شي جينپيڭ كوكتەم مەرەكەسى قارساڭىندا تيانجينگە بارىپ، نەگىزگى ساتىداعى كادرلارمەن، بۇقارامەن امانداستى، ولاردان حال سۇرادى
2024.02.04 16:46 كەلۋ قاينارى : حالىق تورابى
 |
2 - ايدىڭ 1 - كۇنىنەن 2 - كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تيانجينگە بارىپ، نەگىزگى ساتىداعى كادرلارمەن، بۇقارامەن امانداستى، ولاردان حال سۇرادى. سۋرەتتە: 2 - ايدىڭ 1 - كۇنى تۇستەن كەيىن شي جينپيڭ تيانجين بايىرعى مادەنيەت كوشەسىندە قىزمەت تەكسەرگەندە، بۇكىل ەلدەگى ءار ۇلت حالقىنا جانە شياڭگاڭدىق، اۋمىندىق، تايۋاندىق باۋىرلاستارعا، شەتەلدەگى مۇھاجىر باۋىرلاستارعا كوكتەم مەرەكەسى بايلانىسىمەن ىزگى تىلەك جولدادى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
|
شي جينپيڭ كوكتەم مەرەكەسى قارساڭىندا تيانجينگە بارىپ، نەگىزگى ساتىداعى كادرلارمەن، بۇقارامەن امانداستى، ولاردان حال سۇرادى
بۇكىل ەلدەگى ءار ۇلت حالقىنا كوكتەم مەرەكەسى بايلانىسىمەن ىزگى تىلەك جولدادى
ءار ۇلت حالقىنا باقىت، سالاماتتىق تىلەدى، ۇلى وتاننىڭ گۇلدەنىپ - قۇدىرەتتەنۋىن تىلەدى
ساي چي تەكسەرۋدە بىرگە بولدى
شينحۋا اگەنتتىگى، 2 - ايدىڭ 2 – كۇنى، تيانجين. جۇڭحۋا ۇلتىنىڭ ءداستۇرلى مەرەكەسى − كوكتەم مەرەكەسى قارساڭىندا ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تيانجينگە بارىپ، نەگىزگى ساتىداعى كادرلارمەن، بۇقارامەن امانداستى، ولاردان حال سۇرادى، بۇكىل ەلدەگى ءار ۇلت حالقىنىڭ جانە شياڭگاڭدىق، اۋمىندىق، تايۋاندىق باۋىرلاستاردىڭ، شەتەلدەگى مۇھاجىر باۋىرلاستاردىڭ مەرەكەسىن قۇتتىقتادى! ەل ءىشى - سىرتىنداعى جۇڭحۋا پەرزەنتتەرىنىڭ دەندەرىنىڭ ساۋ، وتباسىلارىنىڭ باقىتتى بولۋىن، ويعا العان ىستەرىنىڭ ورىندالۋىن، ۇلۋ جىلىنىڭ قۇتتى بولۋىن تىلەدى! ۇلى وتاننىڭ مولشىلىققا كەنەلۋىن، ەل امان، جۇرت تىنىش بولۋىن، گۇلدەنىپ - قۇدىرەتتەنۋىن تىلەدى!
2 - ايدىڭ 1 - كۇنىنەن 2 - كۇنىنە دەيىن شي جينپيڭ ج ك پ ورتالىق كوميتەتى ساياسي بيۋروسىنىڭ مۇشەسى، تيانجين قالالىق پارتكومنىڭ شۋجيى چىن مين - ىردىڭ جانە قالا باستىعى جاڭ گۇڭنىڭ سەرىك بولۋىندا، اۋىل - قىستاققا، تاريحي مادەنيەت كوشە اۋماقتارىنا، توڭكەرىستىك ەسكەرتكىش سارايلارىنا بارىپ قىزمەت تەكسەرىپ، تەكسەرۋ - زەرتتەۋ جۇرگىزىپ، نەگىزگى ساتىداعى كادرلار مەن بۇقاراعا پارتيا ورتالىق كوميتەتىنىڭ قامقورلىعى مەن تىلەگىن جەتكىزدى.
