- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«بۇل مەنىڭ ولكەم، ءبارىمىزدىڭ ولكەمىز»
− ستۋدەنت شۇي جىڭ قىسقا مەتراجدى دەرەكتى فيلم «مەنىڭ ولكەم» ارقىلى شينجياڭدى ۇگىتتەدى
جاۋ شييا
2016.04.14 14:21 كەلۋ قاينارى : شينجياڭ گازەتى
2015 - جىلدىڭ جازعى دەمالىسىندا، شينجياڭ اسەمونەر ينستيتۋتى كينو - تەلەۆيزيا فاكۋلتەتى 2012 - جىلدىق راديو - تەلەۆيزيا رەجيسسەرلىگى كلاسىنىڭ وقۋشىسى شۇي جىڭ ۆەلوسيپەدپەن كۇن - ءتۇن قاتىپ 10 مىڭ كيلومەترگە تاياۋ جول باسىپ، كامەرامەن كورىكتى شينجياڭنىڭ كوركەم كورىنىستەرىن سۋرەتكە ءتۇسىرىپ شىعادى. شۇي جىڭنىڭ ديپلومدىق جۇمىس ءۇشىن دايىنداعان قىسقا مەتراجدى دەرەكتى فيلمى − «مەنىڭ ولكەم» 9 - ساۋىردە ينتەرنەتكە جۇكتەلىپ، نە ءبارى 3 ساعاتتىڭ ىشىندە كورىلىمى 10 مىڭنان اسادى. شاندۇڭدىق بوز بالانىڭ جاستىق لەبىنە تولى كوركەمدىك بەينەلۋى ارقىلى كورىكتى شينجياڭ جۇرەكتەرگە شۋاق سيلاپ، كوڭىلدەرگە جىلىلىق باعىشتايدى، شينجياڭنىڭ ءىشى - سىرتىنداعى قالىڭ قاۋىم شينجياڭنىڭ جارقىن كەلبەتىنە تاعى ءبىر مارتە ءتانتى بولىپ، تاڭداي قاعىسادى.
10 مىڭ كيلومەترگە تاياۋ جول باسىپ، شينجياڭنىڭ كەلبەتىن كەسكىندەدى
فيلم باستالعان ساتتە، ۇستىنە تەڭىز اسكەرلەرىنىڭ الا جەيدەسىن، باسىنا قىزىل بەس جۇلدىزدى اق بەيسبولكا كيىپ، روك ءانشىسى سۇي جيان سياقتى بوي تۇزەگەن شۇي جىڭ وسى تۋىندىنى دايىنداۋداعى ماقساتىن شەبەر تىلمەن بايانداي جونەلەدى: وسىناۋ الىس ولكەگە 4 جىلدىڭ الدىندا العاش قادام تاستادىم، سول ساتتە - اق ونىڭ ءتىلسىم سۇلۋلىعىنا عاشىق بولدىم، وسىلاي ات باسىن بۇرعان اعايىن - دوستارىم ماعان «اماندىققا كوڭىل ءبول» دەپ ءجيى ەسكەرتەدى، مەنىڭشە، كەيبىر اعات تۇسىنىكتەر تۋرالى ارتىق ايتىپ، اۋىز اۋىرتۋدىڭ قاجەتى جوق، ويتكەنى مەندە جۇرۋگە جارالعان اياق، كورۋگە جارالعان كوز بار ەمەس پە، سونىمەن، ۇزاق ساپارعا شىعىپ، ءوزىم عاشىق فوتو سۋرەت ونەرى ارقىلى ءوزىم سۇيەتىن وسى توپىراقتى بەينەگە جازىپ، ول تۋرالى تۇسىنىگى تاياز جاندارعا كورسەتۋ بەكىمىنە كەلدىم.
