شي جينپيڭ سەنەگالدىڭ زۇڭتۇڭى ساللمەن كەزدەستى
2023.08.24 16:40 كەلۋ قاينارى : حالىق تورابى
سول جەر ۋاقىتى 8 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ ديدارلاسۋىنا قاتىناسقان كەزىندە سەنەگالدىڭ زۇڭتۇڭى ساللمەن كەزدەستى. سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن
«حالىق گازەتى»، 8 - ايدىڭ 23 - كۇنى، يوحاننەسبۋرگ (تىلشىلەر گۇڭ ميڭ، شى يۋانحاۋ). سول جەر ۋاقىتى 8 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ كەزدەسۋىنە قاتىناسقان كەزىندە سەنەگالدىڭ زۇڭتۇڭى ساللمەن كەزدەستى.
شي جينپيڭ بىلاي دەپ اتاپ كورسەتتى: سەنەگال − جۇڭگونىڭ افريكاداعى ماڭىزدى سەلبەستىك سەرىگى. تاياۋ جىلداردان بەرى ەكى جاقتىڭ بىرگە قۇلشىنۋىندا، جۇڭگو مەن سەنەگالدىڭ ساياسي سەنىمدىلىگى ۇزدىكسىز تەرەڭدەپ، ءار سالاداعى سەلبەستىگى سۇبەلى تابىستارعا قول جەتكىزدى. جۇڭگو سەنەگالدىڭ مەملەكەتتىڭ ورنىقتىلىعى مەن دامۋىن قورعاۋ جولىندا كورسەتكەن قۇلشىنىستارىن باتىل قولدايدى، سەنەگالمەن بىرگە ءوزارا قولداۋدى كۇشەيتىپ، ونەركاسىپ، اۋىل شارۋاشىلىعى، نەگىزدىك قۇرىلعى قۇرىلىسى، ادام كۇشى بايلىعىن اشۋ سياقتى سالالارداعى سەلبەستىكتى تەرەڭدەتىپ، ورىندى دامۋ ۇقىق - مۇددەسىن بىرگە قورعاپ، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.
شي جينپيڭ بىلاي دەپ دارىپتەدى: قازىر حالىقارالىق جاعدايدا تەرەڭ دە كۇردەلى وزگەرىستەر تۋىلۋدا، جۇڭگو افريكامەن ىنتىماقتى، سەلبەستىكتى كۇشەيتۋدى بۇرىنعى ءارقانداي كەزدەگىدەن دە قاجەت ەتەدى. جۇڭگو افريكا وداعىنىڭ 20 ەل توبىنا كىرۋىنە قولداۋ كورسەتەدى، شىنايى، ادال بولۋ ۇستانىمى مەن دۇرىس ادىلەت - مۇددە كوزقاراسىن ۇزدىكسىز ۇستانىپ، افريكاداعى باۋىرلاستارمەن ءوزىنىڭ دامۋ تاجىريبەلەرىنەن، ورايىنان بىرگە يگىلىكتەنىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قۇرۋدى ىلگەرىلەتەدى. جۇڭگو - افريكا سەلبەستىك تالقى مىنبەرىنىڭ ورتاق ءتوراعا ەلى رەتىندە جۇڭگو مەن سەنەگال جۇڭگو مەن افريكانىڭ ىنتىماقتاسا وتىرىپ ىندەتكە قارسى اتتانۋ ەرەكشە باس قوسۋى سياقتى ءبىرقىدىرۋ ماڭىزدى قيمىلدى ءساتتى وتكىزدى. جۇڭگو سەنەگالمەن تىلدەسۋدى، سايكەسۋدى ۇزدىكسىز كۇشەيتىپ، جۇڭگو - افريكا سەلبەستىگىنىڭ «9 ءتۇرلى ينجەنەرياسىن» ويداعىداي تياناقتاندىرۋدى ىلگەرىلەتىپ، جۇڭگو - افريكا ىنتىماعىن، سەلبەستىگىن بەكەمدەۋگە تىڭ ۇلەس قوسۋدى قالايدى.
سالل مىنالاردى ءبىلدىردى: سەنەگال مەن جۇڭگو − ساپالى جان - جاقتى ستراتەگيالىق سەرىكتەرى، ءتوراعا شي جينپيڭ − افريكا مەن سەنەگالدىڭ ۇلى دوسى. ەكى جاق شىنايى دوستىق رۋحى بويىنشا نەگىزدىك قۇرىلعىلار، ونەركاسىپ، اۋىل شارۋاشىلىعى، وقۋ - اعارتۋ سياقتى كەڭ سالالاردا ءوزارا ءتيىمدى سەلبەستىك ورىستەتتى. سەنەگال ءبىر جۇڭگو ساياساتىن باتىل اتقارادى، جۇڭگونىڭ اتقارعان بەيبىت ديپلوماتيالىق ساياساتىن القايدى، جۇڭگومەن ەكى جاقتى، كوپ جاقتى سەلبەستىكتى تەرەڭدەتۋدى ءۇمىت ەتەمىن. افريكا - جۇڭگو سەلبەستىگى ومىرشەڭدىك كۇشكە تولى، افريكا جاقتىڭ دامۋ قاجەتىنە ۇيلەسەدى، ونىڭ ۇستىنە تياناقتانۋى جوعارى ءونىمدى بولىپ، افريكا ەلدەرىنىڭ ەكونوميكالىق، قوعامدىق دامۋىن پارمەندى قولدادى. جۇڭگو جاقتىڭ افريكا وداعىنىڭ 20 ەل توبىنا كىرۋىن ەڭ الدىمەن اشىق قولداعانىنا العىس ايتامىن. جۇڭگو - افريكا سەلبەستىك تالقى مىنبەرىنىڭ ورتاق ءتوراعاسى رەتىندە سەنەگال جۇڭگومەن ۇزدىكسىز ءجيى بايلانىس جاساپ، سەلبەستىك ورناتىپ، افريكا - جۇڭگو قارىم - قاتىناسىنىڭ ونان ارى دامۋىن ىلگەرىلەتۋدى قالايدى.
ساي چي، ۋاڭ ي قاتارلىلار كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
