شي جينپيڭ جەكە ـ جەكە تايلاند زۇڭليىمەن، كامبودجا باس ۋازىرىمەن، بىرلەسكەن مەملەكەتتەر ۇيىمىنىڭ باس حاتشىسىمەن كەزدەستى

شينحۋا اگەنتتىگىنىڭ 7 ـ ايدىڭ 17 ـ كۇنى شاڭحايدان بەرگەن حابارى (تىلشىلەر لۋ ۋىنجۇن، سۇن نان). 7 ـ ايدىڭ 17 ـ كۇنى تۇستەن كەيىن مەملەكەت ءتوراعاسى شي جينپيڭ شاڭحاي شيجياۋ قوناق ۇيىندە 2026 ـ جىلعى دۇنيە جۇزىلىك جاساندى زەردە جينالىسىنا جانە جاساندى زەردەنى الەمدىك باسقارۋ جوعارى دارەجەلىلەر ماجىلىسىنە قاتىناسۋ ءارى رەسمي ساپاردا بولۋ ءۇشىن جۇڭگوعا كەلگەن تايلاند زۇڭليى انۋتينمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن تايلاندتىڭ دوستىعى ۇزاققا جالعاسىپ، ۋاقىت وتكەن سايىن بەكەمدەلە ءتۇستى. ەكى جاق ءبىر ـ بىرىنە شىنايى مامىلە جاساپ، شىن جۇرەكپەن دوستاسىپ، ”جۇڭگو مەن تايلاند ءبىر ءۇيلى جانداي ەتەنە“ دوستىق سۇيىسپەنشىلىگىن ورناتتى. جۇڭگو جاق جۇڭگو _ تايلاند قاتىناسىن دامىتۋدى توڭىرەكتىك ديپلوماتيانىڭ ماڭىزدى ورنىنا قويىپ، باستان ـ اياق تايلاندتىڭ سەنىم ارتۋعا بولاتىن، سۇيەنە الاتىن ستراتەگيالىق سەلبەستىك سەرىگى بولىپ كەلدى. جۇڭگو _ تايلاند ەكى جاق ستراتەگيالىق ءوزارا سەنىمدىلىكتى ونان ارى نىعايتىپ، ستراتەگيالىق ىستەستىكتى كۇشەيتىپ، سىن ـ سايىستارعا قول ۇستاسا توتەپ بەرىپ، اناعۇرلىم ورنىقتى، اناعۇرلىم گۇلدەنگەن، اناعۇرلىم باياندى جۇڭگو _ تايلاند تاعدىرلاس ورتاق تۇلعاسىن جەدەل قۇرىپ، ەكى ەلدىڭ وزدەرىنىڭ وسىزاماندانۋ اياق الىسىنا دەم بەرىپ، ءوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋگە بەلسەندى ۇلەس قوسۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق تايلاندتىڭ ءوز مەملەكەت جاعدايىنا ۇيلەسەتىن دامۋ جولىمەن ويداعىداي ءجۇرۋىن باتىل قولدايدى، تايلاند جاڭا ۇكىمەتىنىڭ ءساتتى بيلىك جۇرگىزۋىن قولدايدى. كۇردەلى دە تەرەڭ وزگەرىس بولعان حالىقارالىق جاعداي الدىندا، جۇڭگو _ تايلاند ەكى جاق جوعارى جىكتەگىلەر بارىس ـ كەلىسىن جيىلەتىپ، ەكى ەلدىڭ سىرتقى ىستەر مينيسترلەرى، قورعانىس مينيسترلەرى ”2 + 2“ ستراتەگيالىق تىلدەسۋ مەحانيزمىنەن ويداعىداي پايدالانىپ، ستراتەگيالىق ىستەستىكتىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋى كەرەك. جۇڭگو _ تايلاند تەمىر جولى قۇرىلىسى مەن جۇڭگو _ لاوس _ تايلاند تەمىر جولىنىڭ ۇلاسۋىن، تۇتاسۋىن جەدەل ىلگەرىلەتىپ، جاساندى زەردە، اۆياتسيا ـ عارىش، تازا ەنەرگيا سياقتى جاڭادان گۇلدەنگەن سالالارداعى سەلبەستىكتى كەڭەيتۋ كەرەك. ساياحات، مەديا، وقۋ ـ اعارتۋ سياقتى سەلبەستىكتى كۇشەيتىپ، ەكى ەل حالىق جۇرتشىلىعىنىڭ بارعان سايىن ەتەنە بولۋىن ىلگەرىلەتۋ كەرەك. ينتەرنەتتە قۇمار ويناۋ، تەلەگراف الدامكوستىگى سياقتى شەكارا اتتاعان قىلمىستارعا ۇزدىكسىز كۇش سالا سوققى بەرىپ، ەكى ەلدىڭ ناقتى ىستەر سەلبەستىگى مەن ادامداردىڭ بارىس ـ كەلىسىنە حاۋىپسىز ورتا جاراتۋ كەرەك. جۇڭگو جاق تايلاند جاقتىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى، تايلاند جاقپەن ازيا _ تىنىق مۇحيت ەكونوميكالىق سەلبەستىك ۇيىمى، جۇڭگو _ شىعىس وڭتۇستىك ازيا ەلدەرى وداعى، لانساڭجياڭ _ مەكونگ سەلبەستىگى سياقتى كوپ جاقتى مەحانيزمدەگى سايكەسۋ مەن سەلبەسۋدى جيىلەتۋدى قالايدى. تايلاند پەن كامبودجانىڭ شەكارا تالاس ـ تارتىسىن ۇيلەسىمدى ءبىر جاقتى ەتۋ تايلاند _ كامبودجا ەكى ەل حالقىنىڭ ورتاق جانە ۇزاق بولاشاقتىق مۇددەسىنە ۇيلەسەدى، ەكى جاقتىڭ تىلدەسۋگە، كەڭەسۋگە تاباندى بولىپ، تالاس ـ تارتىستى بەيبىت جولمەن شەشۋىن ءۇمىت ەتەمىن، جۇڭگو جاق وسى ءۇشىن ۇزدىكسىز سىندارلى رول اتقارۋدى قالايدى.

انۋتين مىنالاردى ءبىلدىردى: زۇڭلي رەتىندە، تۇڭعىش رەت جۇڭگوعا رەسمي ساپارلاي كەلگەنىمە وتە قۋانىشتىمىن، جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قىزۋ قۇتتىقتايمىن. جۇڭگو ەجەلدەن تايلاندتىڭ ارقا سۇيەيتىن، سەنىم ارتاتىن جاقسى دوسى، ەكى ەل باستان ـ اياق ءوزارا قۇرمەت ەتىپ، ءوزارا سەنىم ارتىپ، ءوزارا قولداۋ كورسەتىپ كەلەدى، تايلاند جاق ءبىر جۇڭگو ساياساتىن باتىل اتقارادى. تايلاند جاق جۇڭگومەن قاتىناسىن تەرەڭدەتۋگە كۇش سالىپ، جوعارى جىكتەگىلەردىڭ بارىس ـ كەلىسىن جيىلەتىپ، ساۋدا، قارجى قوسۋ، جوعارى، جاڭا تەحنولوگيا، ۇلاستىرۋ ـ تۇتاستىرۋ سياقتى كوپ سالاداعى ناقتى ىستەر سەلبەستىگىن كەڭەيتىپ، ينتەرنەتتە قۇمار ويناۋعا، تەلەگراف الدامكوستىگىنە بىرگە سوققى بەرىپ، جاساندى زەردەنى الەمدىك باسقارۋ سەلبەستىگىن ورىستەتىپ، تايلاند پەن جۇڭگونىڭ جاپپاي ستراتەگيالىق سەلبەستىك سەرىكتەستىك قاتىناسىنىڭ ەكى ەل حالقىن اناعۇرلىم ويداعىداي باقىتقا كەنەلتۋىنە مۇمكىندىك جاسايدى. ءتوراعا شي جينپيڭ ءتورت ۇلكەن الەمدىك باستامانى العا قويىپ، كوپ جاقتىلىق جونىندەگى ۋادەسىن ايگىلەدى، تايلاند جاق بەلسەنە قولدايدى. تايلاند جاق جۇڭگو جاقپەن سايكەسۋ مەن سەلبەسۋدى كۇشەيتىپ، ءوڭىر مەن دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋدى قالايدى. تايلاند جاق تايلاند _ كامبودجا قاقتىعىسىن بەيبىت جولمەن شەشۋگە كۇش سالادى، جۇڭگو جاقتىڭ وسى ءۇشىن ءادىل، ادىلەتتى رول اتقارعاندىعىن القايدى.

ساي چي، ديڭ شۋەشياڭ، ۋاڭ ي، چىن جينيڭ قاتارلىلار كەزدەسۋگە قاتىناستى.