2 - ايدىڭ 1 - كۇنى تۇستەن بۇرىن شي جينپيڭ پويەزدەن تۇسە سالا شيچيڭ رايونى شينكوۋ قالاشىعى ديليۋبۋ قىستاعىنا باردى. بىلتىر 7 - ايدىڭ سوڭى مەن 8 - ايدىڭ باس شەنىندە سولتۇستىك جۇڭگو وڭىرىندە قاتتى نوسەر جاۋىپ، حايحى وزەنى الابىندا ەرەكشە اۋىر تاسقىن اپاتى تۋىلىپ، تيانجين دۇڭديان تاسقىن ىركۋ رايونىنىڭ باسىم كوپ اۋماعىن سۋ باسىپ كەتتى. شي جينپيڭ تيانجين قالاسى مەن شيچيڭ رايونىنىڭ اپاتقا ۇشىراۋ جاعدايى جونىندەگى تانىستىرۋدى سول جەردىڭ وزىندە تىڭداپ، جىلىجايعا كىرىپ، كوكونىستىڭ ءوسۋ جاعدايىن تەكسەرىپ كورىپ، كوكونىس وسىرۋشىلەردەن جىلىجايدى قالپىنا كەلتىرۋ جانە كوكونىستى تولىقتاپ ەگۋ، ساتۋ سياقتى جاعدايلاردى ەگجەي - تەگجەيلى ۇعىستى. ول جەرگىلىكتى ورىننىڭ ءوندىرىس ارقىلى ءوزىن قۇتقارۋعا بەلسەنە ۇيىمداستىرىپ، ورايدى مىقتى يگەرە وتىرىپ سۋ قايتقاننان كەيىن جۇمىستى قالپىنا كەلتىرۋ، ەگۋگە بولاتىن جەرلەرگە مۇمكىندىكتىڭ بارىنشا ەگۋ سىندى كۇتىپ وتىرمايتىن، يەك سۇيەمەيتىن ىرىقتىلىق رۋحىن تۇراقتاندىردى، اۋىلداستاردىڭ ماشاقاتتى ەڭبەگىنە، قالانىڭ ”كوجە - قاتىعىن“ مولايتۋ ءۇشىن قوسقان ۇلەسىنە العىس ايتتى.
شي جينپيڭ 4 ۇرپاق بىرگە تۇرمىس كەشىرىپ جاتقان قىستاق تۇرعىنى دۋ حۇڭگاڭنىڭ ۇيىنە بارىپ، ءبىر ءۇيلى جانمەن ىقىلاسپەن اڭگىمەلەسىپ، اپات زيانىن جانە اپاتتان كەيىنگى ءوندىرىستى دامىتۋ، جۇمىستاندىرۋ ارقىلى كىرىستى ارتتىرۋ ەسەبىن ءبىر - بىرلەپ ەسەپتەدى. دۋ حۇڭگاڭ باس شۋجيگە تاسقىن اپاتىندا وتباسىنىڭ 10 نەشە مۋ جەردەگى جۇگەرىسى، كوكونىسى اپاتقا ۇشىراعانىن، پارتيا مەن ۇكىمەتتىڭ كومەگىندە قيىن وتكەلدەن تەز وتكەنىن، اسىرەسە، كوكونىس جىلىجايىنىڭ تەز ارادا قالپىنا كەلتىرىلگەنىن، ماۋسىمدىق كوكونىستەردىڭ جاقسى ءونىم بەرگەنىن ايتتى. كوكتەم مەرەكەسى تاياپ قالدى، وتباسىمىزدىڭ مەرەكەلىك بۇيىمدارى تولىق، قىستاقتا مادەنيەت قيمىلدارى دا ورنالاستىرىلدى، قىستاق تۇرعىندارىنىڭ قۋانىشىندا شەك جوق. شي جينپيڭ بىلاي دەدى: ەل امان، جۇرت تىنىش بولۋدا، جۇرت تىنىش بولعاندا عانا ەل امان بولادى، پارتيا ورتالىق كوميتەتى جانە ءار دارەجەلى پارتكوم مەن ۇكىمەت كوپشىلىكتىڭ اماندىعىن، مۇڭ - مۇقتاجىن قاي - قاشان دا ەستەرىنەن شىعارمايدى، اۋىلداستاردىڭ قوس قولىنا سۇيەنىپ كورىكتى مەكەندى قايتا قۇرىپ، باقىتتى تۇرمىس جاراتۋىن دا ءۇمىت ەتەمىن.
