14 ادامنىڭ ءومىرىن قۇتقارعان فان چاڭميڭ 10 مىڭ يۋانمەن سيلاندى

جۋىردا، حۋبەي ولكەسى شى – يان قالاسى يۇنشي اۋدانى حۋبەيكوۋ حۇيزۋ اۋىلى تاۋيۋانگوۋ قىستاعىنداعى گەولوگيالىق اپاتتان ساقتاندىرۋشى اۋماق قىزمەتكەرى فان چاڭميڭ 10 مىڭ يۋانمەن ماراپاتتالدى. بۇل 8 – ايدىڭ 5 – كۇنى تۋىلعان لاي كوشكىنىنەن 14 ادامنىڭ ءومىرىن قۇتقارعاندىعى ءۇشىن وعان بەرىلگەن ماراپات.

8 - ايدىڭ 5 – كۇنى ساعات 8 دەن 40 مينۋت وتكەندە، فان چاڭميڭ سۋ جيشياڭ قاتارلى 7 وتباسىنىڭ ءۇيىنىڭ ارتىنان ءوتىپ بارا جاتقاندا، دەرەۋ توقتاي قالادى. ارناداعى سۋدىڭ لايلانىپ، سۋ دەڭگەيىنىڭ ۇزدىكسىز كوتەرىلىپ، لايدى تومەن قاراي اعىزىپ جاتقانىن بايقايدى دا، كوپ جىلدىق شارلاۋ تاجىريبەسىنىڭ ارقاسىندا ول دەرەۋ قىراعىلىقتى ارتتىرادى. ول اۋىلدىق قولباسشىلىق شتابىنا بۇل ءىستى مالىمدەۋمەن بىرگە، تۇرعىندار تۇراعىنا قاراي جۇگىرەدى.

7 وتباسىنىڭ ىشىندە سۋ جيگو مەن سۋ جيحاي سىرت جەردە جۇمىس ىستەپ جۇرگەندىكتەن، ولاردىڭ ۇيىندە ادام جوق ەدى، قالعان 5 وتباسىنداعى 14 ادام ۇيىندە بولاتىن.

فان چاڭميڭ بۇل وتباسىلاردىڭ ەسىگىن ءبىر – بىرلەپ قاعىپ: ”تەز شىعىڭدار! ارتقى جاقتاعى سايدان لاي كوشكىنى تۇسەتىن بولدى! تەز ماعان ەرىڭدەر!“ - دەپ ايعاي سالادى. وسىلايشا ساعات 9 دان 40 مينۋت وتكەندە، 14 ادامنىڭ بارلىعى حاۋىپسىز ورىنعا كوشىرىلدى.

شامامەن 20 مينۋت وتكەن سوڭ، ساي جاقتان ”گۇرس“ ەتكەن قاتتى داۋىس شىعىپ، ۇلكەن تاستار لاي كوشكىنىمەن بىرگە اعىپ، 8 ءۇيدى دەرەۋ قيراتىپ، كەرپىش قابىرعالاردى لاي كوشكىنى قۇلاتىپ كەتەدى.

”تاعى 20 مينۋت كەشىككەن بولساق، زاردابىن ويلاۋعا دا باتىلىمىز بارمايدى“، - دەدى فان چاڭميڭ حاۋىپسىز ورىنعا جەتكەن سوڭ، ادامداردى ءبىر – بىرلەپ تۇگەندەپ شىقتى. 14 ادام، بارلىعى تولىق.

8 - ايدىڭ 7 – كۇنى، حۋبەي ولكەلىك جاراتىلىستىق بايلىق مەڭگەرمەسىنىڭ قىزمەتكەرلەرى تاۋيۋانگوۋ قىستاعىنا ارنايى كەلىپ، فان چاڭميڭعا 10 مىڭ يۋان سيلىق تاپسىرىپ، ونى باتىل شەشىم قابىلداپ، 14 ادامنىڭ ءومىرىن قۇتقارعاندىعى ءۇشىن ماراپاتتادى.

حاۋىپ – قاتەردەن قۇتقارۋدىڭ ءساتتى بولۋى نەگىزگى ساتىداعى ءبىرىنشى شەپتەگى قىزمەتكەردىڭ تىنىمسىز شارلاۋى مەن باتىل شەشىم جاساۋىنىڭ ارقاسىندا ىسكە استى. فان چاڭميڭدى القايمىز!

كەلۋ قاينارى: حالىق تورابى