جۇڭگونىڭ قاتىناس سالاسىندا قۋاتتى ەل كورسەتكىشى ورنىقتى ارتىپ، دۇنيە ءجۇزى بويىنشا بەسىنشى ورىنعا شىقتى 

شينحۋا اگەنتتىگىنىڭ 8 – ايدىڭ 25 – كۇنى ۋحاننان بەرگەن حابارى (ءتىلشى جاڭ ياڭ، يە حاۋميڭ). قاتىناس - تاسىمال مينيسترلىگى قاتىناس سالاسىندا قۋاتتى ەل كورسەتكىشى جونىندە 8 - ايدىڭ 25 – كۇنى جاريالاعان ەڭ جاڭا مالىمەتىنە قاراعاندا، ەلىمىزدىڭ قاتىناس سالاسىندا قۋاتتى ەل كورسەتكىشى 90.8 بولىپ، بىلتىرعىدان 0.9 ارتىپ، دۇنيە جۇزىندەگى نەگىزگى ەلدەر اراسىندا بەسىنشى ورىندى يەلەگەن.

بۇل اقپاراتتى ءتىلشى 8 - ايدىڭ 25 – كۇنى قاتىناس - تاسىمال مينيسترلىگى حۋبەي ولكەسىنىڭ ۋحان قالاسىندا وتكىزگەن 2026 – جىلعى قاتىناس سالاسىندا قۋاتتى ەل قۇرۋدى جەدەلدەتۋ جونىندەگى ماجىلىستەن ۇعىسقان. ناقتىلاپ ايتقاندا، كەزەكشى كەمە تاسىمالىنىڭ ۇلاسپالىلىق كورسەتكىشى، تەمىر جولدى ەلەكترلەندىرۋ سالىستىرماسى، جاڭا ەنەرگيالى اۆتوموبيلدىڭ ۇستايتىن سالىستىرماسى، كەمەجايداعى جۇك قورابىن جىلدىق تيەۋ – ءتۇسىرۋ مولشەرى قاتارلى جاقتاردا تۇگەلدەي حالىقارالىق الدىڭعى قاتارداعى دەڭگەيگە جەتكەن.

ماجىلىستە قاتىناس سالاسىندا قۋاتتى ەل كورسەتكىشىنىڭ ولكەلەر بويىنشا باعالاۋ كورسەتكىشى جاريالاندى، جان - جاقتى ولشەم بويىنشا قاراعاندا، جىجياڭ، جياڭسۋ، گۋاڭدۇڭ، فۋجيان، سىچۋان ولكەلەرىنە بەرىلگەن باعا سالىستىرمالى تۇردە جوعارى بولدى. ماجىلىستە قاتىناس سالاسىندا قۋاتتى ەل قۇرۋدى تۇيىندە سىناق ەتۋدەگى 12 تيپتىك مىسال جاريالاندى. مۇنىڭ ىشىندە، جياڭسۋدىڭ ” AI+ پاراساتتى جول تورىنىڭ“ جوعارى قارقىندى تاس جولدىڭ تىنىش تا ىركىلىسسىز بولۋىنا كەپىلدىك ەتۋى، حۋبەيدىڭ ”تەمىر جول – سۋ جولى – تاس جول – اۋە جولى“ قاتارلىلاردى جوعارى ءونىمدى ۇشتاستىرۋ ۇلگىسىندە جاڭالىق اشۋى، شانشيدىڭ چينليڭ تۋنەلىندە حاۋىپسىزدىككە قاتىستى ساقتانۋ - تىزگىندەۋ جۇيەسىن قۇرۋى قاتارلىلار تيپتىك مىسالدار قاتارىنا ەنگىزىلدى.

ماجىلىستە «قاتىناس سالاسىندا قۋاتتى ەل قۇرۋدى جەدەلدەتۋ جونىندەگى بايانداما (2025)» قاتارلى ءبىرقىدىرۋ جەتىستىكتەر دە جاريالاندى.

كەلۋ قاينارى: حالىق تورابى