دامىپ جاتقان جۇڭگو | شاعىن قىستاقتان ”مادەنيەت - ساياحات جاڭا باۋ – باقشاسىن“ جەتىلدىردى 

7 - ايداعى بەيشيڭ اۋىلى. حالىق تورابىنىڭ ءتىلشىسى شۇي چىڭلۇڭ فوتوسى

اۆتوموبيل حيلۇڭجياڭداعى بەيشيڭ قىستاعىنا جەتكەندە، تازا دا رەتتى قىستاق كورىنىسى كوزگە تۇسەدى: تەپ - تەگىس جول مەن ءتۇرلى مادەنيەت - ساياحات قۇرىلعىلارى سايالى اعاشتار مەن گۇل – بايشەشەكتەر اراسىنا ورنالاسقان، باۋ – باقشانىڭ جاڭاشا كورىنىستەرى مەن وسىزاماندانعان اۋىل – قىستاقتىڭ بەت - بەينەسى ۇشتاستىرىلعان، قونىستانۋعا جايلى، كورىكتى اۋىل – قىستاق كورىنىسى كوز سۇرىندىرەدى.

بەيشيڭ قىستاعى تيەلي قالاسىنان 18 كيلومەتر قاشىقتىقتا، اۋماعى 26.73 شارشى كيلومەتر، 16800 مۋ ەگىستىك جەرگە يە. بىرنەشە جىلدان بەرى، بەيشيڭ قىستاعى ىلگەرىندى - كەيىندى جۇڭگوداعى كورىكتى دەمالىس قىستاعى، مەملەكەتتىك اۋىل – قىستاق ساياحاتى سالاسىنداعى ءتۇيىندى قىستاق، مەملەكەتتىك ”بەرەكەلى اۋىل - قىستاق“ تىزىمدىگىندەگى ءجۇز ۇلگىلى قىستاقتىڭ ءبىرى، مەملەكەتتىك اۋىل - قىستاقتى جونگە سالۋ جاعىنداعى ۇلگىلى اۋىل - قىستاق قاتارلى كوپتەگەن داڭقتى اتاقتارعا يە بولعان.

بەيشيڭ قىستاعىنداعى كۇرىش اتىزى. حالىق تورابىنىڭ ءتىلشىسى شۇي چىڭلۇڭ فوتوسى

بەيشيڭ قىستاعىنداعى كۇرىش اتىزى. حالىق تورابىنىڭ ءتىلشىسى شۇي چىڭلۇڭ فوتوسى

بۇل قىستاقتاعى تۇراقتى تۇرعىن سانى شامامەن 300 ادام، بىرنەشە جىلدىق دامۋ ارقىلى، 2025 - جىلى قىستاقتىڭ كوللەكتيۆتىك ەكونوميكالىق كىرىسى ءبىر ميلليون 351 مىڭ 700 يۋانعا جەتىپ، اۋىل - قىستاقتى گۇلدەندىرۋ جاعىندا الىس – جاقىنعا ايگىلى ۇلگىلى قىستاققا اينالدى.

قازىرگى تاڭدا، بەيشيڭ قىستاعى تىرشىلىك تىنىسىنا تولى، الايدا ون نەشە جىلدىڭ الدىندا بۇل جەردىڭ جاعدايى باسقاشا ەدى.

1991 - جىلدان 2024 - جىلعا دەيىن، بەيشيڭ قىستاعىندا قانشالىق زور وزگەرىس بولدى دەيسىز - عوي، وسى ارادا 34 جىل قىزمەت ىستەگەن بەيشيڭ قىستاعى پارتيا ياچەيكاسىنىڭ شۋجيى سۇي شۋشىڭ: ”80 -, 90 - جىلدارى ءبىزدىڭ قىستاقتىڭ جاعدايى وتە مۇشكىل بولاتىن، ۇيلەردىڭ بارلىعى بالشىق پەن ساباننان سالىناتىن، جولدارى باتپاق بولعاندىقتان ءجۇرۋدىڭ ءوزى قيىن بولاتىن، اۆتوموبيلدى جۇرگىزگەندى قويىپ، ۆەلوسيپەت ءمىنۋدىڭ ءوزى وتە قيىن بولاتىن“.

بەيشيڭ قىستاعىنداعى جول نۇسقاۋ تاقتاسى. حالىق تورابىنىڭ ءتىلشىسى شۇي چىڭلۇڭ فوتوسى

