جۇڭگو - لاوس ساقشى ىستەرى سەلبەستىگى تاعى ءبىر جەتىستىككە قول جەتكىزدى: الدامشىلىققا ساياتىن قىلمىس كۇماندىلارىنان 494 ادام ەلىمىزگە تاپسىرىلدى 

ورتالىق تەلەۆيزيا تورابىنىڭ حابارى: قوعام حاۋىپسىزدىگى مينيسترلىگىنىڭ حابارىنا قاراعاندا، تەلەكوم مەن ينتەرنەتتەن پايدالانىپ شەكارا اتتاپ الدامشىلىق ىستەۋ قاتارلى زاڭسىز قىلمىستىق ارەكەتتەرگە زاڭ بويىنشا قاتاڭ سوققى بەرۋ ءۇشىن، ەلىمىزدىڭ قوعام حاۋىپسىزدىگى ورگاندارى لاوس ساقشى جاعىمەن حالىقارالىق ساقشى ىستەرى جانە زاڭ اتقارۋ جاعىنداعى سەلبەستىكتى ۇزدىكسىز ورىستەتكەن. جۋىردا، لاوس ساقشى جاعى الدىڭعى مەزگىلدەگى ارناۋلى سوققى بەرۋ ارەكەتى بارىسىندا الدامشىلىققا ساياتىن قىلمىس كۇماندىلارىنان ۇستالعان 494 ادامدى ەلىمىزگە تاپسىرىپ بەرگەن. بۇل تەلەكوم مەن ينتەرنەتتەن پايدالانىپ شەكارا اتتاپ الدامشىلىق ىستەۋشىلەرگە سوققى بەرۋدە ەكى ەل ساقشى جاعىنىڭ قول جەتكىزگەن تاعى ءبىر كەلەلى جەتىستىگى.

بيىل جىل باسىنان بەرى، كامبودجا تەلەكوم مەن ينتەرنەتتەن پايدالانعان الدامشىلىق ارەكەتىنە سوققى بەرۋ، اپانىن جويۋ تەبىنىن ۇزدىكسىز كۇشەيتكەندىكتەن، ءىشىنارا الدامكوستىك اپاندارى مەن الدامشىلىق ىستەيتىن ادامدار لاوس شەكاراسى ىشىنە جوتكەلىپ دەلو تۋدىرۋدى جالعاستىردى. جۇڭگو - لاوس ساقشى ىستەرى سەلبەستىك كەلىسىمىنە ساي، لاوس ساقشى جاعى جۋىردا ارناۋلى سوققى بەرۋ ارەكەتىن ورىستەتىپ، الدامشىلىققا ساياتىن قىلمىس كۇماندىلارىنان 494 ادامدى ۇستاپ، يۇننان ولكەسى شيشۋاڭباننا وبىلىسى موحان وتكەلى ارقىلى ەلىمىزگە تاپسىردى. قوعام حاۋىپسىزدىگى مينيسترلىگى سىچۋان، چۇڭچيڭ قوعام حاۋىپسىزدىگى ورگاندارىن ۇيىمداستىرىپ جەتەكشىلىك ەتىپ، اتالعان قىلمىس كۇماندىلارىن ءساتتى تاپسىرىپ الىپ، زاڭ بويىنشا قاتىستى قىزمەتتەردى ورىستەتتى.

قوعام حاۋىپسىزدىگى مينيسترلىگىنىڭ قاتىستى جاۋاپتىسى بىلاي دەدى: قوعام حاۋىپسىزدىگى ورگاندارى قاتىستى ەلدەرمەن ساقشى ىستەرى جانە زاڭ اتقارۋ جاعىنداعى سەلبەستىكتى ۇزدىكسىز تەرەڭدەتىپ، بىرلەسىپ سوققى بەرۋ مەحانيزمىن اناعۇرلىم بەكەمدەپ، كەمەلدەندىرىپ، اپاندارىن تازالاۋ، ”باسقالقالارىن“ ۇستاۋ، ادامداردى قايتارىپ اكەلۋ قاتارلى قىزمەتتەردى ۇزدىكسىز ورىستەتىپ، تەلەكوم مەن ينتەرنەتتەن پايدالانىپ الدامشىلىق ىستەۋ قىلمىستىق ارەكەتىنىڭ كەڭىستىگىن كۇش سالا تارايتىپ، تەلەكوم مەن ينتەرنەتتەن پايدالانىپ شەكارا اتتاعان الدامشىلىق ىستەۋ قىلمىسىنىڭ ءورشۋ اۋقىمىن باتىل تەجەيدى.

كەلۋ قاينارى: حالىق تورابى