فيليپپيننىڭ وتكەل كەمەسى اۋدارىلىپ، كەمىندە 36 ادام قازا بولدى

2015.07.03 13:56   كەلۋ قاينارى : حالىق تورابى

　　حالىق تورابى، 3 – شىلدە، بەيجيڭ. شينحۋا اگەنتتىگى «شينحۋا حالىقارالىق حابارلارى» ميكروبلوگىنىڭ حابارلاۋىنشا، فيليپپين تەڭىز جاعالاۋى قاراۋىل اترەتى مىناداي حابار جاريالاعان: 173 ادام وتىرعان وتكەل كەمە 2 – شىلدە كۇنى تۇستە فيليپپيننىڭ ورتا بولەگىندە اۋدارىلىپ، 36 ادام قازا بولىپ، 19 ادام دەرەكسىز كەتكەن.

　　فيليپپين تەڭىز جاعالاۋى قاراۋىل اترەتىنىڭ مالىمدەمەشىسى باليلونىڭ ايتۋىنشا، بۇل وتكەل كەمە فيليپپيننىڭ ورتا بولەگىندەگى ورموك قالاسىنان كاموتەس توپ ارالدارىنا قاراي جولعا شىققان. جەرلىك ۋاقىت 12-دەن 50 مينۋت اينالاسىندا، بۇل كەمە ءوزى اتتانعان كەمەجايدان 200 مەتر قاشىقتىقتاعى تەڭىز الابىندا اۋدارىلعان.

　　تەڭىز جاعالاۋى قاراۋىل اترەتىنىڭ ەڭ جاڭا مالىمەتىنە قاراعاندا، وتكەل كەمە كەمەجايدان شىعىپ كوپ وتپەي سۇركەيلى تەڭىز رايىنىڭ اسەرىنەن اۋدارىلعان.

　　قازىر قۇتقارۋشى قىزمەتكەرلەر ءىس تۋىلعان جەرگە جەتتى. باليلونىڭ ايتۋىنشا، قازىرگە دەيىن 118 ادام قۇتقارىلعان.

　　كەلۋ قاينارى: حالىق تورابى