100 دەن استام جاس فۋتبولشىنىڭ شەتەلدە ۇيرەنۋىنە قارجىلاي كومەك بەرەدى، ەڭ جوعارى ولشەمى جىلىنا 450 مىڭ يۋان! جۇڭگو فۋتبول سالاسىنىڭ ”بولاشاق جۇلدىزدارى“ جوسپارى باستالدى 

9 - ايدىڭ 1 - كۇنى جۇڭگو فۋتبول سالاسىن دامىتۋ قورى مەن جۇڭگو فۋتبول قوعامى ”بولاشاق جۇلدىزدارى“ جوسپارى الەۋمەتتىك يگىلىك نىسانىن رەسمي جاريالادى. جوسپار بويىنشا بەس جىل ۋاقىت بويىنشا شەتەلدە ۇيرەنەتىن 100 دەن استام جاس فۋتبولشىعا قارجىلاي كومەك بەرىلىپ، جۇڭگو فۋتبول سالاسىنىڭ قازىرگى دامۋ جاعدايىنا ۇيلەسەتىن شەتەلدە دارىندىلاردى تاربيەلەۋ ۇلگىسىن ورناتۋ زەرتتەلەدى.

تانىستىرۋعا قاراعاندا، بۇل جوسپار ”جۇڭگونىڭ جاس فۋتبول دارىندىلارىن شەتەلدە تاربيەلەۋ جوسپارىنىڭ (2026 – 2030 – جىلدار)» ماڭىزدى قۇرامداس بولەگى بولىپ تابىلادى. «ارنايى قولداۋ، جۇيەلى قامتاماسىزداندىرۋ، قابىلەتىنە باسا ءمان بەرۋ، جارىستان كەيىن سيلاۋ جانە قوسىمشا قاراجات بەرۋ“ پرينسيپىن نەگىز ەتىپ، 15 - 17 جاس ارالىعىنداعى بولاشاعىنان ءۇمىت بايقاتقان جۇڭگولىق جاس فۋتبولشىلاردىڭ شەتەلدەگى كلۋبتاردا ۇيرەنۋىنە، جوعارى دەڭگەيدەگى جارىستارعا قاتىناسۋىنا دەم بەرەدى.

دارىندىلاردى تاربيەلەۋدە ساپاسىنا كەپىلدىك ەتۋ ءۇشىن، بۇل جوسپار ”جوعارى دەڭگەيدەگى جارىسقا قاتىناسۋ“ سىندى ولشەمدى تۇراقتاندىرىپ، دۇنيە ءجۇزى بويىنشا جاستار قۇراماسىن دايىنداۋ جاعىنداعى ناتيجەسى كورنەكتى بولعان 26 مەملەكەتتىڭ (رايوننىڭ) 192 جوعارى دەڭگەيدەگى جاستار بىرلەسپە جارىسىن ولشەم ەتىپ تاڭدايدى. سونىمەن بىرگە ءبىرتۇتاس ءوتىنىش بەرۋ ولشەمىن تۇراقتاندىرىپ، دۇنيە ءجۇزى بويىنشا شارتقا ۇيلەسەتىن جۇڭگو ازاماتتىعىنداعى جاس فۋتبولشىلارعا ءوتىنىش بەرۋ ارناسىن اشىپ، ”ءوزىن باعالاۋ – العاشقى تەكسەرۋ – قايتا تەكسەرۋ – مامانداردىڭ باعالاۋى“ سىندى كوپ باسقىشتى باعالاۋ مەحانيزمىن قولدانادى. ءوتىنىش بەرۋشى فۋتبولشىلار تىركەلۋ جانە جارىسقا قاتىناسۋ ىسپاتى، جارىستاعى الاڭعا شىعۋ ەستەلىگى قاتارلى ماتەريالداردى تاپسىرادى، ماماندار گرۋپپاسى عىلمي باعالاۋ ۇلگىسىنە نەگىزدەلە وتىرىپ جان – جاقتىلى ءنومىر قويادى، قارجىلاي كومەك بەرىلەتىن فۋتبولشىلار ءتىزىمىن العان ءنومىرىنىڭ جوعارى – تومەندىگىنە قاراي تۇراقتاندىرادى.

قارجى جاعىنان ايتقاندا، بۇل جوسپاردا ءۇش دارەجەلى قارجىلاي كومەك بەرۋ ولشەمى قولدانىلادى:

ءبىرىنشى دارەجە (جىلىنا 450 مىڭ يۋان)، ەۋروپاداعى بەس ءىرى بىرلەسپە جارىستىڭ ءمالىم دەڭگەيدەگى كوماندالارىنداعى جاس فۋتبولشىلارعا باعىتتالعان.

ەكىنشى دارەجە (جىلىنا 350 مىڭ يۋان)، گوللانديا، بەلگيا، برازيليا، ارگەنتينا قاتارلى فۋتبول سالاسى دامىعان مەملەكەتتەردىڭ ەڭ جوعارى دارەجەلى بىرلەسپە جارىستارىنىڭ ءمالىم دەڭگەيدەگى كوماندالارىنداعى جاس فۋتبولشىلارعا باعىتتالعان.

ءۇشىنشى دارەجە (جىلىنا 250 مىڭ يۋان)، جاپونيا، كورەيا، اۆستراليا قاتارلى ازيا فۋتبول بىرلەستىگىنە مۇشە بىرلەستىكتەردەگى جوعارى دەڭگەيدەگى كلۋبتاردىڭ ءمالىم دەڭگەيدەگى كومانداسىنداعى جاس فۋتبولشىلارعا باعىتتالعان.

ۇعىسۋعا قاراعاندا، بۇل جوسپاردىڭ بيىلعى ءوتىنىش بەرۋ ارناسى 9 - ايدىڭ 1 - كۇنى اشىلدى، اياقتالاتىن ۋاقىتى 9 - ايدىڭ 30 - كۇنى، قارجىلاي كومەك بەرىلەتىن فۋتبولشىلار ءتىزىمى بيىل 11 - ايدا جاريالانادى. بولاشاقتا جۇڭگو فۋتبول قوعامى مەن جۇڭگو فۋتبول سالاسىن دامىتۋ قورى بىرلەسكەن قىزمەت گرۋپپاسىن قۇرىپ، شەتەلدەگى كلۋبتارمەن سەلبەستىك ارناسىن كەڭەيتىپ، شەتەلدە دارىندى تاربيەلەۋ بازاسىن قۇرىپ، جۇڭگو فۋتبول سالاسىنىڭ شەتەلدە دارىندى تاربيەلەۋ قىزمەتىن جۇيەلى ىلگەرىلەتەدى.

ءوتىنىش بەرۋ ارناسىنا مىنا ارادان كىرۋىڭىزگە بولادى: https://futurestar.thecfa.info/login

كەلۋ قاينارى: حالىق تورابى