جۇڭگو مەن شۆەتساريا ەركىن ساۋدا كەلىسىمشارتىنىڭ دارەجەسىن جوعارىلاتۋ جونىندەگى كەلىسسوزدى  اياقتاتقانىن جاريالادى 

شينحۋا اگەنتتىگىنىڭ 8 – ايدىڭ 21 – كۇنى بەيجيڭنەن بەرگەن حابارى (ءتىلشى شيە شيياۋ): ءتىلشىنىڭ 8 - ايدىڭ 21 - كۇنى ساۋدا مينيسترلىگىنەن ۇعىسۋىنشا، ساۋدا مينيسترلىگىنىڭ مينيسترى ۋاڭ ۋىنتاۋ 8 - ايدىڭ 20 - كۇنى شۆەتساريا فەدەراتسياسىنىڭ ءتوراعاسى ءارى ەكونوميكا، وقۋ - اعارتۋ مينيسترى پامەلانمەن بەرن قالاسىندا جۇڭگو - شۆەتساريا ەركىن ساۋدا كەلىسىمشارتىنىڭ دارەجەسىن جوعارىلاتۋ جونىندەگى كەلىسسوزدى اياقتاتىپ، تۇسىنىستىك ەسكەرتپەسىنە قول قويعان.

ۋاڭ ۋىنتاۋ بىلاي دەدى: 2024 - جىلى 9 - ايدا جۇڭگو مەن شۆەتساريا ەكى جاق ەركىن ساۋدا كەلىسىمشارتىنىڭ دارەجەسىن جوعارىلاتۋ جونىندەگى كەلىسسوزدى باستاعان، ەكى جاقتىڭ ورتاق قۇلشىنۋىندا، بەس رەت كەڭەس وتكىزۋ ارقىلى دارەجەسىن جوعارىلاتۋ كەلىسسوزى ءساتتى ورىندالدى. ەكى جاق زات، قىزمەت وتەۋ، قارجىلاندىرۋ، ەرەجە قاتارلى كوپ سالادا اناعۇرلىم جوعارى دەڭگەيدە قوس باعىتتا ەسىكتى اشىق ۇستاۋ جونىندە ۋادە بەردى، بۇل ەكى ەلدىڭ ەكونوميكا - ساۋدا سەلبەستىگىنە جاڭا وراي جاراتادى.

پامەلان بىلاي دەدى: كەلىسىمشارتتىڭ دارەجەسىنىڭ ءساتتى جوعارىلاتىلۋى ەكى جاقتى قاتىناستى دامىتۋ بارىسىنداعى تاعى ءبىر ماڭىزدى بەلەس بولىپ، ەكى ەل كاسىپورىندارىنىڭ ۇزاق مەرزىمدى دامۋىنا اناعۇرلىم ورنىقتى، اشىق، بولجامدى تۇزىمدىك كەپىلدىك ازىرلەيدى، سونىمەن بىرگە ەكى جاقتىڭ اشىق سەلبەستىكتى، ەركىن ساۋدانى ىلگەرىلەتۋدەگى بەلسەندىلىگىن ايگىلەدى.

جۇڭگو - شۆەتساريا ەركىن ساۋدا كەلىسىمشارتىنا 2013 - جىلى 7 - ايدا قول قويىلىپ، 2014 - جىلى 7 - ايدا كۇشكە يە بولعان، بۇل ەلىمىزدىڭ ەۆروپا قۇرلىعىنداعى ەلدەرمەن جاساسقان تۇڭعىش ەركىن ساۋدا كەلىسىمشارتى. وسى رەتكى دارەجەسىن جوعارىلاتۋ كەلىسسوزى اياقتاعاننان كەيىن، ەكى جاق ءوزدى - ءوزىنىڭ ەل ىشىندەگى ماقۇلداۋ ءتارتىبىن جەدەل ورىنداپ، دارەجەسىن جوعارىلاتۋ حاتناماسىنا ەرتەرەك رەسمي قول قويۋعا دايىندالادى.