شي جينپيڭ گەرمانيانىڭ زۇڭليى شولتسپەن كەزدەستى
2024.04.17 16:04 كەلۋ قاينارى : حالىق تورابى
4 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە گەرمانيانىڭ زۇڭليى شولتسپەن كەزدەستى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگى، 4 - ايدىڭ 16 - كۇنى بەيجيڭ (ءتىلشى ياڭ ي - جۇن). 4 - ايدىڭ 16 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە گەرمانيانىڭ زۇڭليى شولتسپەن كەزدەستى.
شي جينپيڭ بىلاي دەپ اتاپ كورسەتتى: بيىل _ جۇڭگو مەن گەرمانيانىڭ جان - جاقتى ستراتەگيالىق سەرىكتەستىك قارىم - قاتىناس ورناتقانىنىڭ 10 جىلدىعى. 10 جىلدان بەرى حالىقارالىق جاعدايدا وراسان زور وزگەرىستەر تۋىلعانىمەن، جۇڭگو – گەرمانيا قارىم - قاتىناسى باستان - اياق ورنىقتى دامىپ، ءار سالاداعى سەلبەستىك ۇزدىكسىز بەكەمدەلىپ جانە تەرەڭدەپ، ەكى ەلدىڭ ءوز - ءوزىنىڭ دامۋىنا قوزعاۋشى كۇش ازىرلەدى. قازىر دۇنيە جۇزىندەگى 100 جىلدىق وزگەرىس جەدەل قۇبىلىپ، ادامزات قوعامى ءدوپ كەلىپ وتىرعان حاۋىپ - قاتەر، سىن - سايىس كوبەيدى، وسى ماسەلەلەردى شەشۋ ءىرى ەلدەردىڭ سەلبەستىگىنەن ايرىلا المايدى. جۇڭگو مەن گەرمانيا _ دۇنيە جۇزىندەگى 2 ـ، 3 - ۇلكەن ەكونوميكالىق تۇلعا، جۇڭگو – گەرمانيا قارىم - قاتىناسىن بەكەمدەۋدىڭ جانە دامىتۋدىڭ ماڭىزى ەكى جاقتى قارىم - قاتىناس كاتەگورياسىنان اسىپ، ازيا - ەۆروپا قۇرلىعىنا، ءتىپتى، تۇتاس دۇنيە جۇزىنە ماڭىزدى ىقپال جاساۋدا. ەكى ەل ەكى جاقتى قارىم - قاتىناسقا ۇزاق بولاشاقتىق جانە ستراتەگيالىق تۇرعىدان مامىلە جاساپ جانە ونى دامىتىپ، قول ۇستاسا وتىرىپ دۇنيە جۇزىنە اناعۇرلىم كوپ ورنىقتىلىق جانە تۇراقتىلىق ۇستەۋى كەرەك.
شي جينپيڭ مىنالاردى دارىپتەدى: جۇڭگو مەن گەرمانيا ادامزات وركەنيەتىنىڭ العا باسۋىنا ەلەۋلى ۇلەس قوسقان. جۇڭگو مەن گەرمانيا اراسىندا ءتۇبىرلى مۇددە قاقتىعىسى جوق، ءوزارا حاۋىپسىزدىك قاتەرىن قالىپتاستىرمايدى. جۇڭگو مەن گەرمانيانىڭ سەلبەستىگى ەكى جاققا دا، دۇنيە جۇزىنە دە ءتيىمدى. دۇنيە ءجۇزى اۋمالى - توكپەلى بولعان سايىن، ەكى جاق ەكى ەل قارىم - قاتىناسىنىڭ توزىمدىلىگى مەن ومىرشەڭدىك كۇشىن ونان ارى جوعارىلاتىپ، جۇڭگو - گەرمانيا قارىم - قاتىناسىنىڭ سەلبەستىك نەگىزگى اۋەنى مەن دامۋ جالپى بەتالىسىندا تاباندى بولىپ، جۇڭگو مەن گەرمانيانىڭ جان - جاقتى ستراتەگيالىق سەرىكتەستىگى سىندى ورىندى مىقتى يگەرۋى كەرەك. جۇڭگونىڭ گەرمانياعا قاراتقان ساياساتى وسكەلەڭ ورنىقتىلىق پەن ۇلاسپالىلىقتى ساقتادى. ەكى جاق ۇزدىكسىز اشىق پەيىلمەن تىعىز بارىس - كەلىس جاساپ، ستراتەگيالىق ءوزارا سەنىمدىلىكتى كۇشەيتۋى كەرەك. ەكى جاق ءوزارا قۇرمەت ەتۋدە، پارىقتاردى ساقتاپ، ورتاقتىققا ۇمتىلۋدا، اۋىس - كۇيىس جاساپ، ءوزارا ۇلگى الۋدا، سەلبەسىپ تەڭ يگىلىككە كەنەلۋدە تاباندى بولسا بولعانى، ەكى ەل قارىم - قاتىناسى، ءسوز جوق، ۇزدىكسىز ورنىقتى، باياندى بولادى.
شي جينپيڭ بىلاي دەپ اتاپ كورسەتتى: جۇڭگو مەن گەرمانيانىڭ كاسىپ سالاسى تىزبەگىنىڭ، قامداۋ تىزبەگىنىڭ تەرەڭدىگى ءوزارا كىرىككەن، ەكى ەل بازارى جوعارى دەڭگەيدە ءبىر - بىرىنە سۇيەنەدى. جۇڭگو مەن گەرمانيانىڭ ءوزارا ءتيىمدى سەلبەستىگى ”حاۋىپ - قاتەر“ ەمەس، قايتا ەكى جاق قارىم - قاتىناسىنىڭ ورنىقتىلىعىنىڭ كەپىلى، بولاشاققا جول اشۋدىڭ ورايى. مەيلى ماشينا جاساۋ، اۆتوموبيل سياقتى ءداستۇرلى سالالاردا بولسىن، الدە جاسىل تيپكە بۇرىلىس جاساۋ، سيفرلاندىرۋ، جاساندى زەردە سياقتى جاڭادان گۇلدەنگەن سالالاردا بولسىن، ەكى ەلدىڭ سەلبەسىپ تەڭ يگىلىككە كەنەلۋدەگى وراسان زور كومەسكى كۇشىن اشۋعا تۋرا كەلەدى. ەكى جاق ءوزارا تيىمدىلىك جەتكىزىپ، تەڭ يگىلىككە كەنەلۋدىڭ ايقىن ەرەكشەلىگىن ساۋلەلەندىرىپ، ءوزارا تابىسقا جەتۋى كەرەك. جۇڭگو ەلەكترلى اۆتوموبيل، ليتي باتەرياسى، فوتوۆولتتىق ونىمدەر سياقتىلاردى ەكسپورت ەتىپ، بۇكىل دۇنيە ءجۇزىنىڭ قامداۋىن بايىتىپ، بۇكىل دۇنيە ءجۇزىنىڭ اقشا قۇنسىزدانۋ قىسىمىن جەڭىلدەتۋمەن بىرگە، بۇكىل دۇنيە ءجۇزىنىڭ كليمات وزگەرىسىنە توتەپ بەرۋىنە جانە جاسىل، تومەن كومىرتەكتى تيپكە بۇرىلىس جاساۋىنا وراسان زور ۇلەس قوستى. جۇڭگو مەن گەرمانيا ساۋدا - ونەركاسىپ ارقىلى مەملەكەت قۇرادى، ەركىن ساۋدانى جانە ەكونوميكانىڭ جاھاندانۋىن قولدايدى. ەكى جاق قورعانىمپازدىقتىڭ باس كوتەرۋىنەن قىراعى بولىپ، بازار كوزقاراسى مەن دۇنيە جۇزىلىك كوز ايادان جازباي، ەكونوميكالىق زاڭدىلىقتى شىعار ءتۇيىن ەتىپ، ءوندىرىس قۋاتى ماسەلەسىنە وبيەكتيۆ، ديالەكتيكالىق تۇرعىدان مامىلە جاساپ، سەلبەستىك جونىندە كوبىرەك ىزدەنىس جاساۋى كەرەك. جۇڭگو سىرتقا ەسىك اشۋ سىندى نەگىزگى مەملەكەت ساياساتىندا تاباندى بولادى، گەرمانيانىڭ جۇڭگو كاسىپورىندارىنىڭ گەرمانياعا بارىپ دامۋىنا ءادىل، جاريالى، اشىق، كەمسىتپەيتىن تيجارات - ساۋدا ورتاسىن ازىرلەۋىن ءۇمىت ەتەدى. جۇڭگو مەن گەرمانيانىڭ دۇنيە ءجۇزىنىڭ كوپ ۇيەكتەنۋ ماسەلەسىندە كوپتەگەن ورتاقتىعى بار. كوپ ۇيەكتەنۋ، ءمانى جاعىنان العاندا، تۇرلىشە وركەنيەت، تۇرلىشە ءتۇزىم، تۇرلىشە جولداعى ەلدەر اراسىنداعى ءوزارا قۇرمەت ەتۋ، بەيبىت قاتار تۇرۋ بولۋعا ءتيىس. جۇڭگو مەن گەرمانيا كوپ جاقتى سالاداعى سەلبەستىكتى دەربەس، ءوز - وزىنە قوجا بولا وتىرىپ ورىستەتىپ، حالىقارالىق قوعامنىڭ ءىس جۇزىندىك ارەكەتى ارقىلى كليمات وزگەرىسى، دامۋدىڭ بىركەلكىسىزدىگى، وڭىرلىك قاقتىعىس سياقتى دۇنيە جۇزىلىك سايىستارعا اناعۇرلىم ويداعىداي توتەپ بەرۋىن ىلگەرىلەتىپ، دۇنيە ءجۇزىنىڭ تەپە - تەڭدىگى مەن ورنىقتىلىعىنا اناعۇرلىم كوپ ۇلەس قوسۋى كەرەك.
