شي جينپيڭ بەلورۋسسيانىڭ زۇڭتۇڭى لۋكاشەنكومەن كەزدەستى

6 - ايدىڭ 29 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە بەلورۋسسيانىڭ زۇڭتۇڭى لۋكاشەنكومەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگى، 6 - ايدىڭ 29 - كۇنى، بەيجيڭ (ءتىلشى سۇن ي). 6 - ايدىڭ 29 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە بەلورۋسسيانىڭ زۇڭتۇڭى لۋكاشەنكومەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن بەلورۋسسيا − ءوزارا سەنىم ارتىپ، قولداۋ كورسەتىپ كەلە جاتقان ناعىز دوستار، بىرگە دامىپ، گۇلدەنگەن جاقسى سەرىكتەر، بارلىق جاعدايدا بىردەي جان - جاقتى ستراتەگيالىق سەرىكتەر. جۇڭگو - بەلورۋسسيا قاتىناسى حالىقارالىق اۋمالى - توكپەلى جاعدايدىڭ سىنىنان ءوتىپ، سوڭعى جىلدارى قارىشتاپ دامۋدى جۇزەگە اسىرىپ، تاريحتاعى ەڭ جاقسى مەزگىلگە ءوتتى. ەكى جاقتىڭ ساياسي ءوزارا سەنىمدىلىگى بولاتتاي بەرىك، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدىڭ ناتيجەسى سۇبەلى بولدى، ءتۇيىندى سەلبەستىك نىساندارى تىڭعىلىقتى ىلگەرىلەپ، كوپ جاقتى سەلبەستىك ناتيجەلى بولدى. اماليات جۇڭگو مەن بەلورۋسسيانىڭ بارلىق جاعدايدا بىردەي، جان - جاقتى ىستەستىكتى تەرەڭدەتۋى تاريحتىڭ دامۋ اعىمىنا ۇيلەسەتىندىگىن، ەكى ەل حالقىنىڭ ءتۇبىرلى مۇددەسىنە ۇيلەسەتىندىگىن دالەلدەدى.

شي جينپيڭ مىنالاردى باسا دارىپتەدى: جۇڭگو مەن بەلورۋسسيا ستراتەگيالىق بايلانىستى ساقتاپ، ەكى جاقتى قاتىناستىڭ جوعارى دەڭگەيدە ۇزدىكسىز دامۋىن ىلگەرىلەتىپ، ەكى ەل حالقىنا ءتىپتى جاقسى باقىت جاراتۋى كەرەك. جۇڭگو جاق بەلورۋسسيا جاقتىڭ مەملەكەتتىڭ يەلىك ۇقىعىن، تاۋەلسىزدىگىن جانە تەرريتوريا تۇتاستىعىن قورعاۋىن، ءوزىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، بەلورۋسسيانىڭ دامۋى مەن قۇرىلىسىنا شاماسىنىڭ جەتىسىنشە ۇزدىكسىز كومەك بەرۋدى قالايدى. ەكى ەل ءار جاقتاعى بايلىقتى جۇمىلدىرىپ، ”ءبىر بەلدەۋ، ءبىر جول“ قۇرىلىسىن ىلگەرىلەتىپ، ناقتى سەلبەستىكتىڭ مازمۇنىن بايىتۋى كەرەك. جۇڭگو جاق بەلورۋسسيا جاقپەن ادامزاتتىڭ تاعدىرلاس ورتاق تۇلعاسىن قول ۇستاسا بىرگە قۇرىپ، 4 ۇلكەن دۇنيە جۇزىلىك باستامانى امالياتتا ايگىلەپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى مەحانيزم اياسىنداعى سەلبەستىك پەن سايكەستىكتى كۇشەيتىپ، اۋمالى - توكپەلى دۇنيە جۇزىندەگى ورنىقتى كۇش بولۋدى قالايدى.

لۋكاشەنكو مىنالاردى ءبىلدىردى: ءتوراعا شي جينپيڭنىڭ ەكى ەل قاتىناسى جونىندەگى باعاسىن بۇكىلدەي قۇپتايمىن. جۇڭگو − بەلورۋسسيانىڭ بارلىق جاعدايدا بىردەي ستراتەگيالىق سەرىگى، ەكى ەلدىڭ ناقتى سەلبەستىگى جاپپاي تەرەڭدەپ، بەلورۋسسيانىڭ ەكونوميكاسىنىڭ، قوعامىنىڭ دامۋىنا ماڭىزدى قولداۋ كورسەتتى.

بەلورۋسسيا جاق جۇڭگومەن قاتىناسىنا ايرىقشا ءمان بەرەدى، جۇڭگو جاقپەن ستراتەگيالىق بايلانىستى كۇشەيتىپ، سەلبەستىك سالاسىن كەڭەيتىپ، ەكى ەل قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى ءۇمىت ەتەدى. ءتوراعا شي جينپيڭ دۇنيە جۇزىلىك 4 ءىرى باستامانى العا قويىپ، قولامتالى ماسەلەلەردى ساياسي جولمەن شەشۋدى ىلگەرىلەتىپ، دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە ماڭىزدى ۇلەس قوستى. بەلورۋسسيا جاق جۇڭگو جاقپەن حالىقارالىق، وڭىرلىك ىستەر جونىندە ۇزدىكسىز تىعىز سايكەسۋدى ساقتاپ، دۇنيە ءجۇزىنىڭ جانە ءوڭىردىڭ بەيبىتشىلىگىن، دامۋىن، ورنىقتىلىعىن بىرگە جەبەۋدى قالايدى.

ۋاڭ ي كەزدەسۋدە بىرگە بولدى.