- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ۇلتتىق رۋحاني سپورتىمىز توعىزقۇمالاق تۋرالى تالقى جينالىسى ءوتتى
2014.10.22 07:53
شينجياڭ گازەتىنىڭ ءتىلشىسى نۇرلان جانايقان ۇلى، ءتاڭىرتاۋ سايتىنىڭ ءتىلشىسى الىمبەك نۇرالين ۇرىمجىدەن حابارلايدى. جۇڭگو شينجياڭ قازاق مادەنيەتى قوعامى ۇيىمداستىرعان قازاقتىڭ ءداستۇرلى ويىنى توعىزقۇمالاقتى حالىقارالىق دەڭگەيدە دامىتۋ تالقى جينالىسى 14 - قازاندا ۇرىمجىدە اشىلدى.
القالى جيىنعا جۇڭگو شينجياڭ قازاق مادەنيەتى قوعامىنىڭ ءتوراعاسى ارىپ زۇرعانبەك ۇلى باستاعان جۇڭگوداعى قازاقتىڭ مادەنيەتى مەن سپورتىنىڭ ۋاكىلدەرىنەن تىس، قازاقستان رەسپۋبليكاسى توعىزقۇمالاق قاۋىمداستىعى ءتوراعاسىنىڭ ورىنباسارى ماقسات شوتايەۆ باستاعان توعىز قۇمالاق سپورتىنىڭ ماماندارى جانە موڭعۇليا توعىزقۇمالاق بىرلەستىگىنىڭ ديرەكتورى اسىلقان ساكەي ۇلى باستاعان توعىزقۇمالاق ويىنىنىڭ تاربيەشىلەرى قاتىستى، سونداي - اق ءار سالاداعى اۋەسكەرلەر دە كەلىپ قاتىناسىپ، توعىزقۇمالاق تۋرالى بىلىمدەردەن سۋسىنداپ قايتتى.
تالقى ءماجىلىستى ءابدىقاي ماجەن ۇلى جۇرگىزدى. الدىمەن ارىپ زۇرعانبەك ۇلى ءسوز الىپ، قازاقستان توعىزقۇمالاق قاۋىمداستىعىنىڭ ەرشىمدى ەڭبەكتەرىنە ريزاشىلىعىن ءبىلدىردى ءارى توعىزقۇمالاق سىندى ءداستۇرلى سپورتىمىزدى شينجياڭدا قايتا جاڭعىرتۋدىڭ كوكەي تەستىلىگىن اتاپ ءوتتى. سودان كەيىن كاسىپتىك ماماندارعا ءسوز كەزەگى بەرىلدى.
قازاقستان رەسپۋبليكاسى توعىزقۇمالاق قاۋىمداستىعى ءتوراعاسىنىڭ ورىنباسارى، قازاقستان رەسپۋبليكاسىنا ەڭبەگى سىڭگەن جاتتىقتىرۋشى، فيلولوگيا عىلىمدارىنىڭ كانديداتى ماقسات ەسەنبەك ۇلى شوتايەۆ قازاقتىڭ ءداستۇرلى سپورتى توعىزقۇمالاقتىڭ قازاقستانداعى دامۋ جاعدايىنا توقتالدى ءارى بۇل ويىننىڭ حالىقارالىق دامۋ جاعدايىن تانىستىردى، سونداي - اق توعىزقۇمالاق ويىنىن قازاق حالقىنىڭ الەم مادەنيەتىنە قوسقان ۇلەسى دەپ تانۋ كەرەكتىگىن ءارى الدىمىزداعى جاڭا مىندەت توعىزقۇمالاقتىڭ جۇيەلەنگەن كلاسسيكالىق ەرەجەلەرىن ءناسيحاتتاۋ، ءبىزدىڭ بيىك مادەنيەتىمىزدىڭ بار ەكەنىن كورسەتۋ ەكەندىگىن اتاپ ءوتتى.
2008 - جىلى قاراشا ايىندا جاس عالىم ەلبول رايحان ۇلىنىڭ باستاماسىمەن ءۇرىمجى قالاسىندا ءبىرقانشا جينالىستار وتكىزىلىپ، توعىزقۇمالاق ويىندارىن ناسيحاتتاۋ جۇمىستارى بولعان - دى. ءبىراق ەلبولدىڭ مەزگىلسىز قازاسىنا بايلانىستى توعىزقۇمالاق ويىندارىن جۇڭگو جەرىندە ۇگىتتەۋ جۇمىستارى اياقسىز قالىپتى.
ءسوز سوڭىندا، ماقسات مىرزا قازاق مادەنيەتىنە ەسەلى ەڭبەك كورسەتىپ جاتقان ارىپ زۇرعانبەك ۇلىنا قاۋىمداستىق اتىنان العىس حات ۇسىنىپ، وقالى تون جاپتى. سونىمەن بىرگە، توعىزقۇمالاق ويىنىنىڭ جۇڭگوداعى جاتتىقتىرۋشىسى شىنار قاپان ۇلىنا قازاقستان توعىزقۇمالاق قاۋىمداستىعىنىڭ مۇشەلىك كۋالىگىن بەرىپ، رەسمي مۇشە اتانعانىن جاريالادى.
موڭعۇليا توعىزقۇمالاق بىرلەستىگىنىڭ ديرەكتورى اسىلقان ساكەي ۇلى توعىزقۇمالاقتىڭ موڭعۇل ەلىندەگى دامۋ جاعدايىنا توقتالىپ، بايانولگەي ايماعىندا ۇلتتىق رۋحاني سپورت رەتىندە دامىتىلىپ، بيىكتەي تۇسكەنىن ايتتى. ءسوز سوڭىندا ول كىسى وسى سالاعا قاتىستى كىتاپتارىن ۇسىنىپ، وسىنداعى توعىزقۇمالاق اۋەسكەرلەرىنىڭ كەڭىنەن ۇيرەنۋىنە جاعداي جاسادى.
شەتەلدىك قوناقتاردان سوڭ شينجياڭ ۋنيۆەرسيتەتىنىڭ وقىتۋشىسى شىنار قاپان ۇلى توعىزقۇمالاقتىڭ شينجياڭداعى ءناسيحاتتالۋ جاعدايىنا توقتالىپ، ونى مەكتەپتەردىڭ وقىتۋ باعدارلاماسىنا ەنگىزۋ كەرەكتىگىن دارىپتەدى. سودان كەيىن زيالى قاۋىم وكىلدەرى رەتىمەن ءسوز الىپ، وسى ءبىر ءداستۇرلى سپورتتى ارى قاراي دامىتۋ جاعىنداعى ۇتىمدى ويلارىن ورتاعا سالدى. وسىلايشا، تۇستەن بۇرىنعى اشىلعان تالقى ءماجىلىسى ءساتتى جابىلىپ، تۇستەن كەيىنگى ارناۋلى قيمىلدارعا ۇلاستى.
تۇستەن كەيىنگى قيمىل بارىسىندا ماقسات مىرزا باس بولعان قازاقستاننان كەلگەن جاتتىقتىرۋشىلار قازاقستان توعىزقۇمالاق قاۋىمداستىعىنىڭ ديرەكتورى، اعا جاتتىقتىرۋشى باۋىرجان تولەگەنوۆ، باتىس قازاقستان وبلىسىنىڭ اعا جاتتىقتىرۋشىسى داۋلەت ابدىكاريموۆ؛ موڭعۇليا توعىزقۇمالاق بىرلەستىگىنىڭ ديرەكتورى اسىلقان ساكەي ۇلى، موڭعۇليا توعىزقۇمالاق قاۋىمداستىعىنىڭ باسقارما مۇشەسى الماسبەك قوجاعايىن قاتارلى تاربيەشىلەر توعىزقۇمالاق اۋەسكەرلەرىنە ويناۋ ەرەجەلەرىن ۇيرەتتى.
توعىزقۇمالاق قازاقتىڭ ءداستۇرلى سپورتتىق ءارى ماتەماتيكالىق ويىنى. بۇل ويىندى العاشىندا ورىستە قويشىلار وينايتىن بولعان. جەردەن شۇڭقىرلار قازىلىپ، قۇمالاقپەن وينالعان. بۇل ويىن قازىر ون سەگىز وتاۋدان جانە ەكى قازاننان تۇراتىن ارنايى تاقتادا ءجۇز الپىس ەكى تاسپەن وينالادى. توعىزقۇمالاق ويىنشىنىڭ جىلدام ويلاۋىن، جۇرەتىن جولىن الدىن الا بولجاپ، ەسەپتەپ وتىرۋىن قاجەت ەتەدى. سۋرەتتى الىمبەك نۇرالين تۇسىرگەن
كەلۋ قاينارى: شينجياڭ گازەتى تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