ول 2 ايدا 10 مىڭ كيلومەترگە تاياۋ جۇرەدى. ىلە، تۇرپان، اقسۋ، حوتان سياقتى جەرلەردەگى 20 نەشە اۋدان - قالاعا ونىڭ ءىزى تۇسەدى. «ءدارۋىش» دەيتىن اندە ايتىلعانداي، ول تۇستىكتەن تەرىستىككە، كۇنگەيدەن تەرىسكەيگە جول الىپ، دامىلسىز جورتادى، تىنىمسىز ساپار ۇستىندە شينجياڭنىڭ شىنايى بولمىسىن سەزىنەدى. جۇلدىزدى اسپاندى سۋرەتكە تۇسىرەمىن دەپ جۇرگەندە نوسەرگە تاپ بولادى، بىردە تاۋ جولىندا بەتكەيدەن قۇلاعان تاستىڭ استىندا قالا جازداعانى دا بار، تاۋ جوتاسىندا تىنىسى تارىلىپ، وتتەكتەن تارىققانى دا ەسىندە... ساپار جولىندا تالاي - تالاي بولجاۋسىز قيىنشىلىقتار مەن سىن - سىناقتارعا تاپ بولسا دا، ۇكىلى ۇمىتكە قول سوزعان جاس جىگىت توزىمدىلىك كورسەتىپ، ويعا العا جوسپارىن تاس - تۇيناقتاي تامامداپ شىعادى.
2 كۇننەن بەرى، نە ءبارى 5 مينۋت 40 سەكۋند قانا تۇراتىن وسى قىسقا مەتراجدى دەرەكتى فيلم دوستار شەڭبەرىن ءجيى - ءجيى جاڭارتىپ، تالاي ادامنىڭ شينجياڭ تۋرالى تانىمىن جاڭالاپ ۇلگىردى. 11 - ساۋىرگە دەيىن كورىلىمى 35 مىڭنان اسىپ، ماداق - ماقتاۋدىڭ استىندا قالدى. شۇي جىڭنىڭ ىشكى ولكەلەردەگى دوستارى «ءار تاراپتانعان اسەم شينجياڭ، الەمدىك ۇلگىدەگى كورىكتى شينجياڭ كوزىمىزگە وتتاي باسىلدى، قالايدا، ءوز كوزىمىزبەن كورۋگە بارامىز»، «شينجياڭ وسىنشا كوركەم ەكەن - اۋ» دەپ تاڭداي قاعىستى.
شۇي جىڭنىڭ ۇستازى گو دۇننىڭ قاراۋىنشا، تۋىندىنىڭ وسىنشاما كوپ ادامنىڭ نازارىن اۋدارۋىنا، باستىسى، شۇي جىڭنىڭ شينجياڭدى شىن جۇرەكتەن سۇيە بىلگەندىگى سەبەپ بولعان ەكەن، بويىنداعى وتتاي ىستىق ماحاببات كوپتەگەن شينجياڭدىقتان ۇندەستىك تاۋىپ، ىشكى ولكەدەگى تالاي ادامدى شينجياڭعا قىزىقتىرىپ، «شىركىن، ءبىر بارساق» دەگەن ارمانعا جەتەلەپتى.
شىنايى شينجياڭ تۋرالى بەينەبايان
«شينجياڭ كوركەمونەر ينستيتۋتىنا ەمتيحان تاپسىرعاندا - اق، بولاشاقتا شينجياڭدا قالۋعا بەل بايلاعان ەدىم، ونان بەرى 4 جىل وتە شىقتى، اسىرەسە، وسى قىسقا فيلمدى تۇسىرگەننەن كەيىن، ول ويىم ءتىپتى بەكي ءتۇستى». 10 - ءساۋىر كۇنى، فيلمنىڭ ءتۇسىرىلۋى تۋرالى اڭگىمە بولعاندا 23 جاستاعى شۇي جىڭ ءوز تەبىرەنىسىن جاسىرا المادى.
شۇي جىڭ 2012 - جىلى شينجياڭ كوركەمونەر ينستيتۋتىنا وقۋعا قابىلدانىپ، شاندۇڭنىڭ زاۋجۋاڭ قالاسىنان ۇرىمجىگە كەلەدى. بۇرىن شينجياڭعا تابانى تيمەگەن باسقا ادامدار سەكىلدى، وعان دا شينجياڭ عاجاپ سىرلى بولىپ سەزىلگەن ەدى، وزگەرىس پەن سۇيىسپەنشىلىك جوعارى مەكتەپ قۇشاعىندا وتكەن 4 جىلدىڭ ەنشىسىندە.
