مەملەكەتتىك جاڭا ولشەم جاريالاندى، بەزەنۋ بۇيىمدارىن قالاي تاڭدايمىز (سۇراۋعا جاۋاپ) 

جۋىردا مەملەكەتتىك ولشەمدەندىرۋدى باسقارۋ كوميتەتى تۇڭعىش رەت بەزەنۋ بۇيىمدارىنا قاتىستى ماجبۇرلەمەلى مەملەكەتتىك ولشەمدى — «بەزەنۋ بۇيىمدارىنىڭ حاۋىپسىزدىگىنە قاتىستى جالپىلىق تالاپتى» جاريالادى، 2028 - جىلى رەسمي اتقارىلادى.

مەملەكەتتىك جاڭا ولشەمدە بالالارعا ارنالعان بەزەنۋ بۇيىمدارى مەن كوز اينالاسىنداعى تەرى، كىرپىك جانە ەرىنگە ارنالعان بەزەنۋ بۇيىمدارىنىڭ قۇرامىنداعى باكتەريا شوعىرىنىڭ سان شەكتەمەسى ادەتتەگى ونىمدەردەن 10 ەسە قاتاڭ بولىپ بەلگىلەنگەن، حاۋپى جوعارى ونىمدەرگە قاتاڭ باسقارۋ جۇرگىزىلەدى. وسى سالاداعى ماماندار مىنانى ءبىلدىردى: مەملەكەتتىك جاڭا ولشەمنىڭ حالىقارالىق ISO ولشەمىنە قاراعاندا بالالاردى قورعاۋ كولەمى اناعۇرلىم كەڭ، تالابى اناعۇرلىم قاتاڭ. مىسالى، ISO ولشەمىندە 3 جاستان تومەن جاستاعى بالالارعا ارنالعان بەزەنۋ بۇيىمدارىنىڭ قۇرامىنداعى باكتەريا شوعىرىنىڭ سان شەكتەمەسى ءار گرام نەمەسە ءار ميلليليتر ونىمدە ”100 باكتەريا شوعىرى“ بولادى دەپ بەلگىلەنگەن، ەلىمىزدىڭ جاڭا ولشەمىندە 12 جاس جانە ودان تومەن جاستاعى بالالارعا ارنالعان بەزەنۋ بۇيىمدارىنىڭ قۇرامىنداعى باكتەريا شوعىرىنىڭ سان شەكتەمەسىندە وسى قاتاڭ شەكتەمەنى اتقارۋ تالاپ ەتىلگەن.

مەملەكەتتىك جاڭا ولشەمدە بەزەنۋ بۇيىمدارىنىڭ قۇرامىنداعى حاۋىپتى زاتتار قاتاڭ تەجەلگەن. سىناپ، قورعاسىن، مىس، كادمي قاتارلى زياندى زاتتارعا قاتاڭ شەكتەمە بەلگىلەنىپ، ءار كيلوگرام ونىمدەگى قالدىعىن ءبىر ميلليگرامنان 10 ميلليگرامعا دەيىنگى ارالىقتا تىزگىندەۋ تالاپ ەتىلگەن. مەتيل سپيرتى، تاسماقتا، بەنزول سياقتى قالدىق وڭاي پايدا بولاتىن شيكىزاتتارعا باعىتتاي وتىرىپ، كاسىپورىنداردان قالدىقتى قاتاڭ تىزگىندەۋ، تەكسەرۋدى كۇشەيتۋ تالاپ ەتىلەدى.

مەملەكەتتىك جاڭا ولشەم جاريالانعاننان كەيىن، تۇتىنۋشىلار بەزەنۋ بۇيىمدارىن قالاي تاڭداۋى كەرەك؟

الدىمەن، تولىمدىلىعى بار زاۆودتار وندىرگەن بەزەنۋ بۇيىمدارىن تاڭداۋ، بەزەنۋ بۇيىمدارىنىڭ بەلگىسىندە جازىلعان ءوندىرۋشى كاسىپورىننىڭ اتى، ءادىرىسى، وندىرۋگە رۇقسات بەرۋ كۋالىگىنىڭ ءنومىرى، سونداي - اق ارناۋلى بەزەنۋ بۇيىمدارىن تىركەۋ كۋالىگىنىڭ ءنومىرى نەمەسە ادەتتەگى بەزەنۋ بۇيىمدارىن ەستەلىككە الۋ ءنومىرىن مۇقيات قاراپ شىعۋ كەرەك. مەملەكەتتىك ءدارى - دارمەكتى باقىلاۋ -باسقارۋ مەكەمەسىنىڭ پاراقشاسى نەمەسە قول تەلەفونداعى ”بەزەنۋ بۇيىمدارىن باقىلاۋ – باسقارۋ“ دەتالى ارقىلى بەزەنۋ بۇيىمدارىنىڭ تىركەۋ نەمەسە ەستەلىككە الۋ ينفورماتسياسىن تەكسەرۋ، تىركەلمەگەن، ەستەلىككە الىنباعان نەمەسە تىركەلگەن، ەستەلىككە الىنعان ينفورماتسياعا ساي كەلمەيتىن بەزەنۋ بۇيىمدارىن ساتىپ الماۋ كەرەك.

مۇنان سىرت، بەزەنۋ بۇيىمدارىنىڭ ۇگىت سوزدەرىنە قاراۋ. بەزەنۋ بۇيىمدارىنىڭ ەمدەۋ رولى بار دەگەن مازمۇندى ايقىن جازۋعا نەمەسە ەمەكسىتۋگە تيىم سالىنادى، جالعان، اسىرا ايتىلعان، سىڭار جاقتىلى سوزدەردى قولدانىپ جالعان نەمەسە ادامدى الجاستىراتىن سيپاتتاۋ جاساۋعا تيىم سالىنادى. ونىمدىلىگى كۇشتى، تەز ءونىم بەرەدى دەگەن سياقتى ۇگىت جاسالعان ونىمدەردەن ساق بولعان ءجون، ”بۇكىلدەي وسىمدىكتەن جاسالعان“، ”بۇكىلدەي تابيعي“ دەگەن سياقتى سىڭار جاقتىلى، جالعان ۇگىتتەۋلەردەن ساق بولۋ كەرەك.

ەڭ سوڭىندا، بالالارعا ارنالعان بەزەنۋ بۇيىمدارىن تاڭداعاندا، ءونىم بەلگىسىندە بالالارعا ارنالعان بەزەنۋ بۇيىمىنىڭ بەلگىسى — ”كىشكەنتاي التىن قالقان“ بار - جوقتىعىنا نازار اۋدارۋ قاجەت، ەگەر وسى بەلگى بولماسا، ساتىپ الماعان ءجون.

كەلۋ قاينارى: حالىق تورابى