شينحۋا اگەنتتىگىنىڭ 7 ـ ايدىڭ 17 ـ كۇنى شاڭحايدان بەرگەن حابارى (تىلشىلەر فىڭ شينران، گۇڭ ۋىن). 7 ـ ايدىڭ 17 ـ كۇنى تۇستەن كەيىن مەملەكەت ءتوراعاسى شي جينپيڭ شاڭحاي شيجياۋ قوناق ۇيىندە 2026 ـ جىلعى دۇنيە جۇزىلىك جاساندى زەردە جينالىسىنا جانە جاساندى زەردەنى الەمدىك باسقارۋ جوعارى دارەجەلىلەر ماجىلىسىنە قاتىناسۋ ءارى قىزمەت ساپارىندا بولۋ ءۇشىن جۇڭگوعا كەلگەن كامبودجا باس ءۋازىرى حۇڭمانايمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو _ كامبودجا ەكى ەل قيىندىقتى بىلەك بىرىكتىرە جەڭىپ، ءبىر ـ بىرىنە قارايلاسىپ، مىزعىماس دوستىعى جىلداردىڭ سىنىنان جانە بوران ـ شاشىننىڭ سىناعىنان ءوتتى. تاريح جۇڭگو _ كامبودجا دوستىعى ءمالىم ۋاقىت، ءمالىم ءىس سەبەبىنەن ورناتىلعان قاتىناس ەمەس، قايتا اۋمالى ـ توكپەلى وزگەرىستەن ءوتىپ، ۇرپاقتان ـ ۇرپاققا جالعاسىپ كەلە جاتقان ورتاق تانىم بولىپ، ەكى جاقتىڭ ورتاق باعالى بايلىعى ەكەندىگىن دالەلدەدى. ەكى جاق ەكى ەلدىڭ اعا بۋىن باسشىلارى ورناتقان مىزعىماس دوستىقتى جالعاستىرىپ، ستراتەگيالىق ءوزارا سەنىمدىلىكتى نىعايتىپ، ىنتىماقتاسا ىستەستىك جاساۋدى جيىلەتىپ، ”الماستىڭ التى قىرى“ سەلبەستىگى مازمۇنىن بايىتىپ، جاڭا داۋىردەگى بارلىق جاعدايدا بىردەي جۇڭگو _ كامبودجا تاعدىرلاس ورتاق تۇلعاسى قۇرىلىسىنىڭ ۇزدىكسىز اناعۇرلىم جوعارى دەڭگەيگە كوتەرىلۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋى كەرەك.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى پارتيانى باسقارۋدىڭ، پارتيانى جونگە سالۋدىڭ، پارتيانى گۇلدەندىرۋدىڭ، پارتيانى قۇدىرەتتەندىرۋدىڭ ۇلى امالياتى بارىسىندا جاڭا داۋىردەگى پارتيا قۇرىلىسى يدەياسىن قالىپتاستىرىپ، جۇڭگو ۇلگىسىندەگى وسىزامانداندىرۋ قۇرىلىسىنىڭ تەلەگەي ۇلى كۇشىن ۇزدىكسىز ۇيىستىرادى. بيىل _ كامبودجا حالىق پارتياسى قۇرىلعاندىعىنىڭ 75 جىلدىعى، جۇڭگو جاق كامبودجا جاقپەن پارتيانى باسقارۋ، مەملەكەتتى باسقارۋ تاجىريبەلەرىن اۋىستىرۋدى كۇشەيتىپ، جاڭا داۋىردەگى جۇڭگو _ كامبودجا دوستىق سەلبەستىك جولىمەن باتىل ويداعىداي ءجۇرۋدى قالايدى. ەكى جاق جۇڭگو مەن كامبودجا ۇكىمەتتەر ارا سايكەستىرۋ كوميتەتىنىڭ رولىن ساۋلەلەندىرىپ، ”ونەركاسىپتى دامىتۋ ءدالىزى“ مەن ”بالىق، كۇرىش ءدالىزى“ قۇرىلىسىن جەدەلدەتىپ، ەلەكتر قۋاتى، اۋىل شارۋاشىلىعى سياقتى ءداستۇرلى كاسىپ سالاسىن ساپالىلاندىرىپ، جاساندى زەردە، سيفرلى ەكونوميكا سياقتى جاڭادان گۇلدەنگەن كاسىپ سالالارىن جەتىلدىرىپ، كامبودجانىڭ مەملەكەت جوسپارى مەن حالىق تۇرمىسىنا ءتيىمدى نەگىزدىك قۇرىلعى قۇرىلىسى نىساندارىن ءبىر تۇتاس جوسپارلاپ ىلگەرىلەتۋى كەرەك. جۇڭگو مەن كامبودجانىڭ ديپلوماتيا، مەملەكەت قورعانىسى، قوعام حاۋىپسىزدىگى ”3+3“ ستراتەگيالىق تىلدەسۋ مەحانيزمىنەن ويداعىداي پايدالانىپ، جالعان تاۋار جاساۋ، اتكەزشىلىك، ينتەرنەتتە قۇمار ويناۋ، تەلەگراف الدامكوستىگى سياقتى شەكارا اتتاعان قىلمىستارعا بىرلەسىپ قاتاڭ سوققى بەرىپ، ورتاق مۇددە مەن حاۋىپسىزدىكتى ويداعىداي قورعاۋى كەرەك. جۇڭگو جاق كامبودجا جاقپەن بىرگە ءتورت ۇلكەن الەمدىك باستامانى تياناقتاندىرۋدى ىلگەرىلەتىپ، اناعۇرلىم ءادىل، ۇيلەسىمدى الەمدىك باسقارۋ جۇيەسىن ورناتۋدى ىلگەرىلەتۋدى قالايدى. كامبودجا مەن تايلاندتىڭ سوعىس توقتاتۋ جاعدايىن بەكەمدەۋ، ءوزارا سەنىمدىلىكتى بىرتىندەپ ورناتۋ ەكى ەلدىڭ ءتۇبىرلى جانە ۇزاق بولاشاقتىق مۇددەسىنە ۇيلەسەدى، جۇڭگو جاق كامبودجا مەن تايلاند ەكى جاقتىڭ تىلدەسۋ، كەلىسسوز وتكىزۋ ارقىلى شەشۋ جوباسىن تابۋىن قولدايدى، وسى ءۇشىن ۇزدىكسىز بەلسەندى رول اتقارۋدى قالايدى.

حۇڭماناي مىنالاردى ءبىلدىردى: جۇڭگونىڭ 2026 ـ جىلعى دۇنيە جۇزىلىك جاساندى زەردە جينالىسىن ءساتتى وتكىزگەندىگىن قۇتتىقتايمىن، ءتوراعا شي جينپيڭ العا قويعان ماڭىزدى ۇستانىم مەن دارىپتەمە جاساندى زەردەنى الەمدىك باسقارۋ جونىنەن ماڭىزدى ءمان الادى. كامبودجا مەن جۇڭگونىڭ جوعارى جىكتەگىلەرىنىڭ بارىس ـ كەلىسى جيىلەپ، ءار سالاداعى سەلبەستىگىنىڭ جەتىستىگى مول بولدى، جۇڭگو جاقتىڭ ۇزاق ۋاقىتتان بەرى، كامبودجانىڭ ەكونوميكالىق، قوعامدىق دامۋىنا قالتقىسىز قولداۋ كورسەتكەندىگىنە جانە كومەكتەسكەندىگىنە العىس ايتامىن. مەيلى حالىقارالىق جاعداي قالاي وزگەرسە دە، كامبودجا جاقتىڭ جۇڭگومەن دوستىق سەلبەستىگىن جيىلەتۋ ساياساتى استە وزگەرمەيدى، كامبودجا _ جۇڭگو تاعدىرلاس ورتاق تۇلعاسىن بىرگە قۇرۋعا بەلسەنە كۇش سالادى. كامبودجا جاق ءبىر جۇڭگو پرينسيبىن باتىل اتقارادى، جۇڭگو جاقپەن ءداستۇرلى دوستىقتى اسقاقتاتىپ، ەكى ەلدىڭ باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ساياسي ءوزارا سەنىمدىلىكتى تەرەڭدەتىپ، ەكى ەل ساۋداسىن كەڭەيتىپ، نەگىزدىك قۇرىلعى سياقتى كەلەلى نىساندار سەلبەستىگىن ورىستەتىپ، تەلەگراف الدامكوستىگىنە سوققى بەرۋ تەبىنىن ارتتىرىپ، ەكى ەل قاتىناسىن دامىتۋدا اناعۇرلىم كوپ جەتىستىكتەرگە قول جەتكىزۋدى ىلگەرىلەتۋدى قالايدى. كامبودجا جاق جۇڭگو جاقتىڭ بەلسەنە تاتۋلاسۋعا ءناسيحاتتاپ، كەڭەسۋدى جەبەپ، كامبودجا مەن تايلاندتىڭ شەكارا تالاس ـ تارتىسىن بەيبىت جولمەن شەشۋدى ىلگەرىلەتكەندىگىنە العىس ايتادى، كامبودجا جاق تىلدەسۋگە، كەلىسسوز وتكىزىپ، جاعدايدى باسەڭدەتۋگە تاباندى بولادى.

