دامىپ جاتقان جۇڭگو | تىڭ جاڭالىقتاردى بايقاۋ: روبوتتىڭ جاڭا قولدانىلىمدارىنىڭ سىرىن اشۋ 

ەرەكشە يقۋاتتى روبوتتار الەمى. حالىق تورابىنىڭ ءتىلشىسى ليۋ بين فوتوسى

”ول شىنىمەن دە ءسىزدى جەڭە الا ما؟“، ”سىناپ كورسەك بىلەمىز“. حۋنان ولكەسى چاڭشا اۋدانى شياڭلۇڭ مالىسىندەگى ”مەيلين كەڭىستىگىندە“ ءبىر اتاي ورىندىققا وتىرا قالعاندا، قارسى جاعىنداعى روبوت مەحانيكالىق بىلەگىن سوزىپ، قورشاما دويبىنىڭ ءبىر تال قارا تاسىن شەبەرلىكپەن قىسىپ ۇستادى. ”تىرىس“ ەتكەن دىبىس اپ – انىق ەستىلىپ، دويبى تاسى دويبىنىڭ سەنترىنە قويىلدى — قورشاما دويبى ويىنى رەسمي باستالىپ كەتتى.

”مەيلين كەڭىستىگى“ — شياڭلۇڭ ءمالىسى بىرگە كوركەيتۋ، بىرگە باسقارۋ، بىرگە يگىلىكتەنۋ ۇلگىسىندە الەۋمەتتىك اۋماقتاعى بوس تۇرعان ءۇيدى پايدالانىپ جاساعان جاڭا تيپتى الەۋمەتتىك قىزمەت وتەۋ كەڭىستىگى. قىزمەتكەر حۋاڭ يۇيتيڭنىڭ تانىستىرۋىنشا، بۇل روبوت شاحمات، قورشاما دويبى، بەس تاستى دويبى ويناي الادى. ”اپتا سوڭى بولسا بولعانى، كوپتەگەن قارتتار مەن بالالار وسى اراعا كەلىپ، تالاسا – تارماسا جاساندى زەردەمەن دويبى ويناۋ باسەكەسىنە تۇسەدى، ادام كوپ بولعان كەزدە، اۋەلى الدىن – الا تاپسىرىس بەرىپ وشىرەتكە تۇرۋعا تۋرا كەلەدى“.

حۋاڭ يۇيتيڭ تىلشىگە: ”بۇرىن روبوتتى تەك تەلەۆيزوردا، زاۆوتتاردا عانا بولادى، جاي جۇرتشىلىقتىڭ ومىرىنەن تىم شالعاي دەپ سەزىنەتىنبىز، كۇندەلىكتى تۇرمىسىمىزدا كەزدەستىرۋىمىز وسىنشاما تەز بولادى دەپ ويلاماپپىز“، - دەدى. بيىل 5 – ايدىڭ باس شەنىندە، ول قىزمەتتەستەرىمەن بىرگە چاڭشا اۋدانىنداعى ”ەرەكشە يقۋاتتى روبوتتار الەمىنە“ بارعاندا، دويبى ويناي الاتىن وسى روبوتتى كوزى شالادى. ”ول كەزدە تەك جاي عانا ارالاپ كورۋگە بارعانبىز، ءبىراق سىناپ كورگەننەن كەيىن، ونىڭ وتە زەردەلى ەكەنىن، ىقپالداستىق يقۋاتى جاقسى ەكەنىن، وتە قىزىقتى ەكەنىن بايقادىق“، - دەيدى ول.

حۋناندا، بۇل بارعان سايىن كوپتەگەن جاي ادامدار جاقىن ارالاسا الاتىن روبوت كاسىبىنىڭ جاڭا فورماسىنا اينالدى — تەحنيكانى جاساي الۋ قولىمىزدان كەلۋمەن بىرگە، ونى جۇرتشىلىققا تۇسىنىكتى، جۇرتشىلىق پايدالانا الاتىن ەتىپ جاساۋىمىز كەرەك.

جۇڭگو شيپاگەرلىگى بويىنشا دەنساۋلىققا قاتىستى قىزمەت وتەيتىن روبوت ”كورۋ، ەستۋ، سۇراۋ، ۇستاۋ“ تاسىلدەرىن قولدانىپ دياگنوز قويۋدا. حالىق تورابىنىڭ ءتىلشىسى ليۋ بين فوتوسى

قىزمەتكەرلەر وتباسىندا پايدالاناتىن زەردەلى روبوتتاردىڭ يقۋاتتارىن رەتتەۋدە. حالىق تورابىنىڭ ءتىلشىسى ليۋ بين فوتوسى

