بەيجيڭ داشۋەسى پارتكومىنىڭ بۇرىنعى تۇراقتى مۇشەسى، ورىنباسار مەكتەپ باستىعى رىن يۇيجۇڭنىڭ پارا الۋ دەلوسىنا ءبىرىنشى سوتتا ۇكىم جاريالاندى

8 – ايدىڭ 24 – كۇنى، لياۋنيڭ ولكەسى داندۇڭ قالالىق ورتا دارەجەلى حالىق سوت مەكەمەسى ءبىرىنشى سوت اشىپ، بەيجيڭ داشۋەسى پارتكومىنىڭ بۇرىنعى تۇراقتى مۇشەسى، ورىنباسار مەكتەپ باستىعى رىن يۇيجۇڭنىڭ پارا الۋ دەلوسىنا اشىق ۇكىم شىعاردى، ايىپكەر رىن يۇيجۇڭدى پارا الۋ قىلمىسى بويىنشا 8 جىلدىق مەرزىمدى قاماۋ جازاسىنا ۇكىم ەتتى، وعان قوسا 2 ميلليون 600 مىڭ يۋان اقشالاي ايىپ سالدى، رىن يۇيجۇڭنىڭ پارا الۋ قىلمىسىنان تاپقان مال ـ مۇلكى مەن ءوسىمىن زاڭ بويىنشا قۋزاپ قايتارىپ الىپ، مەملەكەت قازىناسىنا تاپسىرادى.

تەكسەرۋ ارقىلى مىنالار انىقتالدى: 2006 - جىلدان 2025 - جىلعا دەيىن ايىپكەر رىن يۇيجۇڭ بەيجيڭ داشۋەسى پارتكومى ساياسات زەرتتەۋ كەڭسەسىنىڭ ورىنباسار مەڭگەرۋشىسى، مەڭگەرۋشىسى، بەيجيڭ داشۋەسى كادرلار ءبولىمىنىڭ باستىعى، بەيجيڭ داشۋەسى پارتكومى ۇگىت ءبولىمىنىڭ باستىعى، بەيجيڭ داشۋەسى پارتكومىنىڭ تۇراقتى مۇشەسى، ورىنباسار مەكتەپ باستىعى قاتارلى قىزمەت قولايلىلىعىنان جانە قىزمەت ۇقىعىنان، ورنىنان قالىپتاسقان قولايلى شارت - جاعدايدان پايدالانىپ، قاتىستى ورىندار مەن جەكەلەردىڭ تاربيەلەۋ، باۋلۋ، جوعارىلاپ وقۋ، كاسىپتەنۋ قاتارلى ىستەرىنە كومەكتەسىپ، زاڭسىز العان مال - مۇلكى حالىق اقشاسىنا سىندىرعاندا 31 ميلليون 950 مىڭ يۋاننان اسقان.

داندۇڭ قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر رىن يۇيجۇڭنىڭ ارەكەتى پارا الۋ قىلمىسىنا جاتادى، العان پارا سوماسى ەرەكشە كوپ، ونى زاڭ بويىنشا جازالاۋ كەرەك. رىن يۇيجۇڭ وزدىگىنەن مالىمدەپ، ءوزىنىڭ قىلمىسىن قاز - قالپىندا مويىنداعانى ءوزىن مالىمدەۋگە جاتادى؛ دەلو ءبىر جاقتى ەتۋ ورگانى ءالى يگەرمەگەن پارا الۋ فاكتتەرىنىڭ كوبىن ىرىقتىلىقپەن تاپسىرعان؛ قىلمىسىن تانىپ، رايىنان قايتىپ، زاڭسىز ولجانى بەلسەنە قايتارعان، پاراعا العان زاڭسىز اقشا مەن زاڭسىز ولجانى تۇگەلدەي قايتارىپ العاندىقتان، زاڭ بويىنشا جەڭىلدەتىپ جازالاۋعا بولادى. سوت جوعارىداعى ۇكىمدى شىعاردى.

ۇعىسۋعا قاراعاندا، داندۇڭ قالالىق ورتا دارەجەلى حالىق سوت مەكەمەسى 6 – ايدىڭ 5 - كۇنى بۇل دەلونى اشىق سوت اشىپ قاراعان. تەرگەۋ بارىسىندا پروكۋراتۋرا ورگانى قاتىستى دالەل - ىسپاتتاردى كورسەتتى، ايىپكەر رىن يۇيجۇڭ جانە ونىڭ اقتاۋشىسى اقتاۋ جۇرگىزدى، ايىپتاۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، رىن يۇيجۇڭ ەڭ سوڭعى ءسوزىن سويلەدى ءارى سوتتا قىلمىسىن مويىنداپ، وكىنەتىندىگىن ءبىلدىردى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالا بۇقاراسىنان 20 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى