شي جينپيڭ پاكيستاننىڭ زۇڭليى شاھبازبەن كەزدەستى

5 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارلاي كەلگەن پاكيستاننىڭ زۇڭليى شاھبازبەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 5 - ايدىڭ 25 - كۇنى، بەيجيڭ. مەملەكەت ءتوراعاسى شي جينپيڭ 5 - ايدىڭ 25 - كۇنى تۇستەن كەيىن حالىق سارايىندا جۇڭگوعا رەسمي ساپارمەن كەلگەن پاكيستاننىڭ زۇڭليى شاھبازبەن كەزدەستى.

شي جينپيڭ مىنالاردى ءبىلدىردى: جۇڭگو مەن پاكيستان ديپلوماتيالىق قاتىناس ورناتقان 75 جىلدان بەرى ەكى ەل ءبىرىن - ءبىرى ءتۇسىنىپ، ءبىر - بىرىنە سەنىپ، ءبىرىن - ءبىرى قولداپ، مىزعىماس ءداستۇرلى دوستىقتى سومدادى، ەكى جاقتىڭ ستراتەگيالىق ءوزارا سەنىمدىلىگى مەن ناقتى سەلبەستىگى ءوز ەلدەرىنىڭ دامۋىن پارمەندى جەبەدى. حالىقارالىق جاعداي قالاي وزگەرسە دە، جۇڭگو جاق جۇڭگو - پاكيستان قاتىناسىن دامىتۋدى باستان - اياق توڭىرەكتىك ديپلوماتيانىڭ ماڭداي الدى بەتالىسىنا قويىپ كەلەدى. تاياۋدا تيانجين داشۋەسىندە وقىپ جاتقان پاكيستاندىق وقۋشىلاردىڭ حاتىن تاپسىرىپ الدىم. وقۋشىلار جۇڭگو - پاكيستان سەلبەستىگىنىڭ قۇرۋشىسى، اۋىس - كۇيىسىنىڭ تاراتۋشىسى، دوستىقتىڭ قورعاۋشىسى بولۋعا بەل بايلاپتى. ەكى ەلدىڭ دوستىق ىستەرىنىڭ ءىزباسارلارى بار ەكەنىن كورىپ قاتتى قۋاندىم. ەكى جاق جاڭا داۋىردەگى اناعۇرلىم تىعىز جۇڭگو - پاكيستان تاعدىرلاس ورتاق تۇلعاسىن جەدەل قۇرىپ، ەكى ەلدىڭ بارلىق جاعدايدا بىردەي سەلبەستىگىندە اناعۇرلىم كوپ تابىستارعا قول جەتكىزىپ، ەكى ەل حالقىن اناعۇرلىم ويداعىداي باقىتقا كەنەلتىپ، ءوڭىردىڭ بەيبىتشىلىگى مەن ورنىقتىلىعىن جەبەۋگە ۇلەس قوسىپ، توڭىرەكتەگى تاعدىرلاس ورتاق تۇلعا قۇرۋعا ۇلگى كورسەتۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق پاكيستاننىڭ تاۋەلسىزدىگىن، يەلىك ۇقىعىن جانە تەرريتوريا تۇتاستىعىن قورعاۋىن باتىل قولدايدى، پاكيستان جاقپەن جوعارى جىكتەگىلەردىڭ بارىس - كەلىسىن ساقتاپ، ستراتەگيالىق قاتىناستى كۇشەيتىپ، ەكى ەل قاتىناسىنىڭ دۇرىس دامۋ بەتالىسىن يگەرۋدى قالايدى. ەكى جاق جۇڭگو - پاكيستان تاعدىرلاس ورتاق تۇلعاسىن قۇرۋ ارەكەت جوسپارىن تىڭعىلىقتى ىلگەرىلەتىپ، كەلەلى نىشاندىق ينجەنەريالار مەن ”شاعىن دا كوركەم“ حالىق تۇرمىسى نىساندارى قۇرىلىسىن ءبىر تۇتاس جوسپارلاپ، اۋىل شارۋاشىلىعى، كاسىپ سالاسى، جاساندى زەردە، دارىندىلاردى باۋلۋ سياقتى جان - جاقتى سەلبەستىكتى تەرەڭدەتۋى كەرەك. ەكى جاق اناعۇرلىم جوعارى دەڭگەيدەگى، اناعۇرلىم كەڭ سالاداعى حاۋىپسىزدىك سەلبەستىگىن ورىستەتىپ، ءوڭىردىڭ بەيبىتشىلىگى مەن ورنىقتىلىعىن بىرگە قورعاۋى كەرەك. جۇڭگو جاق پاكيستان جاقتىڭ ىرىقتىلىقپەن جاۋاپكەرشىلىك ارقالاپ، ورتا شىعىس ءوڭىرىنىڭ بەيبىتشىلىگىن قالپىنا كەلتىرۋدە اراعا ءجۇرۋ رولىن ساۋلەلەندىرگەندىگىن القايدى. ەكى جاق تىعىز قاتىناس پەن سايكەسۋدى ۇزدىكسىز ساقتاپ، سىڭار جاقتىلىق پەن قىرعي قاباقتىق وي جەلىسىنە بىرگە قارسى تۇرىپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن بىرگە ىلگەرىلەتۋى كەرەك.