بەيشيڭ قىستاعىنداعى ”كورشى اۋلا“. حالىق تورابىنىڭ ءتىلشىسى شۇي چىڭلۇڭ فوتوسى

سۇي شۋشىڭ بەيشيڭ قىستاعىنىڭ زور وزگەرىسىنە كۋا بولىپ قانا قويماي، وعان بەلسەنە قاتىناستى. ”كەيىن اۋىل - قىستاقتى گۇلدەندىرۋ، شارۋالاردى اۋقاتتاندىرۋ جونىندەگى ساياساتتار ۇزدىكسىز تياناقتاندىرىلدى، قىستاعىمىزداعى كادرلار باستاماشى بولىپ، دامۋدىڭ جولىن قاراستىردى، قىستاعىمىزدى كورىكتەندىرۋگە، قىستاق تۇرعىندارىن بايىتۋعا بار پەيىلىمەن كىرىستى“، - دەپ تانىستىردى سۇي شۋشىڭ. 1998 - جىلدان باستاپ، بەيشيڭ قىستاعى باستاماشىلدىقپەن وركەنيەتتى اۋىل - قىستاق قۇرۋعا كىرىسىپ، ”جول سالۋ، اعاش ەگۋ، ءتارتىپ ورناتۋ“ سىندى دامۋ وي جەلىسىنە تاباندى بولىپ، قىستاق ىشىندەگى جولداردى كەڭەيتىپ سالۋ جانە جوندەۋ، جول بويىنا اعاش ەگىپ قىستاقتى كورىكتەندىرۋ، اۋىل – قىستاقتى باسقارۋ ءتارتىبىن ارناعا ءتۇسىرۋ، تۇرعىنداردىڭ كىرىسىن ارتتىرۋ جولدارىن كەڭەيتۋ ارقىلى جۇرتشىلىقتىڭ تۇرمىس ساپاسىن ۇزدىكسىز جوعارىلاتتى.

نەگىزدىك قۇرىلعىلار جاعىنداعى ولقىلىقتى تولىقتاۋ ءۇشىن، بەيشيڭ قىستاعى ”ۇكىمەت ازىناۋلاق قارجى قوسۋ، قىستاق ازىناۋلاق قاراجات شىعارۋ، شارۋالاردان ازىناۋلاق قاراجات جيناۋ“ سىندى ”ءۇش ازىناۋلاق“ قۇرىلىس ۇلگىسىن قولدانىپ، قىستاق ىشىندەگى جولداردى شىڭايتۋدى، جاسىلداندىرۋدى، جارىقتاندىرۋدى، كورىكتەندىرۋدى، باقىلاۋ كامەرالارىمەن جانە سىمسىز Wi-Fi مەن تولىق قامتۋدى ىسكە اسىرعان. تەلەكوم جەلىلەرىن ىسكە قوسۋ جانە وعان وزگەرىس ەنگىزۋ، قوقسىق جيناۋ - جوتكەۋ پۋنكتى، ساياحاتشىلارعا ارنالعان دارەتحانا قاتارلى الەۋمەتتىك قۇرىلعىلاردى سالعان.

شيڭيۋە ساۋىق - سايران باقشاسى. سۋرەتتى تيەلي قالالىق پارتكومنىڭ ۇگىت ءبولىمى بەرگەن

2024 - جىلى قىستاق حالىقتىق قونالقى كاسىبىن تۇيىندە سىناق ەتەتىن قىستاق سىندى قۇرىلىس نىسانىن باستاعان، بوس تۇرعان تۇرعىن ۇيلەردى ىسكە قوسۋ، ولشەمدەندىرىپ دارەجەسىن جوعارىلاتۋ، بازارعا بەيىمدەلگەن كاسىپتىك باسقارۋ سىندى دامۋ جولى ارقىلى 3600 شارشى مەترلىك حالىقتىق قونالقى كەشەنىن سالدى. سونىمەن بىرگە، شيڭيۋە ساۋىق - سايران باقشاسى، شيڭيۋە تۇزگى تۇراق رايونى، سۋ بويىنداعى دەمالىس رايونى، VR ارقىلى سەزىنۋ زالى قاتارلى مادەنيەت - ساياحات قۇرىلعىلارىن سالعان. مادەنيەت - ساياحات كاسىبىن دامىتۋ ارقىلى، قىستاقتاعى بوس تۇرعان بايلىق قاينارىن ”كىرىستى ارتتىرۋدىڭ قاينارىنا“ اينالدىرعان.

بۇرىنعى نەگىزدىك قۇرىلعىلارى مەشەۋ ءارى ەسكىرگەن قىستاق، قازىرگى تاڭدا، سايكەستى قۇرىلعىلارى كەمەلدەنگەن، تازا دا رەتتى ءارى قونىستانۋعا جايلى بولىپ، اۋىل - قىستاق ساياحاتىنىڭ كوتەرىمدىلىگى مەن جۇرتشىلىقتىڭ تۇرمىس ساپاسى بىردەي جوعارىلاعان.

قىستاقتا شىلدەنىڭ سالقىن سامالى ەسەدى، رەتتى دە تازا قىستاق جولى، دۋماندى مادەنيەت - ساياحات الاڭى، تىرشىلىك تىنىسىنا تولى اۋىل كەلبەتى ءبىر – ءبىرىن ايشىقتاي تۇسكەن. بۇگىنگى تاڭداعى بەيشيڭ قىستاعىنىڭ ءار سۇيەم توپىراعىنان گۇلدەنىپ - كوركەيگەن ومىرشەڭدىك قۋات بايقالادى، ءار تۇستاعى وزگەرىستىڭ بارلىعىنا قىستاق تۇرعىندارىنىڭ باقىتقا دەگەن تالپىنىسى ۇيالاعان، شاعىن قىستاقتىڭ زور وزگەرىسى ارقىلى جاڭا داۋىردەگى اۋىل - قىستاقتى جاپپاي گۇلدەندىرۋدىڭ جاندى جاۋابىن جازۋدا.

كەلۋ قاينارى: حالىق تورابى