قىستاقتان اتتاناردا قىستاق تۇرعىندارى قاۋمالاي كەلىپ باس شۋجيمەن امانداستى. شي جينپيڭ كوپشىلىككە ءالسىن - ءالى قول بۇلعاپ قۇرمەت ءبىلدىرىپ، اۋىلداستارعا شىن ىقىلاسپەن بىلاي دەدى: كوپشىلىكتىڭ ءوندىرىسى مەن تۇرمىسىنىڭ نەگىزىنەن قالپىنا كەلگەنىن، قىستان توڭباي جىلى ءوتۋى قامتاماسىز ەتىلگەنىن كورىپ قاتتى قۋاندىم. بىلتىر جىل باسىنان بەرى ەلىمىزدىڭ باسقا ءىشىنارا جەرلەرى دە تاسقىن، تايفىڭ داۋىلى، جەر سىلكىنىسى، تاۋ كوشكىنى، تومەن تەمپەراتۋرا، جاڭبىر، قار، مۇز، ۇسىك سياقتى جاراتىلىستىق اپاتتارعا ۇشىرادى، مەن بۇلارعا قاي - قاشان دا نازار اۋدارىپ كەلەمىن. ءار دارەجەلى پارتكوم مەن ۇكىمەت حالىقتى وزەك ەتۋدە تاباندى بولىپ، قالىڭ كادرلار مەن بۇقارا ەل بىرلىگىنەن بەرىك قامال تۇرعىزىپ، ىنتىماقتاسا كۇرەس جۇرگىزىپ، اپاتقا قارسى تۇرىپ، اپاتتان قۇتقارۋدىڭ كەلەلى جەڭىسىنە قول جەتكىزدى. كوكتەم مەرەكەسى تاياپ قالدى، مەن پارتيا ورتالىق كوميتەتى اتىنان اپاتقا ۇشىراعان بۇقارادان جانە اپاتتان كەيىنگى قالپىنا كەلتىرۋ، قايتا قۇرۋدىڭ الدىڭعى شەبىندە كۇرەس جاساپ جاتقان قالىڭ كادرلار مەن بۇقارادان شىنايى حال سۇرايمىن! ءار دارەجەلى پارتكوم مەن ۇكىمەت قىزمەتتى ونان ارى ەگجەي - تەگجەيلى، ناقتى ىستەپ، اپات رايونىنداعى بۇقارانىڭ ءوندىرىسى مەن تۇرمىسىن ويداعىداي ورنالاستىرۋى كەرەك.
سول كۇنى تۇستەن كەيىن شي جينپيڭ تيانجين بايىرعى مادەنيەت كوشەسىنە باردى. كوشە بايىرعى تۇسكە ەنگەن، شي جينپيڭ كوشەنى جاياۋ بويلاپ، ىلگەرىندى - كەيىندى گۇي فاشياڭ 18 - كوشەسىندەگى ماحۋا، گورىنجاڭ، نيرىنجاڭ، ياڭ ليۋ جاستار سۋرەتى سياقتى ەرەكشەلىككە يە دۇكەندەرگە كىرىپ، ونىمدەردىڭ ءتۇرى، ساتىلۋى جانە ءداستۇرلى مادەنيەتتى جالعاستىرۋ، دامىتۋ سياقتى جاعدايلاردى ۇعىسىپ، دۇكەن قوجايىندارىمەن، قىزمەتكەرلەرىمەن جانە سول اراداعى بۇقارامەن اڭگىمەلەسىپ پىكىر اۋىستىردى. ول بىلاي دەدى: ءار دارەجەلى پارتكوم مەن ۇكىمەت مەرەكە كەزىندە حالىق تۇرمىسىنا قاتىستى تاۋارلاردى ءوندىرۋ - ساتۋدى جانە ونىمەن قامداۋدى قامتاماسىزداندىرۋدى كۇشەيتىپ، سانىنىڭ جەتكىلىكتى، ءتۇرىنىڭ مول، ساپاسىنىڭ سەنىمدى بولۋىنا شىنايى كەپىلدىك ەتىپ، قالىڭ بۇقارانىڭ الاڭسىز تۇتىنۋىنا، مەرەكەنى كوڭىلدى وتكىزۋىنە مۇمكىندىك جاساۋى كەرەك. شي جينپيڭ بىلاي دەپ اتاپ كورسەتتى: جۇڭگو ۇلگىسىندەگى وسىزامانداندىرۋ تاڭداۋلى ءداستۇرلى مادەنيەتكە مۇراگەرلىك ەتۋدەن جانە ونى اسقاقتاتۋدان ايرىلا المايدى، تيانجين − وزگەشە ەرەكشەلىككە جانە اسەمدىككە يە قالا، تاريحي مادەنيەت كوشەلەرىن ويداعىداي قورعاپ جانە ودان ويداعىداي پايدالانىپ، ونى وسىزاماندانعان ءىرى قالا قۇرىلىسىندا وزگەشە تۇسكە بولەۋ كەرەك.
كوشەلەردە بارابان ءۇنى اۋەلەپ، ايداعار ءبيى، ارىستان ءبيى كوشەنى دۋمانعا بولەپ، شاتتىققا شومدى. باس شۋجيدىڭ كەلگەنىن كورگەن جۇرت قىزۋ ىنتامەن الاقايلادى. شي جينپيڭ كوپشىلىكتىڭ قاسىنا كەلىپ، تيانجين قالا تۇرعىندارىنىڭ، بۇكىل ەلدەگى ءار ۇلت حالقىنىڭ مەرەكەسىن قۇتتىقتادى. ول بىلاي دەدى: قالا تۇرعىندارى مەن ساياحاتشىلاردىڭ ءداستۇرلى ۇلتتىق سالت - سانا ويىندارىن تاماشالاپ شاتتانعانىن كورىپ، قويۋ مەرەكەلىك ءتۇستى سەزىندىم. ەسكىشە كالەندار بويىنشا جاڭا جىل − ۇلۋ جىلى، ۇلۋ (ايداعار) جۇڭحۋا مادەنيەتىندە ەرلىكپەن ەكپىندەي ىلگەرىلەۋ، شەكسىز ومىرشەڭدىك كۇش، ارمانىنا جەتۋ سياقتى كوپ ءتۇرلى مانگە يە، تاماشا ارمان - تىلەكتى ارقالايدى. كوپشىلىك جاڭا ءبىر جىلعا تولىق سەنىم ارتىپ، تۇرمىستارىن ءتىپتى دە جاقسارتا ءتۇسۋى كەرەك. كوكتەم مەرەكەسى كەزىندە جەر - جەر بۇقارا ۇناتاتىن مادەنيەت قيمىلدارىن كوبىرەك وتكىزىپ، مەرەكەنى ءتىپتى دە دۋماندى، ءتىپتى دە كوڭىلدى وتكىزىڭىزدەر.
2 - ايدىڭ 2 - كۇنى تۇستەن بۇرىن شي جينپيڭ پيڭجين شايقاسى ەسكەرتكىش سارايىن تەكسەرىپ كوردى. ول ءالسىن - ءالى كىدىرىپ، زەر سالا قاراپ، كوپشىلىكپەن پىكىر اۋىستىرىپ، جۇڭگو توڭكەرىسىنىڭ سوعىس تاريحىن ۇيرەنگەن سايىن ءاردايىم پىسىقتاپ، وڭاي - وسپاق قولعا كەلمەگەن قىزىل بيلىكتى قاستەرلەپ، توڭكەرىستىك ءداستۇردى ساۋلەلەندىرىپ، كۇرەس رۋحىن كۇشەيتىپ، العا باسۋ جولىنداعى ءتۇرلى ماشاقاتتى، قيىندىقتى، قاتەردى، كەدەرگىنى باتىلدىقپەن جەڭۋدى دارىپتەدى.
2 - ايدىڭ 2 - كۇنى تۇستەن كەيىن شي جينپيڭ تيانجين قالالىق پارتكوم مەن قالالىق ۇكىمەتتىڭ قىزمەت مالىمەتىن تىڭداپ، تيانجيننىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىردى. ول تيانجيننىڭ نازاردى ەكونوميكالىق قۇرىلىس سىندى وزەكتى قىزمەت پەن ساپالى دامۋ سىندى ماڭداي الدى مىندەتكە شوعىرلاندىرىپ، بەيجيڭ - تيانجين - حىبەيدىڭ سايكەستى دامۋىن ىلگەرىلەتۋدى ستراتەگيالىق جەتەكشى ەتىپ، بورىشتى باتىلدىقپەن ارقالاپ، ءورىس اشا العا ىلگەرىلەپ، جاپپاي سوتسياليستىك وسىزاماندانعان ءىرى قالا قۇرىپ، جۇڭگو ۇلگىسىندەگى وسىزامانداندىرۋدىڭ تيانجين تاراۋىن قۇلشىنا جازۋىن ءۇمىت ەتتى.
شي جينپيڭ بىلاي دەپ اتاپ كورسەتتى: تيانجين بۇكىل ەلدەگى وزىق جاساۋ، زەرتتەۋ - اشۋ بازاسى رەتىندە، عىلىم - تەحنيكا، وقۋ - اعارتۋ بايلىعى مول بولۋ سياقتى ابزالدىقتارىن ساۋلەلەندىرىپ، جاڭا ساپالى وندىرگىش كۇشتەردى دامىتۋدا ەرلىكپەن العا ۇمتىلىپ، شەبەرلىكپەن ءىس تىندىرۋى كەرەك. عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدى بىرگە يگەرۋدە تاباندى بولىپ، عىلىم - تەحنيكادا جاڭالىق اشۋ باقشا رايونى قۇرىلىسىن كۇشەيتىپ، سيفرلى ەكونوميكا مەن ناقتى ەكونوميكانىڭ ىشكەرىلەي توعىسۋىن جەبەپ، جاساۋ كاسىبىنىڭ جوعارى دەڭگەيلى، زەردەلى، جاسىل دامۋىن ىلگەرىلەتۋ كەرەك. بەيجيڭمەن عىلىم - تەحنيكادا جاڭالىق اشۋدا سايكەسۋدى جانە كاسىپ سالاسى جۇيەسىن توعىستىرۋدى كۇشەيتىپ، دۇنيە جۇزىلىك وزىق جاساۋ كاسىبى شوعىرىن كۇش بىرىكتىرە قۇرۋ كەرەك.
