جۇڭگو جاق فيليپپيننىڭ رىن – اي مارجان قۇزىندا قاساقانا سويقان شىعارعانى جونىندە قاتاڭ سويلەستى 

شينحۋا اگەنتتىگىنىڭ 7 – ايدىڭ 21 – كۇنى بەيجيڭنەن بەرگەن حابارى (ءتىلشى سۇن نان، شاۋ ي – بو). فيليپپيننىڭ رىن – اي مارجان قۇزىندا قاساقانا سويقان شىعارىپ، جۇڭگو تەڭىز ساقشىلارىنىڭ زاڭ اتقارۋشى قىزمەتكەرلەرىنە شابۋىل جاساعاندىعى جونىندە، سىرتقى ىستەر مينيسترلىگىنىڭ مالىمدەمەشىسى لين جيان 7 - ايدىڭ 21 – كۇنى كەزەكتى اقپارات جاريالاۋ ماجىلىسىندە بىلاي دەدى: جۇڭگو جاق فيليپپين جاقتىڭ قاتىستى ارەكەتتەرىنە بايلانىستى قاتاڭ نارازىلىعىن ءارى باتىل قارسى تۇراتىنىن ءبىلدىردى، فيليپپيننىڭ جۇڭگوداعى ەلشىسىمەن قاتاڭ سويلەستى.

لين جيان بىلاي دەدى: 7 – ايدىڭ 20 – كۇنى، جۇڭگو تەڭىز ساقشىلارى رىن – اي مارجان قۇزىنىڭ ماڭىنداعى تەڭىز الابىندا ۇقىقتى قورعاۋ، زاڭ اتقارۋ قيمىلىن قالىپتى ورىستەتكەندە، فيليپپين جاقتىڭ زاڭسىز ”قايراڭداعان“ اسكەري كەمە قۇراماسى قاساقانا ەكى كەمە جىبەرىپ، حاۋىپتى تاسىلدەرمەن جۇڭگو جاقتىڭ كەمەلەرىنە جاقىنداعان ءارى سوعىلىسقان، جۇڭگو جاقتىڭ زاڭ اتقارۋشى قىزمەتكەرلەرىنە زورلىقتى كۇشپەن شابۋىل جاساعان، جۇڭگو جاق زاڭ بويىنشا باتىل ءبىر جاقتى ەتۋگە ءماجبۇر بولعان. وقيعادان كەيىن فيليپپين جاق جۇڭگو جاققا پالە جاۋىپ، فاكتتەردى بۇرمالاپ، اسا زور كولەمدە دابىرالاعان. ”جۇڭگو جاق فيليپپين جاقتىڭ قاتىستى ارەكەتتەرىنە قاتىستى قاتاڭ نارازىلىعىن ءارى باتىل قارسى تۇراتىنىن ءبىلدىردى. بۇگىن تاڭەرتەڭ، جۇڭگو جاق فيليپپيننىڭ جۇڭگوداعى ەلشىسىمەن قاتاڭ سويلەستى“.

لين جيان مىنانى باسا دارىپتەدى: رىن – اي مارجان قۇزى جۇڭگونىڭ نانشا توپ ارالىنىڭ ءبىر بولىگى، جۇڭگونىڭ تەرريتورياسى. كوپشىلىككە ايان، 1999 – جىلى 5 – ايدىڭ 9 – كۇنى، فيليپپيننىڭ ءبىر اسكەري كەمەسى قايراڭداپ قالعاندىعىن جەلەۋ ەتىپ، جۇڭگونىڭ نانشا توپ ارالىنداعى رىن – اي مارجان قۇزىنا زاڭسىز ”ورنالاسقان“. جۇڭگو جاق فيليپپين جاقتان كەمەنى الىپ كەتۋدى تالاي رەت تالاپ ەتكەن، فيليپپين جاق تا تالاي رەت ۋادە بەرگەن. ءبىراق 27 جىل ءوتتى، فيليپپين جاق ۋادەسىن ورىنداعان جوق.

”جۇڭگو جاق ءوزىنىڭ تەرريتوريالىق يەلىك ۇقىعى مەن تەڭىز – مۇحيتتاعى ۇقىق – مۇددەسىن قورعاۋ بەكىمىنەن اۋىتقىمايدى“، – دەدى لين جيان، – ”ءبىز فيليپپين جاقتى ۋادەسىن شىنايى ورىنداۋعا، تەڭىزدە سويقان شىعارۋ، سوقتىعۋ جانە شىندىققا جاتپايتىن دابىرالاۋ ارەكەتتەرىن دەرەۋ توقتاتۋعا، ءبىرىنشى شەپتەگى قىزمەتكەرلەردى شىنايى تەجەۋگە قۋزايمىز، ويتپەگەندە، وسىدان تۋىندايتىن بارلىق زارداپتى فيليپپين جاق ارقالايدى.

كەلۋ قاينارى: حالىق تورابى