چاڭشا اۋدانىنداعى بيىل 2 – ايدا اشىلعان ”ەرەكشە يقۋاتتى روبوتتار الەمى“ 5000 شارشى مەترگە جۋىق كەڭىستىككە ءجۇز نەشە ءتۇرلى روبوتتى شوعىرلاندىرىپ، 50 دەن استام قولدانىس كۇيىن جۇيەلى تۇردە كورسەتكەن: وتكىزگىشتى بىلەككە تاعۋ ارقىلى ”جۇڭگو شيپاگەرلىگىنە جەتىك روبوتقا“ تامىر ۇستاتىپ، دياگنوز قويدىرۋعا، دەنساۋلىق جاعدايى تۋرالى مالىمەتتى شىعارتىپ الۋعا، وعان قوسا دەنساۋلىقتى رەتتەۋ تۋرالى جوباعا دا قول جەتكىزۋگە بولادى؛ ءبي ساحناسىندا روبوتتار وركەسترىنىڭ كەرەمەت ويىن نومىرلەرى ادامدى تىڭ اسەرگە بولەيدى… دۇكەن جاۋاپتىسى فاڭ يجىڭنىڭ تانىستىرۋىنشا، ادام ەڭ كوپ بولعاندا، دۇكەن ءبىر كۇندە 10 نەشە ۇجىمدى قابىلداعان. ينتەرنەتتە ولار ”ءبىر بەكەتتىك فورماداعى تاپسىرىسپەن مايعا الىپ تيجارات جۇرگىزۋ تەكشەسىن“ دە ىسكە قوسقان.

وسىنداي ”الدىمەن سىناپ كورىپ، سوڭىنان ساتىپ الۋ، جالعا الۋ، تاپسىرىسپەن جاساتۋ“ سىندى دۇكەن ۇلگىسى جاي ادامداردىڭ روبوتتان پايدالانۋىنا قويىلاتىن تالاپتى تومەندەتتى.

كوزبەن كورىپ، قولمەن ۇستاۋعا بولاتىن ءبىرقىدىرۋ پايدالانۋ فورمالارىنىڭ استارىنان حۋناندا العاشقى قادامدا قالىپتاسقان روبوت كاسىبىنىڭ قۋاتى بايقالادى.

روبوت فۋتبول تەبۋدە. حالىق تورابىنىڭ ءتىلشىسى ليۋ بين فوتوسى

چاڭشا ەكونوميكالىق كوركەيتۋ رايونىنداعى حۋنان زەردەلى دەنە جاعىندا جاڭالىق اشۋ ورتالىعىندا كۇن سايىن ءتۇرلى تيپتەگى روبوتتار ەلىكتەمەلى ورتادا جاتتىعۋدان وتكىزىلۋدە: ولار جاسىل الاڭدا فۋتبول ويناپ، زات سورەسىنىڭ الدىندا زاتتى تانۋ جانە ۇستاۋدى ۇيرەنىپ، قوناق ۇيدە تازالىق ىستەپ، قارتتاردى كۇتىمدەپ، بالالارعا قارايدى. اتالعان ورتالىقتىڭ تەحنيكالىق جاۋاپتىسى: ”وسى تەكتەس جاعدايلارعا باۋلۋ ارقىلى، روبوتتىڭ ديناميكالىق تەپە – تەڭدىگى، سەلبەسۋ ءتاسىلى قاتارلى شەشۋشى تەحنيكالارىن ءتۇيىندى تۇردە سىناقتان وتكىزىپ، ساندى مالىمەتتەردى جيناپ، ولاردى بارعان سايىن زەردەلى ەتەمىز“، – دەپ تانىستىردى.

قازىرگە دەيىن، حۋنانداعى جاساندى زەردە كاسىبى سالاسىنداعى وزەكتى كاسىپورىنداردىڭ سانى 400 دەن اسىپ، 2025 – جىلعى كاسىپ كىرىسى شامامەن 85 ميلليارد يۋان بولعان؛ بۇكىل ولكە بويىنشا مەملەكەتتىك دەڭگەيدەگى زەردەلى جاساۋ سالاسىندا ۇلگى كورسەتەتىن زاۆودتاردىڭ سانى 24، تاڭداۋلى كورىنىستەردەن 69 ورىن جەتىلدىرىلگەن؛ ولكە كولەمىندەگى 11 ءىرى مودەل مەملەكەتتىك تىزىمدەۋدەن وتكەن، سانى ورتا بولىكتەگى ءوڭىر بويىنشا ءبىرىنشى ورىندا تۇر.

الەۋمەتتىك اۋماقتاعى دويبى ويناي الاتىن روبوتتان، ”قاجەتىنە قاراي ارنايى جاساۋعا بولاتىن“ سىناپ كورۋگە ارنالعان دۇكەنگە دەيىن، ودان ”زەرتتەۋ – جاساۋ – قولدانۋ – قىزمەت وتەۋدى“ قامتىعان زەردەلى روبوت تىزبەگىنە دەيىن، پايدالانۋشىنىڭ الاتىن اسەرىن نەگىزگى ورىنعا قوياتىن روبوت تۇتىنۋعا قاتىستى جاڭا كاسىپ كۇيى حۋناندا ءوسىپ – وركەندەپ، جاي ادامداردىڭ تۇرمىسىنا دا بىرتىندەپ قادام تاستاپ كەلەدى. (ءتىلشىلەر: كۋان يىڭ، ليۋ بين، ۋ شيۋەي، شياڭ يۇي)

حۋنان زەردەلى دەنە جاعىندا جاڭالىق اشۋ ورتالىعىنىڭ كورمەگە ارنالعان سورەسىندەگى مەحانيكالىق قول. حالىق تورابىنىڭ ءتىلشىسى ليۋ بين فوتوسى

روبوتتاردان قۇرالعان وركەسترى. حالىق تورابىنىڭ ءتىلشىسى ليۋ بين فوتوسى

بوكس باسەكەسىنىڭ ساحناسىندا تۇرعان روبوت. حالىق تورابىنىڭ ءتىلشىسى ليۋ بين فوتوسى

كەلۋ قاينارى: حالىق تورابى