شاھباز مىنالاردى ءبىلدىردى: ءتوراعا شي جينپيڭ — پاكيستان حالقىنىڭ ۇلى دوسى، سونداي - اق دۇنيە جۇزىندەگى بەيبىتشىلىكتى سۇيەتىن بارلىق حالىقتىڭ ۇلى دوسى. ءتوراعا شي جينپيڭنىڭ پارمەندى باسشىلىعىندا جۇڭگو ەكونوميكاسى دۇنيە ءجۇزىن جالت قاراتقان تابىستارعا قول جەتكىزىپ، دۇنيە ءجۇزىنىڭ بەيبىتشىلىگىن قورعاۋدى، كوپ ۇيەكتى دۇنيە ءجۇزىن قۇرۋدى بەرىك كەپىلمەن قامدادى. پاكيستان مەن جۇڭگونىڭ اينىماس دوستىعىن ەكى ەلدىڭ اعا بۋىن باسشىلارى ءوز قولدارىمەن سومدادى، ۋاقىت وتكەن سايىن بەكەمدەلىپ، تەڭدەسسىز بولدى. پاكيستان جاق ءبىر جۇڭگو پرينسيبىن باتىل اتقارادى، جۇڭگونىڭ وزەكتى مۇددەسىنە ساياتىن ماسەلەلەردە جۇڭگو جاقتىڭ تۇرعىسىن باتىل قولدايدى، ماڭگى جۇڭگونىڭ جاقسى دوسى، جاقسى سەرىگى بولادى. پاكيستان جاق جۇڭگو جاقپەن بىرگە ديپلوماتيالىق قاتىناس ورناتۋدىڭ 75 جىلدىعىن قۇتتىقتاپ، جۇڭگونىڭ ەل باسقارۋ تاجىريبەلەرىن ۇيرەنىپ، ”ءبىر بەلدەۋ، ءبىر جول“ سەلبەستىگىن تەرەڭدەتىپ، جۇڭگو - پاكيستان ەكونوميكالىق ءدالىزى قۇرىلىسىن ىلگەرىلەتىپ، پاكيستان - جۇڭگو قاتىناسىنىڭ ۇزدىكسىز العا دامۋىنا مۇمكىندىك جاساپ، ەكى ەل حالقىن باقىتقا كەنەلتۋدى قالايدى. جۇڭگو جاقتىڭ پاكيستان جاقتىڭ ا ق ش - يران كەلىسسوزىنە جاراستىرۋشى بولعاندىعىن قولداعانىنا العىس ايتامىن. ءتوراعا شي جينپيڭنىڭ ورتا شىعىس جاعدايى جونىندە العا قويعان 4 ءتۇرلى قۋاتتاماسى — بەيبىتشىلىكتى جۇزەگە اسىرۋدىڭ جەتەكشىلىك سيپاتتى جوباسى. پاكيستان جاق جۇڭگو جاقپەن تىعىز سايكەسىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە بىرگە ۇلەس قوسۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى