شي جينپيڭ گەرمانيانىڭ زۇڭليى شولتسپەن كەزدەستى
2022.11.07 16:39 كەلۋ قاينارى : شينجياڭ گازەتى
 |
11 - ايدىڭ 4 - كۇنى تۇستەن بۇرىن، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن گەرمانيانىڭ زۇڭليى شولتسپەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى ياۋ دا - ۋي تۇسىرگەن
|
شينحۋا اگەنتتىگىنىڭ 11 - ايدىڭ 4 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 11 - ايدىڭ 4 - كۇنى تۇستەن بۇرىن حالىق سارايىندا جۇڭگوعا رەسمي ساپارمەن كەلگەن گەرمانيانىڭ زۇڭليى شولتسپەن كەزدەستى.
شي جينپيڭ بىلاي دەپ اتاپ كورسەتتى: ءسىز جۇڭگو كوممۋنيستىك پارتياسىنىڭ 20 - قۇرىلتايى اشىلعاننان كەيىن ساپارلاي كەلگەن تۇڭعىش ەۆروپا باسشىسىسىز، سونداي - اق بۇل ءسىزدىڭ مىندەتكە وتىرعاننان بەرى تۇڭعىش رەت جۇڭگوعا ساپارلاي كەلۋىڭىز. ساپاردىڭ ەكى جاقتىڭ ءتۇسىنىسۋى مەن ءوزارا سەنىمدىلىگىن ارتتىرىپ، ءارقايسى سالالارداعى ناقتى سەلبەستىكتى تەرەڭدەتىپ، كەلەسى كەزەڭدەگى جۇڭگو - گەرمانيا قارىم - قاتىناسىنىڭ دامۋىنا ويداعىداي جوسپار جاسايتىندىعىنا سەنەمىن.
شي جينپيڭ بىلاي دەپ باسا دارىپتەدى: جۇڭگو - گەرمانيا قارىم - قاتىناسىنىڭ دامىپ بۇگىنگىدەي جوعارى دەڭگەيگە جەتۋىن جۇڭگو مەن گەرمانيانىڭ نەشە ۇرپاق باسشىلارىنىڭ ۇزاق بولاشاقتى كوزدەۋى مەن ساياسي الىمدىلىعىنان بولە قاراۋعا بولمايدى. بيىل ءدال جۇڭگو مەن گەرمانيا ديپلوماتيالىق قارىم - قاتىناس ورناتقاندىعىنىڭ 50 جىلدىعى. 50 جىلدىق بارىس مىنانى اڭعارتتى: تەك ءوزارا قۇرمەت ەتۋ، پارىقتاردى ساقتاپ ورتاقتىققا ۇمتىلۋ، اۋىس - كۇيىس جاساپ ءوزارا ۇلگى الۋ، سەلبەستىك جاساپ تەڭ يگىلىككە كەنەلۋ پرينسيبىنەن جازباعاندا ەكى ەل قارىم - قاتىناسىنىڭ ۇلكەن بەتالىسى اۋىتقىمايدى، قادامى دا وتە نىق بولادى. قازىرگى ۋاقىتتا حالىقارالىق جاعداي كۇردەلى ءارى قۇبىلمالى، جۇڭگو مەن گەرمانيا ىقپال قۋاتى بار ءىرى ەلدەر رەتىندە، وزگەرىس جاعدايىندا، قىم - قۋىت جاعدايدا تىپتەن قول ۇستاسا سەلبەستىك جاساپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم كوپ ۇلەس قوسۋى ءتيىس. جۇڭگو جاق گەرمانيا جاقپەن بىرگە قۇلشىنىپ، بولاشاققا بەت العان جان - جاقتى ستراتەگيالىق سەرىكتەستىك قارىم - قاتىناس ورناتىپ، جۇڭگو - گەرمانيا، جۇڭگو − ەۆروپا قارىم - قاتىناسىنىڭ تىڭ دامۋعا قول جەتكىزۋىن ىلگەرىلەتۋدى قالايدى.
شي جينپيڭ جۇڭگو كوممۋنيستىك پارتياسى 20 - قۇرىلتايىنىڭ نەگىزگى احۋالىن تانىستىردى، جۇڭگو ۇلگىسىندەگى وسىزامانداندىرۋدىڭ ماندىك ماڭىزىن ءتۇيىندى تۇردە ەگجەي - تەگجەيلى ءتۇسىندىردى. شي جينپيڭ بىلاي دەپ اتاپ كورسەتتى: وسىزامانداندىرۋ ءار ەل حالقىنىڭ ورتاق تىلەگى جانە نىساناسى، الايدا ءار ەل ءوز امالياتىمەن ۇشتاستىرىپ جول تاڭداۋى ءتيىس. جۇڭگو ۇلگىسىندەگى وسىزامانداندىرۋدا ءار ەل وسىزامانداندىرۋىنىڭ ورتاق ەرەكشەلىگى بار بولىپ قالماستان، ونان دا ماڭىزدىسى، ءوزىمىزدىڭ مەملەكەت جاعدايىن نەگىز ەتكەن جۇڭگوشا ەرەكشەلىك بار، مۇنى جۇڭگونىڭ وزگەشە وبيەكتيۆتىك شارت - جاعدايى بەلگىلەگەن، جۇڭگونىڭ قوعامدىق ءتۇزىمى مەن ەل باسقارۋ ۇستانىمى بەلگىلەگەن، سونداي - اق جۇڭگونىڭ وسىزامانداندىرۋدى جۇزەگە اسىرۋداعى ۇزاق ۋاقىتتىق امالياتى بارىسىندا يە بولعان زاڭدىلىق سيپاتتى تانىمى بەلگىلەگەن. جۇڭگو باستان - اياق وزىندىك دامۋى ارقىلى دۇنيە ءجۇزىنىڭ بەيبىتشىلىگىن قورعاپ جانە جەبەپ كەلەدى، جۇڭگونىڭ دامۋى دۇنيە ءجۇزىنىڭ دامۋىمەن ءوزارا توعىسادى، ءوزارا تابىسقا جەتەدى. جۇڭگو جوعارى دەڭگەيدە سىرتقا ەسىك اشۋدى بۇلجىماستان ىلگەرىلەتىپ، ەكونوميكا جاھاندانۋىنىڭ دۇرىس بەتالىسىنا تاباندى بولىپ، اشىق دۇنيە ءجۇزى ەكونوميكاسىن قۇرۋدى ۇزدىكسىز ىلگەرىلەتىپ، ءار ەل مۇددەسىنىڭ توعىسۋ ءتۇيىنىن كەڭەيتەدى.
شي جينپيڭ بىلاي دەپ باسا دارىپتەدى: ساياسي جاقتاعى ءوزارا سەنىمدىلىكتى ءبۇلدىرۋ وتە وڭاي، قايتا قۇرۋ وتە قيىن، ەكى جاقتىڭ بىرگە قورعاۋىن قاجەت ەتەدى. مەن گەرمانيانىڭ بۇرىنعى زۇڭليى شميتتىڭ مىنا ءبىر كوزقاراسىنا قاتتى سۇيىنەمىن: ”ساياساتكەر وزگەرتۋگە كەلمەيتىندەرىن جايىمەن قابىلداۋى، وزگەرتۋگە كەلەتىندەرىن باتىلدىقپەن وزگەرتۋى، ونداعى پارىقتى پاراساتتىلىقپەن پارىقتاي ءبىلۋى ءتيىس“. جۇڭگو مەن گەرمانيا ءوزارا قۇرمەت ەتىپ، ءبىر - ءبىرىنىڭ وزەكتى مۇددەسىنە قارايلاسىپ، تىلدەسۋگە، كەڭەسۋگە تاباندى بولىپ، توپقا ءبولىنىپ قارسىلاسۋ، جاپپاي يدەولوگيالاندىرۋ سياقتى فاكتورلىق كەدەرگىلەردى بىرگە تەجەۋى ءتيىس. ەكى جاق ەكى ەل قارىم - قاتىناسىنىڭ ۇلكەن بەتالىسىن باستان - اياق ستراتەگيالىق بيىكتە تۇرىپ يگەرىپ، سىندارلى پوزيتسيامەن ەڭ ۇلكەن ورتاق بولگىش تابۋعا ۇمتىلىپ، اشىق پوزيتسيامەن ناقتى سەلبەستىكتى جەبەپ، ءارى وزىنە - ءوزى شەك قويماي، ءارى ورە جەتپەسكە قول سوزباي، ەكى ەل قارىم - قاتىناسىنىڭ ۇزاق ۋاقىت ورنىقتى دامۋىنا شارت - جاعداي ازىرلەۋى كەرەك. جۇڭگونىڭ گەرمانياعا باعىتتالعان ساياساتى بارىنشا ورنىقتىلىقتى، ۇلاسپالىلىقتى ساقتايدى، گەرمانيا جاقتىڭ دا جۇڭگوعا بەلسەندى ساياسات ۇستانىپ، ەكى ەلدىڭ ءوزارا تيىمدىلىك جاساپ، تەڭ يگىلىككە كەنەلۋدى جۇزەگە اسىرۋىن ءۇمىت ەتەمىن.
شي جينپيڭ بىلاي دەپ اتاپ كورسەتتى: وتكەن 50 جىلدا جۇڭگو مەن گەرمانيانىڭ ناقتى سەلبەستىگى ۇزدىكسىز تەرەڭدەپ، ەكى جاقتى ساۋدا كولەمى 1000 ەسەگە جۋىق ارتىپ، ەكى ەلدىڭ ەكونوميكالىق، قوعامدىق دامۋىنا قىزمەت ەتتى. ەكى جاق ورتاق مۇددەنىڭ ”بالكۇلشەسىن“ ۇزدىكسىز ۇلكەن جاساپ، ءداستۇرلى سالالارداعى سەلبەستىكتىڭ كومەسكى كۇشىن ۇلعايتۋمەن بىرگە، جاڭا ەنەرگيا، جاساندى زەردە، سيفرلاندىرۋ سياقتى جاڭا سالالارداعى سەلبەستىكتىڭ ومىرشەڭدىگىن دە قاۋلاتۋى كەرەك. جۇڭگو جاق گەرمانيا جاقپەن، ەۆروپا جاقپەن بىرگە اۆياتسيا سەلبەستىگىن ۇزدىكسىز تەرەڭدەتۋدى، سونداي - اق جاڭا تيپتى ايدارشا ۆيرۋس وكپە قابىنۋىنان ساقتانۋ جانە ەمدەۋ جاعىندا اۋىس - كۇيىس، سەلبەستىك ورىستەتۋدى، جاسىل دامۋ، ەكولوگيالىق ورتانى قورعاۋ سياقتى تاقىرىپتاردى توڭىرەكتەي وتىرىپ اۋىس - كۇيىس جاساۋدى، ءوزارا ۇلگى الۋدى كۇشەيتىپ، گۋمانيتارلىق اۋىس - كۇيىستى ىلگەرىلەتۋدى قالايدى. گەرمانيا جاقتىڭ جۇڭگو جاقپەن بىرگە قورعانىمپازدىقتى تەجەپ، ەكى ەل حالقىن ەكى ەل سەلبەستىگىنىڭ جەتىستىكتەرىنەن اناعۇرلىم ويداعىداي يگىلىكتەندىرۋىن ءۇمىت ەتەمىن.
شي جينپيڭ بىلاي دەپ اتاپ كورسەتتى: جۇڭگو - ەۆروپا قارىم - قاتىناسى الەمدىك جاعدايدىڭ ورنىقتىلىعى مەن ازيا - ەۆروپا قۇرلىعىنىڭ گۇلدەنىپ - كوركەيۋىنە سايادى، ەكى جاقتىڭ قۇلشىنا ويداعىداي قورعاۋىنا، ويداعىداي دامىتۋىنا تاتيدى. جۇڭگو جاق باستان - اياق ەۆروپانى جالپى بەتتىك ستراتەگيالىق سەرىكتەسى ساناپ، ەۆروپا وداعىنىڭ ستراتەگيادا ءوز - وزىنە قوجايىن بولۋىن قولدايدى، ەۆروپانىڭ ورنىقتى بولۋىن، گۇلدەنىپ - كوركەيۋىن ءۇمىت ەتەدى، جۇڭگو - ەۆروپا قارىم - قاتىناسىنىڭ ءۇشىنشى جاققا باعىتتالماۋىنا، باعىنىشتى بولماۋىنا، تەجەۋىنە دە ۇشىراماۋىنا تاباندى بولادى. جۇڭگو مەن ەۆروپا جاعداي قانشا كۇردەلى، قيىن بولعان سايىن، ءوزارا قۇرمەت ەتۋگە، ءوزارا تيىمدىلىك جاساپ، تەڭ يگىلىككە كەنەلۋگە، پىكىرلەسۋگە، سەلبەسۋگە سولعۇرلىم تاباندى بولۋى ءتيىس. جۇڭگو جاق گەرمانيا جاقپەن، ەۆروپا جاقپەن حالىقارالىق ىستەردەگى سايكەسۋدى، سەلبەسۋدى كۇشەيتىپ، كليمات وزگەرىسىنە توتەپ بەرۋ، ورگانيزمدەردىڭ الۋان تۇرلىلىگىن قورعاۋ، استىق حاۋىپسىزدىگىن جەبەۋ سياقتى الەمدىك ماسەلەلەردى ارقاۋ ەتىپ، شەشۋ جولىن بىرگە قاراستىرۋدى قالايدى.
شولتس مىنانى ءبىلدىردى: بيىل جۇڭگو مەن گەرمانيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىنا تۋرا كەلدى، مەن ۇسىنىس بويىنشا جۇڭگوعا ساپارلاي كەلىپ، سىزبەن بىرگە گەرمانيا - جۇڭگو قارىم - قاتىناسى جانە ورتاق كوڭىل ءبولىپ وتىرعان كەلەلى ماسەلەلەر جونىندە ىشكەرىلەي پىكىرلەسكەندىگىمە قاتتى قۋانامىن. ءسىزدىڭ جۇڭگونىڭ دامۋ بولاشاعىن تانىستىرعاندىعىڭىزعا العىس ايتامىن. كەزەكتە حالىقارالىق جاعداي كۇردەلى دە قاتاڭ، ەۆروپا قۇرلىعى دا بۇرىن بولىپ كورمەگەن جاڭا سىن - سايىستارعا ءدوپ كەلىپ وتىر، جۇڭگو جاق كليمات وزگەرىسىنە توتەپ بەرۋ، ورگانيزمدەردىڭ الۋان تۇرلىلىگىن قورعاۋ، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ، استىق داعدارىسىنا توتەپ بەرۋ سياقتى كوپتەگەن الەمدىك ماسەلەلەردە ماڭىزدى رول اتقارۋدا، گەرمانيا جاق جۇڭگو جاقپەن پىكىرلەسۋدى، سايكەسۋدى ساقتاپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن حاۋىپسىزدىگىن اناعۇرلىم ويداعىداي قورعاۋدى ءۇمىت ەتەدى. جۇڭگو - گەرمانيا مەن ەۆروپانىڭ ماڭىزدى ەكونوميكا - ساۋدا سەرىگى، گەرمانيا جاق ساۋدانىڭ ەركىندەنۋىن باتىل قولدايدى، ەكونوميكانىڭ جاھاندانۋىن قولدايدى، ”بايلانىستى ۇزۋگە“ قارسى تۇرادى، جۇڭگو جاقپەن ەكونوميكا - ساۋدا سەلبەستىگىن ۇزدىكسىز تەرەڭدەتىپ، ەكى ەل كاسىپورىندارىنىڭ ءوزارا قارسى جاعىنا بارىپ، قارجى قوسىپ سەلبەستىك ورىستەتۋىنە قولداۋ كورسەتەدى. گەرمانيا جاق تا جۇڭگو جاقپەن بىرگە ەكى جاقتىڭ تۇرعىسى بىردەي بولماعان ماسەلەلەر جونىندە پىكىر اۋىستىرىپ، ءتۇسىنىسۋ مەن ءوزارا سەنىمدىلىكتى ارتتىرىپ، گەرمانيا - جۇڭگو قارىم - قاتىناسىن كۇش سالا ورنىقتىرۋدى، بەكەمدەۋدى جانە دامىتۋدى قالايدى. دۇنيە ءجۇزى كوپ ۇيەكتەنگەن جاعدايعا مۇقتاج، جاڭادان گۇلدەنگەن ەلدەردىڭ رولى مەن ىقپالى ءمان بەرۋگە تاتيدى، گەرمانيا جاق توپقا ءبولىنىپ قارسىلاسۋعا قارسى تۇرادى، ساياساتكەرلەردىڭ بۇل ءۇشىن جاۋاپكەرشىلىك ارقالاۋى قاجەتتى. گەرمانيا جاق ەۆروپا - جۇڭگو قارىم - قاتىناسىنىڭ دامۋىن ىلگەرىلەتۋدە تيەسىلى رول اتقارۋدى قالايدى.
ەكى ەل باسشىلارى ۋكراينا داعدارىسى جونىندە دە پىكىر اۋىستىردى. شي جينپيڭ بىلاي دەپ اتاپ كورسەتتى: جۇڭگو جاق گەرمانيا جاقتىڭ، ەۆروپا جاقتىڭ راقايلاستىرۋ، كەلىسسوزدى جەبەۋ جونىندە ماڭىزدى رول ساۋلەلەندىرىپ، تەڭگەرىمدى، ءونىمدى، باياندى ەۆروپا حاۋىپسىزدىك جۇلگەسىن قۇرۋدى ىلگەرىلەتۋىن قولدايدى. قازىرگى جاعدايدا، حالىقارالىق قوعام ۋكراينا داعدارىسىن بەيبىت شەشۋگە كۇش سالاتىن ءارقانداي قۇلشىنىستى بىرگە قولداپ، قاتىستى جاقتاردى ۇستامدىلىق پەن بايسالدىلىقتى ساقتاۋعا، تىكەلەي بارىس - كەلىستى تەزىرەك ورىستەتىپ، كەلىسسوزدى قايتا باستاۋعا شارت - جاعداي ازىرلەۋگە ۇندەۋى؛ يادرولىق قارۋ ىستەتۋگە نەمەسە ىستەتەمىن دەپ قوقان - لوقى جاساۋعا بىرگە قارسى تۇرىپ، يادرولىق قارۋ ىستەتۋگە، يادرولىق سوعىس جۇرگىزۋگە بولمايتىندىعىن دارىپتەپ، ازيا - ەۆروپا قۇرلىعىندا يادرو داعدارىسىنىڭ تۋىلۋىنان ساقتانۋى؛ الەمدىك كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىنا شىنايى كەپىلدىك ەتۋگە بىرگە قۇلشىنىپ، حالىقارالىق ەنەرگيا، استىق، فينانس سياقتى سەلبەستىكتەردىڭ كەدەرگىگە ۇشىراپ، الەمدىك ەكونوميكانىڭ سەرپىلۋىنە، اسىرەسە، وركەندەپ كەلە جاتقان ەلدەردىڭ ەكونوميكا، قازىنا ورنىقتىلىعىنا زيان جەتكىزۋىنەن ساقتانۋى؛ داعدارىس تۋىلعان وڭىرلەردەگى قاراپايىم حالىقتىڭ قىستان شىعۋىنىڭ قيىنشىلىقتارىن بىرگە شەشىپ، گۋمانيتارلىق جاعدايدى جاقسارتىپ، اناعۇرلىم زور كولەمدەگى گۋمانيتارلىق داعدارىستىڭ تۋىلۋىنان ساقتانۋى ءتيىس.
كەزدەسۋ اياقتالعاننان كەيىن، شي جينپيڭ حالىق سارايىنىڭ جينسى زالىندا شولتسقا ارناپ قوناعاسى وتكىزدى.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
جاۋاپتى رەداكتورى : مانەپ ەربول ۇلى
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
سۋرەتتى حابار
لەبىز جازۋ