شي جينپيڭ بىلاي دەپ دارىپتەدى: رەفورما جاساپ، ەسىك اشۋ − ىستەرىمىزدىڭ دامۋىنداعى ءتۇبىرلى قوزعاۋشى كۇش. تيانجين شىعارىلعان رەفورما شارالارىنىڭ تياناقتاندىرىلۋ جاعدايىن مۇقيات قورىتىندىلاپ، جاعداي مەن مىندەتتىڭ دامۋ وزگەرىسىمەن ۇشتاستىرىپ، جاڭا رەفورما شارالارىن جوسپارلاپ اتقارىپ، رەفورمانىڭ دالدىگىن، باعىتتامالىلىعىن، ونىمدىلىگىن شىنايى جوعارىلاتۋى كەرەك. اسىرەسە، بازار شارۋاشىلىعى نەگىزگى ءتۇزىمىن اقاۋسىزداندىرۋ، ”ەكىدەن تيتتەي دە اۋىتقىماۋدا“ تاباندى بولۋ، اناعۇرلىم جوعارى دەڭگەيدەگى اشىق ەكونوميكالىق جاڭا ءتۇزىلىستى جەدەل ورناتۋ، وڭىرلەردىڭ ءبىر تۇلعالانۋىن جانە بەيجيڭ، تيانجين قالالارىن ءبىر تۇلعالاندىرا دامىتۋ ءتۇزىلىس، مەحانيزمىندە جاڭالىق اشۋدى ىشكەرىلەي ىلگەرىلەتۋ سياقتى جاقتاردا اناعۇرلىم زور ونىمدىلىككە قول جەتكىزۋى كەرەك.
شي جينپيڭ بىلاي دەپ اتاپ كورسەتتى: مادەنيەت ارقىلى ادام باۋلۋ، مادەنيەت ارقىلى حالىققا تيىمدىلىك جاساۋ، مادەنيەت ارقىلى قالانى نارلەندىرۋ، مادەنيەت ارقىلى كاسىپتى گۇلدەندىرۋ، قالانىڭ مادەنيەت ەرەكشەلىگى مەن رۋحاني قاسيەتىن ايگىلەۋ − قالا مادەنيەتىن جالعاستىرۋدىڭ، دامىتۋدىڭ، قالا وركەنيەتىن جەتىلدىرۋدىڭ، نارلەندىرۋدىڭ ماقساتى. تيانجين تاريحي مادەنيەت بايلىعىن ىشكەرىلەي اشىپ، تاريحي مادەنيەت مۇرالارى مەن قىزىل مادەنيەت بايلىعىن قورعاۋدى كۇشەيتىپ، وسى زامانعى مادەنيەت كاسىپ سالاسى جۇيەسىن، بازار جۇيەسىن جانە الەۋمەتتىك مادەنيەتكە قىزمەت وتەۋ جۇيەسىن اقاۋسىزداندىرىپ، ايقىن ەرەكشەلىككە جانە تەرەڭ مانگە يە مادەنيەت ماركاسىن جاراتىپ، تيانجيننىڭ وسىزاماندانۋ جاڭا بەت - بەينەسىن ونان ارى ايگىلەۋى كەرەك.
شي جينپيڭ بىلاي دەپ دارىپتەدى: قالا باسقارۋدى وسىزامانداندىرۋ دەڭگەيىن جوعارىلاتۋ − وسىزاماندانعان ءىرى قالا قۇرۋداعى كەلەلى مىندەت. تيانجين حالىق قالاسى ۇستانىمىن امالياتتا ايگىلەپ، تۇرعىنداردىڭ تىنىش ءومىر، شات - شادىمان تىرشىلىك كەشىرۋىن قامتاماسىزداندىرۋدى ماڭداي الدى ءىرى ءىس ەتىپ، نەگىزگى الەۋمەتتىك قىزمەت وتەۋمەن قامداۋدى بىرتىندەپ كەڭەيتىپ، حالىق تۇرمىسىنىڭ تومەنگى شەگىن بەكەمدەپ، حالىق بۇقاراسىن ۇزدىكسىز جاڭا تابىس سەزىمىنە كەنەلتۋى كەرەك. ماندىك دامۋ جولىمەن جۇرۋدە تاباندى بولىپ، قالا باسقارۋدا جاڭالىق اشىپ، ءتوزىمدى، حاۋىپسىز قالا قۇرىلىسىن كۇشەيتىپ، قالانى جاڭالاۋ ارەكەتىن بەلسەنە اتقارىپ، دامۋ كومەسكى كۇشىن ارتتىرىپ، دامۋ كەڭىستىگىن ساپالىلاندىرىپ، قالانىڭ كاسىپ كۇيىنىڭ، فۋنكتسياسىنىڭ، ساپاسىنىڭ ۇزدىكسىز جوعارىلاۋىن ىلگەرىلەتۋ كەرەك.