شينجياڭ كوركەمونەر ينستيتۋتى ءۇرىمجى قالاسىنداعى ۇلتتىق بوياۋى قانىق ىنتىماق جولىنىڭ بويىنا ورنالاسقان، بۇل شۇي جىڭ سەكىلدى ىشكى ولكەلەردەن كەلگەن ستۋدەنتتەرگە شينجياڭدى ءبىلۋ، تانۋ ورايىن ازىرلەپ، مەكتەپتىڭ ءىشى - سىرتىنداعى ءار ۇلت ادامدارىمەن دوستاسۋىنا مۇمكىندىك تۋدىرادى.
«استىڭعى توسەكتە سادام دەيتىن اجارلى ۇيعۇر ازاماتى جاتادى»، - دەدى شۇي جىڭ. ول سادامنان ازداپ ۇيعۇرشا دا ۇيرەنىپتى.
كلاستاسى، ۇلتى وزبەك دينار نۇرمۇحاممەتپەن شۇي جىڭ وتە جاقىن وتەدى ەكەن، ول ەكەۋى كەزدەسكەندە الاقان سوعىپ، يىق قاعىسىپ امانداسادى ەكەن.
وتكەن جىلى ساپارعا شىعار الدىندا، ول ديناردىڭ ۇيىندە 3 كۇن تۇرادى، ديناردىڭ اكە - شەشەسى ونى ءوز بالاسىنداي كورىپ، ساپارعا ءۇي ىشىمەن اتتاندىرىپ سالادى.
وقۋ تاۋىساتىن ءسات تاياعان سايىن، جوعارى مەكتەپتە وتكەن 4 جىلدىڭ ءاربىر ءساتى، جۇرەگى جىلى جاندار مەن كوڭىلگە شۋاق سەپكەن ىستەر ونىڭ كوز الدىنان شۇبالىپ وتەدى.
«وسى فيلمدى ءتۇسىرۋ ارقىلى قالىڭ جۇرتقا شىنايى شينجياڭنىڭ ناعىز بولمىسىن قاراپايىم ادامنىڭ تۇرعىسىنان بايانداۋدى ماقسات ەتتىم»، - دەيدى شۇي جىڭ. وتكەن 4 جىلدا شينجياڭ ونىڭ ساناسىنا تەك كوركەم ەستەلىكتەر ۇيالاتقان ەدى. شينجياڭ كوركەمونەر ينستيتۋتىندا ءار ۇلت وقىتۋشى - وقۋشىلارىنىڭ ءبىر ءۇيدىڭ بالاسىنداي تاتۋ - ءتاتتى وتەدى، شۇي جىڭنىڭ سۇيىسپەنشىلىگى وسىنداي شىنايى تۇرمىستان تامىر الىپ جاتقان - دى.
شينجياڭعا ماحاببات سارقىلماق ەمەس
شينجياڭدا وتكەن 4 جىلدا شۇي جىڭ بۇل جەردى ءوزىنىڭ 2 - مەكەنى دەپ بىلەدى. كورىكتى شينجياڭدى ءناسيحاتتاۋ، شينجياڭدىقتاردىڭ حيكاياسىن بايانداۋ شۇي جىڭنىڭ شىن كوڭىلدەن تۋعان ىستىق ماحابباتىنىڭ كۋاسى، جۇرەكتەن قايناپ شىققان ادال سەزىمىنىڭ بەينەسى ەدى. ونىڭ «مەنىڭ ولكەم» دەپ اتالاتىن قىسقا مەتراجدى فيلمىندە، شينجياڭنىڭ كورىكتى تابيعاتى مەن ءار ۇلتتىڭ مادەنيەتى وتە شىمىر بەينەلەنگەن.
بارىنەن قىمباتى اشىق - جارقىن، اق نيەتتى شينجياڭدىق «تۋىستارى» قول ۇشىن بەرمەگەندە، شۇي جىڭنىڭ ءوز جوسپارىن ءساتتى ورىنداۋى مۇمكىن ەمەس ەدى. ول تابيعات قۇشاعىندا شىنىعۋمەن بىرگە، باعا جەتپەس دوستىققا قولى جەتەدى: تەكەس اۋدانىنىڭ قۇشتاي جايلاۋىندا، بەتىن جۋىپ، كەرى بۇرىلعاندا اقشا قاپشىعى سۋ جاعاسىندا قالىپ قويادى، سول جولى الدەبىر قازاق اعايى ونى موتوتسيكلىنە مىنگەستىرىپ، كەلگەن جولىمەن كەرى ءجۇرىپ اقشا قاپشىعىن تابىسىپ بەرەدى؛ بايىنبۇلاق جايلاۋىندا، جاتار ورىن تابا الماعاندا اق كوڭىل مالشىلار وعان توردەن ورىن بەرەدى؛ جۇلدىزدى اسپاننىڭ كورىنىسىن سۋرەتكە تۇسىرگەن ىزعارلى تۇندە، بەيتانىس ۇيعۇر اعايى وعان ماقتالى شاپان جەتكىزىپ بەرەدى؛ ءالى قۇرىپ، شاماسى قالماعاندا حۇيزۋ اعايى مۇسا ونى كولىگىنە وتىرعىزىپ، وعان مول سەنىم بەرەدى. «الدەبىر ومارتاشى اعاي ماعان جولدا وزەك جالعارسىڭ دەپ ارا كونەگىنەن ەكەۋىن قورجىنىما سالىپ بەردى، كەيىن ءبىلدىم، ارا كونەگىنىڭ كيلوگرامى 200 يۋان تۇرادى ەكەن...». شۇي جىڭ ولاردى ءالى كۇنگە العىس سەزىممەن ەسكە الادى.
ساپار ۇستىندە جولىققان وسى اق كوڭىل شينجياڭدىقتار دا فيلمنەن كورىنىس تاپقان. شۇي جىڭ الداعى جەردە دەرەكتى فيلمدى ءالى دە كەمەلدەندىرىپ، وعان اڭگىمە جەلىسىن ەنگىزۋدى ويلايدى ەكەن، مىسالى، جولشىباي جولىققان ادامداردىڭ ارمانى وعان ەرەكشە اسەر ەتىپتى. كەيىنىرەك ول شينجياڭدى ءتىپتى كەڭ اۋقىمدا ۇگىتتەۋدى ماقسات ەتىپ وتىر، بولاشاقتا شينجياڭدا قالىپ، ءوزىنىڭ ماماندىعى ارقىلى شينجياڭدى ەستەلىككە الىپ، شينجياڭدى ۇگىتتەۋدى ءۇمىت ەتەدى.
«شينجياڭ قانداي جەر؟». وتكەن 4 جىلدا شۇي جىڭنىڭ ىشكى ولكەدەگى تۋىس - تۋعان، دوس - جاراندارى وعان وسى سۇراقتى ءجيى قوياتىن كورىنەدى. شۇي جىڭنىڭ ايتۋىنشا، وسى قىسقا دەرەكتى فيلم ونىڭ نازارىنداعى شينجياڭنىڭ جارقىن بەينەسى ەكەن: شينجياڭ − سۇلۋ بويجەتكەننەن اۋمايدى، ادۋىن ءارى ۇياڭ؛ ونىڭ بىلايعى جۇرتقا بەلگىسىز تالاي قۇپياسى بار؛ ول كوپتەگەن قاقپايعا ءتوزىپ كەلەدى، جۇرتتىڭ ءوزى تۋرالى وسەك - اياڭدارعا قۇلاق تۇرمەي، ءوزىن شىن جۇرەكتەن تۇسىنۋىنە مۇقتاج؛ ول − الىس، ءبىراق، جۇرەككە جاقىن...
«بۇل مەنىڭ ولكەم، ءبارىمىزدىڭ ولكەمىز»، - دەدى شۇي جىڭ تەبىرەنىپ.
شۇي جىڭ فيلم ءتۇسىرۋ ارەدىگىندە بالالارمەن ەستەلىك سۋرەتكە ءتۇستى.
سۋرەتتى شۇي جىڭ بەرگەن
كەلۋ قاينارى: شينجياڭ گازەتى
جاۋاپتى رەداكتورى : مانەپ ەربول ۇلى (پراكتيكانت)
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
