىپتى دە باعالى. جۇڭگو مەن سەربيا حالقى دەربەس، ءوز - وزىنە قوجايىن بولۋعا تاباندى بولىپ، ۇلتتىڭ ار - نامىسىن باتىل قورعاپ، حالىقارالىق ادىلدىك پەن ادىلەتتىلىكتى باتىل قورعاپ، ءوز - ءوزىنىڭ دامۋ، گۇلدەنۋ ساپارىندا ۇزدىكسىز تىڭ جەڭىستەرگە قول جەتكىزەدى.

وسىدان كەيىن پارتيا مەن مەملەكەتتىڭ ەڭبەك ءسىڭىرىپ داڭققا يە بولعانداردى ماداقتاۋ - سيلاۋ قىزمەت كوميتەتى مەڭگەرۋشىسىنىڭ ورىنباسارى، سىرتقى ىستەر مينيسترى ۋاڭ ي «جۇڭحۋا حالىق رەسپۋبليكاسى ءتوراعاسىنىڭ وردەن ۇسىنۋ بۇيرىعىن» وقىدى.

قۇرمەت قاراۋىلى ”دوستىق وردەنىن“ قورعاپ الاڭعا كىردى.

ايبىندى مۋزىكا ءۇنى ىشىندە شي جينپيڭ ۆۋچيچكە سالتاناتتى تۇردە وردەن تاقتى. ەكى ەل مەملەكەت باسشىلارى ىقىلاسپەن قول الىستى. بۇكىل زالدان ۇزاققا دەيىن شاتىرلاعان شاپالاق ءۇنى كوتەرىلدى.

اسكەري وركەستر سەربيا رەسپۋبليكاسىنىڭ مەملەكەت ءانىن ورىندادى.

ۆۋچيچ العىس ءسوزىن سويلەدى. ۆۋچيچ مىنالاردى ءبىلدىردى: جۇڭگو جاقتىڭ ماعان ”دوستىق وردەنىن“ بەرگەندىگىنە العىس ايتامىن، مەن سەربيا ەلى مەن حالقى اتىنان وسى وردەندى قابىلدايمىن. بۇل _ مەنىڭ ومىرىمدەگى ەڭ ماڭىزدى ساتتەردىڭ ءبىرى، بۇل وردەن مەنىڭ ەڭ جوعارى داڭقىم عانا ەمەس، سەربيانىڭ يەلىك ۇقىققا، تاۋەلسىزدىككە جانە دامۋعا تالپىنعاندىعىن مويىنداۋ بولىپ تابىلادى. جۇڭگو كىشى ەلدەرگە باستان - اياق قۇرمەت ەتىپ، قيىن - قىستاۋ ساتتەردە قاشاندا سەربيا حالقىمەن بىرگە بولىپ، سەربيانىڭ دامۋىنا كومەكتەستدى، ءبىز جۇڭگونىڭ قولداۋىن، كومەگىن ماڭگى ۇمىتپايمىز. مەن سەربيا مەن جۇڭگونىڭ دوستىق ىستەرىنە ۇزدىكسىز كۇش سالىپ، جۇڭگو جاقپەن بىرگە سەربيا مەن جۇڭگونىڭ تاعدىرلاس ورتاق تۇلعاسىن قۇرۋدى ىلگەرىلەتەمىن.

پارتيا مەن مەملەكەتتىڭ ەڭبەك ءسىڭىرىپ، داڭققا يە بولعانداردى ماداقتاۋ - سيلاۋ قىزمەت كوميتەتىنىڭ مەڭگەرۋشىسى ساي چي، ورىنباسار مەڭگەرۋشىلەرى لي گانجيە، لي حۇڭجۇڭ، ۋ جىڭلۇڭ قاتارلىلار سالتقا قاتىناستى.

كەلۋ قاينارى: حالىق تورابى