ساي چي، ديڭ شۋەشياڭ، ۋاڭ ي، چىن جينيڭ قاتارلىلار كەزدەسۋگە قاتىناستى.

شينحۋا اگەنتتىگىنىڭ 7 ـ ايدىڭ 17 ـ كۇنى شاڭحايدان بەرگەن حابارى (تىلشىلەر شاۋ يبو، جوۋ رۇي). 7 ـ ايدىڭ 17 ـ كۇنى تۇستەن كەيىن مەملەكەت ءتوراعاسى شي جينپيڭ شاڭحاي شيجياۋ قوناق ۇيىندە 2026 ـ جىلعى دۇنيە جۇزىلىك جاساندى زەردە جينالىسىنا جانە جاساندى زەردەنى الەمدىك باسقارۋ جوعارى دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن بىرلەسكەن مەملەكەتتەر ۇيىمىنىڭ باس حاتشىسى گۋتەررەسپەن كەزدەستى.

شي جينپيڭ بىلاي دەپ اتاپ كورسەتتى: گۋتەررەس مىرزا بىرلەسكەن مەملەكەتتەر ۇيىمىنىڭ باس حاتشىسى بولعان 10 جىلدان بەرى بىرلەسكەن مەملەكەتتەر ۇيىمىنا باسشىلىق ەتىپ، كوپ جاقتىلىقتى باتىل قورعاپ، كليمات وزگەرىسى سياقتى الەمدىك سىن ـ سايىستارعا بەلسەنە توتەپ بەرىپ، جاساندى زەردە سياقتى جاڭادان گۇلدەنگەن سالالارداعى الەمدىك باسقارۋدى ىلگەرىلەتىپ، بىرلەسكەن مەملەكەتتەر ۇيىمى رەفورماسىنىڭ اياق الىسىن باستادى، جۇڭگو جاق مۇنى جوعارى باعالايدى. بيىل _ جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەندىگىنىڭ 55 جىلدىعى. 55 جىلدان بەرى، جۇڭگو دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولۋعا تاباندى بولىپ، بىرلەسكەن مەملەكەتتەر ۇيىمىن باستان ـ اياق باتىل قولدادى. مەن ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن ءتورت ۇلكەن الەمدىك باستامانى العا قويدىم، مۇنداعى ماڭىزدى ءبىر وي _ بىرلەسكەن مەملەكەتتەر ۇيىمىنىڭ ورنى مەن بەدەلىن قورعاۋ. جۇڭگو جاق بىرلەسكەن مەملەكەتتەر ۇيىمىمەن سەلبەستىگىن بۇرىنعىداي تەرەڭدەتىپ، دۇنيە ءجۇزىنىڭ بەيبىتشىلىگى مەن دامۋ ىستەرىن جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەدى.

