لي چياڭ دۇنيە جۇزىلىك ەكونوميكا تالقى مىنبەسىنىڭ 2024 - جىلعى جىلدىق ماجىلىسىنە قاتىناستى ءارى ارنايى ءسوز سويلەدى
2024.01.17 15:52 كەلۋ قاينارى : حالىق تورابى
سول جەر ۋاقىتى 1 - ايدىڭ 16 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ شۆەتساريانىڭ داۆوس حالىقارالىق ءماجىلىس ورتالىعىندا دۇنيە جۇزىلىك ەكونوميكا تالقى مىنبەسىنىڭ 2024 - جىلعى جىلدىق ماجىلىسىنە قاتىناستى ءارى ارنايى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
«حالىق گازەتى»، 1 - ايدىڭ 16 - كۇنى، شۆەتساريا داۆوس (تىلشىلەر چىن شاڭۋىن، يان حۋان، يۇي ليمين). سول جەر ۋاقىتى 1 - ايدىڭ 16 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ داۆوس حالىقارالىق ءماجىلىس ورتالىعىندا دۇنيە جۇزىلىك ەكونوميكا تالقى مىنبەسىنىڭ 2024 - جىلعى جىلدىق ماجىلىسىنە قاتىناستى ءارى ارنايى ءسوز سويلەدى. دۇنيە جۇزىلىك ەكونوميكا تالقى مىنبەسىنىڭ نەگىزىن سالۋشى ءارى اتقارۋشى ءتوراعاسى شۆاب باسقاردى.
لي چياڭ مىنانى ءبىلدىردى: وسى رەتكى جىلدىق ءماجىلىس ”سەنىمدىلىكتى قايتا ورناتۋدى“ نەگىزگى تاقىرىپ ەتتى، ادامداردىڭ كوڭىل ءبولىپ وتىرعان ماسەلەلەرىنە توتەنشە ۇيلەسەدى. سەنىم ادامزاتتىڭ كوركەم بولاشاعىنا دەگەن تالپىنىسىمىز جانە وسى ءۇشىن بىرگە قۇلشىنۋدى قالاۋىمىز بارىسىندا ورنايدى. ءتوراعا شي جينپيڭ اتاپ كورسەتكەندەي، دۇنيە ءجۇزى جاڭا اۋمالى - توكپەلى وزگەرىس كەزەڭىنە ءوتتى، ءبىراق ادامزاتتىڭ دامۋ، العا باسۋ جالپى بەتالىسى وزگەرمەيدى، دۇنيە ءجۇزى تاريحىنىڭ بۇراڭ جولمەن العا باسۋ ۇلكەن لوگيكاسى وزگەرمەيدى، حالىقارالىق قوعامنىڭ تاعدىرلاس بولۋ ۇلكەن اۋقىمى وزگەرمەيدى. ءار جاق ارازدىقتى تاستاپ، الاۋىزدىقتى قايىرىپ قويىپ سايكەسىپ، ءبىر - بىرىنە شىنايى مامىلە جاساپ، ءبىر - بىرىنە بەيىمدەلىپ، ءبىر نيەتپەن ىنتىماقتاسىپ، سەنىمدىلىك قىزىل سيفرىن بىرگە شەشۋى كەرەك.
لي چياڭ سەنىمدىلىكتى قايتا قۇرۋ، سەلبەستىكتى كۇشەيتۋ، دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ جونىندە مىناداي 5 ءتۇرلى ۇسىنىس قويدى: ءبىرىنشى، ماكرولىق شارۋاشىلىق ساياساتىن سايكەستىرۋدى كۇشەيتىپ، كوپ جاقتى ساۋدا ءتۇزىلىسىن باتىل قورعاپ، دۇنيە ءجۇزى ەكونوميكاسىنىڭ ارتۋ بىرىككەن كۇشىن اناعۇرلىم ويداعىداي شوعىرلاندىرۋ كەرەك. ەكىنشى، حالىقارالىق كاسىپ سالاسى جۇمىس ءبولىسى سەلبەستىگىن كۇشەيتىپ، ساۋدا مەن قارجى قوسۋدىڭ ەركىن، قولايلى بولۋىن تاباندىلىقپەن ىلگەرىلەتىپ، دۇنيە جۇزىلىك كاسىپ تىزبەگىنىڭ، قامداۋ تىزبەگىنىڭ ورنىقتى، ىركىلىسسىز بولۋىن شىنايى قورعاۋ كەرەك. ءۇشىنشى، حالىقارالىق عىلىم - تەحنيكا اۋىس - كۇيىسى مەن سەلبەستىگىن كۇشەيتىپ، اشىق، ءادىل، كەمسىتپەيتىن عىلىم - تەحنيكانى دامىتۋ ورتاسىن قول ۇستاسا قالىپتاستىرىپ، جاڭالىق اشۋ فاكتورلارىنىڭ اۋىسۋىنا تۇساۋ بولاتىن قامالدى تالقانداۋ كەرەك. ءتورتىنشى، جاسىل دامۋ سەلبەستىگىن كۇشەيتىپ، جاسىلدىقتىڭ ءتۇرلى قورعاندارىن الاستاپ، جاسىل تيپكە بۇرىلىس جاساۋدى بىرگە ىلگەرىلەتىپ، ورتاق، ءبىراق پارىقتى جاۋاپكەرلىك پرينسيبىندە تاباندى بولىپ، بۇكىل جەر شارىنىڭ كليمات وزگەرىسىنە بەلسەنە توتەپ بەرۋ كەرەك. بەسىنشى، وڭتۇستىك پەن سولتۇستىكتىڭ سەلبەستىگىن، وڭتۇستىك پەن وڭتۇستىكتىڭ سەلبەستىگىن كۇشەيتىپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كۇن ءتارتىبىن جاپپاي تياناقتاندىرىپ، دامۋ اڭعارىن توعىستىرىپ، جالپىعا ءتيىمدى، سيىسىمدى دۇنيە ءجۇزى ەكونوميكاسىن كۇش سالا قۇرۋ كەرەك.
لي چياڭ مىنالاردى دارىپتەدى: جۇڭگو − ۋادەسىندە تۇراتىن مەملەكەت، باستان - اياق ەڭ زور ادال نيەتپەن، ەڭ زور قۇلشىنىستار جاساپ، ناقتى تابىستار ارقىلى دۇنيە جۇزىنە جۇڭگونىڭ ەڭ سەنىمدى ەكەنىن دالەلدەدى! جۇڭگو تاياۋ جىلداردان بەرى دۇنيە ءجۇزى دامۋىنىڭ ماڭىزدى قوزعالتقىشى بولىپ، ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، كاسىپ نەگىزى، فاكتور قاسيەتى، جاڭالىق اشۋ قابىلەتى سياقتى نەگىزگى جاعدايلارى جاقسى، ەكونوميكاسىنىڭ ۇزاق ۋاقىت جاقسارۋ جالپى بەتالىسى وزگەرمەيدى، دۇنيە ءجۇزى ەكونوميكاسىنىڭ دامۋىنا ۇزدىكسىز قۋاتتى قوزعاۋشى كۇش ازىرلەيدى. جۇڭگو ەرەن كولەمدى بازارعا يە ءارى سۇرانىستى جەدەل كوبەيتۋ ساتىسىندا تۇر، جاڭاشا قالا - قالاشىقتاندىرۋ، جاسىل تيپكە بۇرىلىس جاساۋ سياقتى جاقتاردا كولەمى زور دامۋ مولشەرىن قالىپتاستىرىپ، دۇنيە ءجۇزى ساۋداسىنىڭ، قارجى قوسۋدىڭ ارتۋىنا اناعۇرلىم كەڭ ءورىس ازىرلەيدى. دۇنيە ءجۇزىنىڭ جاعدايى قالاي وزگەرسە دە، جۇڭگو سىرتقا ەسىك اشۋ سىندى نەگىزگى مەملەكەت ساياساتىندا تاباندى بولادى، اشىق ەسىگى بارعان سايىن ايقارا اشىلادى. جۇڭگو بازارىن تاڭداۋ حاۋىپ - قاتەر ەمەس، قايتا وراي. ءبىز ءار ەل كاسىپورىندارىنىڭ جۇڭگوعا ۇزدىكسىز قارجى قوسۋىن قۇشاق جايا قارسى الامىز، تۇزىمدىك ەسىك اشۋدى ورنىقتى كەڭەيتىپ، شەتەل قارجىسىنىڭ بازارعا كىرۋىنە رۇقسات ەتۋدىڭ شەكتەلگەن سالالار ءتىزىمىن ۇزدىكسىز ازايتىپ، شەتەل ساۋداگەرلەرى قارجى قوسقان كاسىپورىنداردىڭ ازاماتتىق مامىلەسىن قامتاماسىز ەتىپ، بازارلانعان، زاڭمەن جونگە سالىناتىن، حالىقارالانعان ماڭداي الدى ساۋدا ورتاسىن ۇزدىكسىز قۇلشىنا قالىپتاستىرامىز.
ارناۋ سوزدەن كەيىن لي چياڭ جاساندى زەردەنىڭ دۇنيە جۇزىلىك جونگە سالۋداعى قولدانىسى، كوپ جاقتى جۇيە سياقتى ماسەلەلەر جونىندە شۆابتىڭ سۇراۋىنا جاۋاپ بەرىپ، مىنانى دارىپتەدى: ادامدى نەگىز ەتۋدە، جالپىعا ءتيىمدى، سيىسىمدى بولۋدا تاباندى بولىپ، ”شەبەرلىكپەن جونگە سالۋ“ ارقىلى ”شەبەرلىكپەن زەردەلىلەندىرۋدى“ جەبەپ، جاساندى زەردەنىڭ ادامزات وركەنيەتىنىڭ العا باسۋىنا ءتيىمدى بەتالىسقا قاراي دامۋىنا جەتەكشىلىك ەتۋ كەرەك؛ ناعىز كوپ جاقتىلىق بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن نەگىز ەتكەن، جۇڭگو ءوزى ”كەلىسىمدى بۇزىپ، توپتان شەگىنۋمەن“ شۇعىلدانبايدى، باسقا ەلدەردەن ”مايدانىن تاڭداۋدى“ دا تالاپ ەتپەيدى، باستان - اياق كوپ جاقتىلىقتى قورعايتىن بەرىك كۇش بولا بەرەدى.
شۆەتساريا فەدەراتسياسىنىڭ ءتوراعاسى امحەرد، سينگاپوردىڭ زۇڭتۇڭى شاڭدامان، بەلگيانىڭ پاتشاسى فيليپ، رۋاندانىڭ زۇڭتۇڭى كاگامي، گانانىڭ زۇڭتۇڭى اكۋفو ادو، ليۋكسەمبۋرگتىڭ باس ءۋازىرى فريدەن، ەۆروپا وداعى كوميتەتىنىڭ ءتوراعاسى ۆوندەرلەيەن، حالىقارالىق اقشا قورى ۇيىمىنىڭ باسالقاسى گەورگيەۆا، دۇنيە جۇزىلىك ءبىلىم مەنشىك ۇقىعى ۇيىمىنىڭ باس القاسى دىڭ حۇڭسىن، سونداي - اق ءار ەلدەن كەلگەن ساياسي قايراتكەرلەر، ونەركاسىپ - ساۋدا، عىلىم، اقپارات قۇرالدارى سياقتى ءار سالا ۋاكىلدەرىنەن ءبىر مىڭ 500 دەي ادام جوعارىداعى قيمىلعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
