شينجياڭ ەرەجە شىعارىپ، قالا ـ قالاشىقتاردا جىلۋمەن قامداۋدى باسقارۋدى ارناعا ءتۇسىردى

حالىق گازەتىنىڭ 8 –ايدىڭ 16 – كۇنى ۇرىمجىدەن بەرگەن حابارى. تاياۋدا شينجياڭ ۇيعۇر اۆتونوميالى رايوندىق حالىق قۇرىلتايى تۇراقتى كوميتەتى «شينجياڭ ۇيعۇر اۆتونوميالى رايونىنىڭ قالا ـ قالاشىقتاردا جىلۋمەن قامداۋ ەرەجەسىن» جاريالادى. ەرەجە 10 – ايدىڭ 1 – كۇنىنەن باستاپ اتقارىلادى.

ەرەجەدە مىنالار العا قويىلدى: جىلۋ مەن ەلەكتردى بىرلەسىپ ءوندىرۋدى دامىتۋعا دەم بەرىپ، جىلۋمەن قامدايتىن جاڭا تەحنيكالاردى، جاڭا تەحنولوگيالاردى، جاڭا ماتەريالداردى، جاڭا جابدىقتاردى زەرتتەپ اشۋعا جانە جالپىلاستىرىپ پايدالانۋعا قولداۋ كورسەتىپ، جىلۋمەن شوعىرلى قامدايتىن وڭىرلىك قۇبىر توراپتارىنىڭ ءوزارا بايلانىسىن ىلگەرىلەتۋ كەرەك. ەرەجەدە مىنالار ايقىن بەلگىلەندى: بولمە سىرتىنداعى تەمپەراتۋرا سول جەردەگى جىلۋمەن قامداۋ جۇيەسىنىڭ ەڭ تومەنگى جوبالاۋ تەمپەراتۋراسىنان تومەن بولماۋ قاتارلى شارت – جاعدايدا، جىلۋمەن قامدايتىن ورىندار توقتامداعى كەلىسىم بويىنشا جىلۋمەن قامداپ، تۇرعىندىق جىلۋعا بايلانىستى تۇتىنۋشىلاردىڭ جاتىن بولمەسى، قوسىمشا جاتىن بولمەسى (زالى) ىشىندەگى تۇتاس كۇندىك جىلۋمەن قامداۋ تەمپەراتۋراسىنىڭ 20 سەلتسي گرادۋستان تومەن بولماۋىنا كەپىلدىك ەتۋ، باسقا ورىنداردىڭ تەمپەراتۋراسى مەملەكەتتىڭ جوبالاۋ ولشەمىنە ۇيلەسۋى كەرەك. تۇرعىنعا جاتپايتىن جىلۋعا بايلانىستى تۇتىنۋشىلاردىڭ جىلۋمەن قامداۋ تەمپەراتۋراسى مەملەكەتتىك ولشەم نەمەسە توقتامداعى كەلىسىم بويىنشا اتقارىلادى.

ەرەجەدە مىنالار تالاپ ەتىلدى: تۇرعىندىق جىلۋعا بايلانىستى تۇتىنۋشىلاردىڭ ءۇي ءىشى تەمپەراتۋراسى ولشەمگە تولمايدى دەپ قاراسا، جىلۋمەن قامدايتىن ورىندارعا تەمپەراتۋرانى تەكسەرۋ تالابىن قويۋىنا بولادى. جىلۋمەن قامدايتىن ورىندار جىلۋ تۇتىنۋشىلارى تالاپ قويعاننان كەيىن 24 ساعات ىشىندە تەمپەراتۋرانى ولشەۋى كەرەك.