شي جينپيڭ بىلاي دەپ اتاپ كورسەتتى: جاڭا ءداۋىر جۇڭگوشا سوتسياليزم يدەياسىن ۇيرەنۋ، دايەكتىلەندىرۋ نەگىزگى تاقىرىپتىق تاربيەسى اياقتاۋ الدىندا تۇر، باياندى مەحانيزمدى اقاۋسىزداندىرىپ، نەگىزگى تاقىرىپتىق تاربيەنىڭ جەتىستىكتەرىن بەكەمدەۋ، كەڭەيتۋ كەرەك. ءار دارەجەلى باسشىلىق القالارى مەن باسشى كادرلار دۇرىس ناتيجە كوزقاراسىن بەرىك ورناتىپ، فورماشىلدىقتى ۇزدىكسىز وڭاپ، نەگىزگى ساتىنىڭ اۋىرتپالىعىن جەڭىلدەتىپ، قالىڭ پارتيا مۇشەلەرى مەن كادرلاردى شىنايى يگەرىپ، ناقتى ىستەۋگە، ءورىس اشا ىلگەرىلەۋگە جەتەكتەپ، پارتيا ورتالىق كوميتەتىنىڭ شەشىمدەرى مەن ورنالاستىرۋلارىنىڭ ناقتىلانۋىن، تياناقتانۋىن بار كۇشپەن ىلگەرىلەتۋق كەرەك.
شي جينپيڭ سوڭىندا بىلاي دەپ دارىپتەدى: كوكتەم مەرەكەسى تاياپ قالدى، ءار دارەجەلى پارتكوم مەن ۇكىمەت حالىق تۇرمىسى مەن حاۋىپسىزدىكتى قامتاماسىزداندىرۋ، زاتتىق ماتەريالدارمەن، ەنەرگيامەن قامداۋدى قامتاماسىزداندىرۋ، قوعامنىڭ جاراسىمدىلىعى، ورنىقتىلىعى سياقتى قىزمەتتەرگە ايرىقشا ءمان بەرىپ، حالىق بۇقاراسىنىڭ كوكتەم مەرەكەسىن بەرەكەلى دە شات - شادىمان وتكىزۋىنە شىنايى كەپىلدىك ەتۋى كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.
لي گانجيە، حى ۋەيدۇڭ، حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار جەكە - جەكە جوعارىداعى قاتىستى قيمىلدارعا بىرگە قاتىناستى.
كەلۋ قاينارى: حالىق تورابى
 |
2 - ايدىڭ 1 - كۇنىنەن 2 - كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تيانجينگە بارىپ، نەگىزگى ساتىداعى كادرلارمەن، بۇقارامەن امانداستى، ولاردان حال سۇرادى. سۋرەتتە: 2 - ايدىڭ 1 - كۇنى تۇستەن بۇرىن شي جينپيڭ شيچيڭ رايونى شينكوۋ قالاشىعى ديليۋبۋ قىستاعىندا قىزمەت تەكسەرگەندە، قىستاق تۇرعىندارىنا قول بۇلعاپ قۇرمەت بىلدىرۋدە. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
|
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
