شي جينپيڭ ج ك پ ورتالىق كوميتەتى ساياسي بيۋروسىنىڭ 8 - رەتكى توپتىق ۇيرەنۋىندە بىلاي دەپ دارىپتەدى
دۇنيە جۇزىلىك ساۋدا ۇيىمى رەفورماسىنا بەلسەنە ات سالىسىپ، جوعارى دەڭگەيدەگى سىرتقا ەسىك اشۋدى مەڭگەرۋ قابىلەتىن جوعارىلاتۋ كەرەك
2023.09.28 15:59 كەلۋ قاينارى : حالىق تورابى
شينحۋا اگەنتتىگى، 9 - ايدىڭ 27 - كۇنى، بەيجيڭ. ج ك پ ورتالىق كوميتەتىنىڭ ساياسي بيۋروسى 9 - ايدىڭ 27 - كۇنى تۇستەن كەيىن دۇنيە جۇزىلىك ساۋدا ۇيىمىنىڭ ەرەجەسى مەن دۇنيە جۇزىلىك ساۋدا ۇيىمىنىڭ رەفورماسى جونىندە 8 ـ رەتكى توپتىق ۇيرەنۋ وتكىزدى. ج ك پ ورتالىق كوميتەتىنىڭ باس شۋجيى شي جينپيڭ ۇيرەنۋدى باسقارعاندا بىلاي دەپ دارىپتەدى: دۇنيە جۇزىلىك ساۋدا ۇيىمى − كوپ جاقتىلىقتىڭ ماڭىزدى تىرەگى، دۇنيە جۇزىلىك ەكونوميكانى جونگە سالۋدىڭ ماڭىزدى ساحناسى. دۇنيە جۇزىلىك ساۋدا ۇيىمىنا قاجەتتى رەفورما جۇرگىزۋ − جالپى بەتتىك ورتاق تانىم، جالپى جاعدايدىڭ بەتالىسى. ءبىز ەل ءىشى جانە حالىقارا سىندى ەكى كەلەلى جاعدايدى اناعۇرلىم ويداعىداي ءبىر تۇتاس جوسپارلاۋ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاۋ تۇرعىسىنان، دۇنيە جۇزىلىك ساۋدا ۇيىمى رەفورماسىنا ات سالىسۋدىڭ ماڭىزدىلىعى مەن كوكەي تەستىلىگىن جەتە تانىپ، اناعۇرلىم بەلسەندى تاريحي جاۋاپكەرلىكپەن جانە جاسامپازدىق رۋحپەن، دۇنيە جۇزىلىك ساۋدا ۇيىمىنىڭ رەفورماسىنا جانە حالىقارالىق ەكونوميكا - ساۋدا ەرەجەسىن رەتتەۋگە جاپپاي ات سالىسىپ، جوعارى دەڭگەيدە سىرتقا ەسىك اشۋ ارقىلى تەرەڭ قاتپارلى رەفورمانى، ساپالى دامۋدى جەبەۋىمىز كەرەك.
ساۋدا مينيسترلىگى زەرتتەۋ ورنىنىڭ باستىعى، اعا زەرتتەۋشى گۋ شۋەميڭ وسى ماسەلە جونىندە تۇسىنىك جاساپ، قىزمەت ۇسىنىسىن ورتاعا قويدى. ورتالىق كوميتەتتىڭ ساياسي بيۋروسىنداعى جولداستار تۇسىندىرمەنى مۇقيات تىڭدادى ءارى تالقى جۇرگىزدى.
شي جينپيڭ ءتۇسىندىرۋدى جانە تالقىنى تىڭداعاننان كەيىن ماڭىزدى ءسوز سويلەدى. ول مىنالاردى كورسەتتى: دۇنيە جۇزىلىك ساۋدا ۇيىمىنا كىرۋ − ەلىمىزدىڭ سىرتقا ەسىك اشۋىنداعى بەلەس. قىسقا عانا 20 جىل ىشىندە ەلىمىزدىڭ زات ساۋداسىنىڭ جالپى سوماسى 11 ەسە ارتىپ، دۇنيە ءجۇزى بويىنشا زات ساۋداسىنداعى ءبىرىنشى ءىرى ەلگە، 140 تان استام مەملەكەت پەن رايوننىڭ نەگىزگى ساۋدا سەرىگىنە اينالىپ، دۇنيە ءجۇزى ەكونوميكاسىنىڭ ارتۋىنا جىلىنا ورتا ەسەپپەن %30 كە جۋىق ۇلەس قوستى. ەلىمىزدىڭ دۇنيە جۇزىلىك ساۋدا ۇيىمىمەن قارىم - قاتىناسىندا تاريحي وزگەرىس تۋىلدى، حالىقارالىق ەكونوميكا - ساۋدا ەرەجەسىن ىرىقسىز قابىلداۋشىدان جانە ىرىقتىلىقپەن جالعاستىرۋشىدان بىرتىندەپ ماڭىزدى قاتىناسۋشىعا اينالدى. اماليات ەلىمىزدىڭ دۇنيە جۇزىلىك ساۋدا ۇيىمىنا كىرۋىنىڭ وزىندىك دامۋىن تەزدەتىپ قانا قويماي، بۇكىل دۇنيە جۇزىنە دە پايدا جەتكىزگەنىن، وسى كەلەلى شەشىمنىڭ بۇكىلدەي دۇرىس ەكەنىن دالەلدەدى.
شي جينپيڭ مىنالاردى دارىپتەدى: دۇنيە جۇزىلىك ساۋدا ۇيىمى رەفورماسىنا قاتىناسۋدا دۇنيە جۇزىلىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىنىڭ بەدەلى مەن ونىمدىلىگىن باتىل قورعاپ، دۇنيە جۇزىلىك ساۋدا ۇيىمىنىڭ داۋ ـ شار شەشۋ مەحانيزمىنىڭ قالىپتى اينالىمىن قالپىنا كەلتىرۋدى بەلسەنە ىلگەرىلەتۋ كەرەك. تاريحتىڭ دۇرىس جاعىندا تاباندى بولىپ، ەكونوميكانىڭ جاھاندانۋىنىڭ جالپى بەتالىسىندا تاباندى بولىپ، ەركىن ساۋدانى جانە ناعىز كوپ جاقتىلىقتى ايقىن تۋ ۇستاي وتىرىپ دارىپتەپ، سىڭار جاقتىلىققا، قورعانىمپازدىققا، ەكونوميكا ـ ساۋدا ماسەلەسىن ساياسيلاندىرۋعا، قارۋعا اينالدىرۋعا، پان حاۋىپسىزدەندىرۋگە قارسى تۇرىپ، اشىق دۇنيە ءجۇزى ەكونوميكاسىن قۇرۋدى ىلگەرىلەتۋ كەرەك. ادامزاتتىڭ تاعدىرلاس ورتاق تۇلعاسى ۇستانىمىنان جازباي، دۇنيە جۇزىلىك ساۋدا ۇيىمى رەفورماسىنا جان - جاقتى، ىشكەرىلەي قاتىناساتىن جۇڭگو جوباسىن كەمەلدەندىرۋ، ناقتىلاندىرۋ كەرەك. ەلىمىزدى قامتىعان قالىڭ وركەندەپ كەلە جاتقان ەلدەردىڭ زاڭدى ۇقىق - مۇددەسىن باتىل قورعاۋ كەرەك.
شي جينپيڭ مىنالاردى اتاپ كورسەتتى: ەسىك اشۋ ارقىلى رەفورمانى، دامۋدى جەبەۋ − ەلىمىزدىڭ وسىزامانداندىرۋ قۇرىلىسىندا ۇزدىكسىز تىڭ تابىستارعا قول جەتكىزۋىنىڭ ماڭىزدى اسىلى. بيىل − رەفورما جاساپ، ەسىك اشۋدىڭ 45 جىلدىعى، وزىندىك رەفورما سىندى وسى كەلەلى ءىستى ۇزدىكسىز ويداعىداي ىستەۋ ءارى اشىق ۇستالعان ەسىكتى ونان ارى ايقارا اشۋ، ءارى رەفورما جولىمەن ورنىقتى ءجۇرۋ كەرەك. جوعارى ولشەمدى حالىقارالىق ەكونوميكا ـ ساۋدا ەرەجەلەرىمەن اناعۇرلىم ىرىقتىلىقپەن ۇشتاسىپ، ەرەجە، ەرەجە ـ ءتۇزىم، باسقارۋ، ولشەم سياقتى تۇزىمدىك ەسىك اشۋدى ورنىقتى كەڭەيتىپ، سىرتقا ەسىك اشۋدىڭ جاڭا بەلەسىن جەدەل قالىپتاستىرىپ، اناعۇرلىم جوعارى دەڭگەيدەگى اشىق ەكونوميكالىق جاڭا ءتۇزىلىس ورناتىپ، جاڭا دامۋ جاعدايىن جەدەل ورناتۋ كەرەك. بازارلانعان، زاڭمەن جونگە سالىناتىن، حالىقارالانعان ماڭداي الدى تيجارات - ساۋدا ورتاسىن بەلسەنە قالىپتاستىرىپ، «تىنىق مۇحيتتان جالپى بەتتىك اتتاعان سەرىكتەستىك قارىم - قاتىناس كەلىسىمىنە» جانە «سيفرلى ەكونوميكالىق سەرىكتەستىك قارىم - قاتىناس كەلىسىمىنە» كىرۋدى ىلگەرىلەتۋدى وراي ەتىپ، يمپورتتىڭ كومەسكى كۇشىن ونان ارى قاۋلاتىپ، بازارعا كىرۋ رۇقساتىن كەڭەيتىپ، كوپ جاقتى جانە ەكى جاقتى سەلبەستىكتىڭ ىشكەرىلەي دامۋىن ىلگەرىلەتىپ، شەتەل قارجىسىن باۋراۋ قۋاتىن كۇشەيتۋ كەرەك. ساۋدادا قۋاتتى ەل قۇرۋدى جەدەلدەتىپ، زات ساۋداسىنىڭ دارەجەسىن جوعارىلاتىپ، قىزمەت وتەۋ ساۋداسىندا جاڭالىق اشىپ، سيفرلى ساۋدانى دامىتىپ، جاسىل بولۋدى باعدار ەتىپ، حالىقارالىق جۇمىس ءبولىسى ورنىن ونان ارى جوعارىلاتىپ، دۇنيە جۇزىلىك قۇن تىزبەگىنىڭ ورتا، جوعارى دەڭگەيىنە قادام تاستاۋ كەرەك. سونىمەن بىرگە، مەملەكەتتىڭ ەكونوميكالىق حاۋىپسىزدىگىن قورعاۋعا كوڭىل ءبولۋ كەرەك.
شي جينپيڭ بىلاي دەپ دارىپتەدى: جوعارى دەڭگەيدە سىرتقا ەسىك اشۋدى مەڭگەرەتىن ىسىلعان ونەردى جەتىلدىرۋ كەرەك. تەكسەرۋ ـ زەرتتەۋدى قاۋىرت جۇرگىزىپ، ەلىمىزدىڭ اشىق دامۋىنىڭ تابىستى تاجىريبەلەرىن قورىتىندىلاپ جانە ودان ويداعىداي پايدالانىپ، ەسىك اشۋ قىزمەتىنىڭ ستراتەگيالىق، جۇيەلىلىك، كورەگەندىك جوباسىن كۇشەيتىپ، حالىقارالىق ەكونوميكا ـ ساۋدا سالاسىنداعى جاڭا جاعدايلاردى، جاڭا ماسەلەلەردى ءدال، ەگجەي ـ تەگجەيلى يگەرىپ، كوڭىلدە سان بولۋ، قولىندا شارا بولۋ، ارەكەتى پارمەندى بولۋ كەرەك. ەلىمىزدىڭ دامۋ ۇقىق - مۇددەسىن حالىقارالىق ەرەجەدەن پايدالانىپ قورعاۋ قابىلەتىن جوعارىلاتىپ، ساياسيدا ىسىلعان، قابىلەتى جوعارى، ستيلى تاماشا جوعارى دەڭگەيدەگى، ماماندانعان سىرتقا ەسىك اشۋ قىزمەت قوسىنىن جەدەل قۇرۋ كەرەك. ەسىك اشۋ مەن حاۋىپسىزدىكتى ءبىر تۇتاس جوسپارلاپ، كۇرەس بارىسىندا حاۋىپسىزدىكتى قورعاپ، ۇقىق ـ مۇددەنى ارتتىرىپ، سەلبەسۋگە ۇمتىلىپ، تەڭ يگىلىككە كەنەلۋ كەرەك.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