شي جينپيڭ بىلاي دەپ باسا دارىپتەدى: قازىر حالىقارالىق جاعدايدىڭ وزگەرىس پەن بىلىقپالىق بولعان ءبىر جاعى اناعۇرلىم كورنەكتىلەندى، ناعىز كوپ جاقتىلىقتى ونان ارى امالياتتا ايگىلەۋگە، بىرلەسكەن مەملەكەتتەر ۇيىمىنىڭ ورنى مەن رولىن قايتا سەرپىلتۋگە تۋرا كەلىپ وتىر. ءبىرىنشى، ادىلدىككە، تۋراشىلدىققا تاباندى بولۋ. ءاربىر مەملەكەت حالىقارالىق قوعامنىڭ تەرەزەسى تەڭ مۇشەسى، ءاربىر مەملەكەتتىڭ يەلىك ۇقىعى، تەرريتوريا تۇتاستىعى جانە زاڭدى ۇقىق ـ مۇددەسى قۇرمەتتەلۋى ءتيىس، دۇنيە ءجۇزىن ورمان قاعيداسى داۋىرىنە قايتارۋعا استە بولمايدى. ەكىنشى، تۋراشىلدىقتان اينىماي جاڭالىق اشۋعا تاباندى بولۋ. تۋراشىلدىقتان اينىماۋ دەگەنىمىز بىرلەسكەن مەملەكەتتەر ۇيىمى ۋستاۆىنىڭ باس ماقساتىنا بويسۇنىپ، دۇنيە جۇزىلىك 2 ـ سوعىس اياقتاعاننان كەيىن تۇراقتاندىرىلعان حالىقارالىق جۇيە مەن حالىقارالىق ەرەجەنى ويداعىداي قورعاۋ؛ جاڭالىق اشۋ دەگەنىمىز بىرلەسكەن مەملەكەتتەر ۇيىمىنىڭ جاعدايعا قاراي وزگەرۋىن ىلگەرىلەتىپ، ءوزىن ـ ءوزى جاڭالاۋعا باتىل بولىپ، ونان ارى ساپانى جوعارىلاتىپ ونىمدىلىكتى ارتتىرۋ. ءۇشىنىشى، جاۋاپكەرشىلىك ارقالاۋعا، ىسكەرلىك كورسەتۋگە تاباندى بولۋ. دۇنيە جۇزىندەگى 190 نەشە مەملەكەت تاعدىرلاس ۇلكەن كەمەدە وتىر، قيىندىقتى بىلەك بىرىكتىرە جەڭىپ، الەمدىك سايىستارعا قول ۇستاسا توتەپ بەرۋى كەرەك. ءىرى ەلدەر ءتىپتى دە كوپ جاۋاپكەرشىلىك ارقالاپ، ءتىپتى دە ۇلكەن ارنانى ايگىلەۋى كەرەك. جۇڭگو باستان ـ اياق ءىس جۇزىندىك ارەكەتى ارقىلى جاڭا داۋىردەگى ءىرى ەلدەردىڭ دۇرىس قارىم ـ قاتىناس جولى جونىندە ىزدەنىس جاساۋدى بەلسەنە ىلگەرىلەتىپ، دۇنيە جۇزىنە اناعۇرلىم كوپ ورنىقتىلىق جانە ايقىندىلىق ۇستەدى.

گۋتەررەس مىنالاردى ءبىلدىردى: ءتوراعا شي جينپيڭنىڭ پارمەندى باسشىلىعىندا، مەيلى حالىقارالىق جاعداي قانشاما قيىن، كۇردەلى بولسا دا، جۇڭگو باستان ـ اياق كوپ جاقتىلىقتى باتىل قولداپ، بىرلەسكەن مەملەكەتتەر ۇيىمىنىڭ ىستەرىن قولداپ، حالىقارالىق سەلبەستىكتى ىلگەرىلەتىپ، دۇنيە جۇزىنە ۇلگى ورناتتى. جۇڭگو دامۋدىڭ بىركەلكىسىزدىگىن تۇزەتۋگە، كليمات وزگەرىسىنە توتەپ بەرۋگە، جاساندى زەردەنىڭ ىزگىلىككە قاراي تالپىنۋىن ىلگەرىلەتۋگە، دامۋ پارقىن تولىقتاۋعا، ادىلدىك پەن ادىلەتتىلىكتى قورعاۋعا باستان ـ اياق كۇش سالىپ، ءبىر قىدىرۋ كەلەلى ۇستانىمدار مەن باستامالاردى العا قويدى، بۇل كىسىنى ءتانتى ەتەدى. بىرلەسكەن مەملەكەتتەر ۇيىمى جۇڭگو جاقپەن سەلبەستىكتى ۇزدىكسىز كۇشەيتىپ، سىڭار جاقتىلىققا، قورعامپازدىققا جانە وزبىرلىق پەن وكتەمدىككە قارسى تۇرىپ، بىرلەسكەن مەملەكەتتەر ۇيىمىنىڭ ۋستاۆى مەن حالىقارالىق زاڭدى قورعاپ، دۇنيە ءجۇزىنىڭ كوپ ۇيەكتەنۋ اياق الىسىن ىلگەرىلەتىپ، حالىقارالىق قوعامنىڭ ورتاق مۇددەسىن قورعايدى.

ساي چي، ديڭ شۋەشياڭ، ۋاڭ ي، چىن جينيڭ قاتارلىلار كەزدەسۋگە قاتىناستى.