شولتس مىنالاردى ءبىلدىردى: قازىر گەرمانيا – جۇڭگو قارىم - قاتىناسىنىڭ دامۋى جاقسى، ەكى جاقتىڭ ءار دارەجەلى، ءار سالاداعى بارىس - كەلىسى تىعىز. ەكى جاق ەكى ەل ۇكىمەتىنىڭ كەڭەسىن، سونداي - اق ستراتەگيا، قازىنا - فينانس سياقتى سالالارداعى جوعارى دارەجەلى تىلدەسۋىن ءساتتى وتكىزدى، الدا تاعى كليمات وزگەرىسى جانە جاسىل تيپكە بۇرىلىس جاساۋ جونىندە پىكىرلەسەدى. وتكەن 2 كۇندە گەرمانيانىڭ كاسىپورىن سالاسىنىڭ ۋاكىلدەرىمەن بىرگە چۇڭچيڭ، شاڭحاي سياقتى جەرلەرگە بارىپ، جۇڭگو ەكونوميكاسىنىڭ تاياۋ جىلداردان بەرى قول جەتكىزگەن وراسان زور تابىستارىن ءوز كوزىممەن كورىپ، گەرمانيا مەن جۇڭگونىڭ كاسىپورىن سالاسىنىڭ تىعىز، تاماشا سەلبەستىگىنەن تەرەڭ اسەر الدىم. گەرمانيا جاق جۇڭگو جاقپەن ەكى ەل قارىم - قاتىناسىن ۇزدىكسىز كۇشەيتىپ، ءار سالاداعى ەكى جاقتى پىكىرلەسۋ مەن سەلبەستىكتى تەرەڭدەتىپ، وقۋ - اعارتۋ، مادەنيەت سياقتى سالالارداعى گۋمانيتارلىق اۋىس - كۇيىستى ىلگەرىلەتۋدى قالايدى، بۇل گەرمانيا مەن جۇڭگو جانە دۇنيە ءجۇزى جونىنەن توتەنشە ماڭىزدى. گەرمانيا جاق جۇڭگو جاقپەن پىكىرلەسۋدى، سايكەسۋدى كۇشەيتىپ، كليمات وزگەرىسى سياقتى دۇنيە جۇزىلىك سايىستارعا بىرگە توتەپ بەرىپ، كوپ جاقتى حالىقارالىق ءتارتىپتى قورعاۋعا كۇش سالىپ، دۇنيە ءجۇزىنىڭ بەيبىتشىلىگى مەن دامۋىن جەبەۋدى قالايدى، قاراما - قارسىلىقتى، قارسىلاسۋدى قۇپتامايدى. گەرمانيا جاق قورعانىمپازدىققا قارسى تۇرادى، ەركىن ساۋدانى قولدايدى. ەۆروپا وداعىنىڭ ماڭىزدى مۇشەسى رەتىندە گەرمانيا ەۆروپا وداعىنىڭ جۇڭگومەن قارىم - قاتىناسىنىڭ تاماشا دامۋىن جەبەۋدە بەلسەندى رول اتقارۋدى قالايدى.
ەكى ەل باسشىلارى ۋكراينا داعدارىسى جونىندە ىشكەرىلەي پىكىر اۋىستىرىپ، جۇڭگو مەن گەرمانيانىڭ بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىنە بويسۇنۋعا كۇش سالىپ، يادرولىق قارۋلاردى ىستەتۋگە نەمەسە بەيبىت يادرولىق قۇرىلعىلارعا شابۋىل جاساۋعا قارسى تۇرىپ، حالىقارالىق استىق حاۋىپسىزدىگى ماسەلەسىن ۇيلەسىمدى شەشىپ، حالىقارالىق ادامگەرشىلىك زاڭىنا بويسۇناتىندارىن ءبىلدىردى.
شي جينپيڭ بىلاي دەپ دارىپتەدى: قازىرگى جاعدايدا قاقتىعىستىڭ بۇراندا فورماسىندا اسقىنۋىنان، ءتىپتى، مەڭگەرۋسىز قالۋىنان ساقتانۋ ءۇشىن، ءارقايسى جاق بەيبىتشىلىكتى ەرتەرەك قالپىنا كەلتىرۋگە بىرگە كۇش سالۋى كەرەك. سوندىقتان مىناداي پرينسيپتەردى يگەرۋ كەرەك: ءبىرىنشى، بەيبىت، ورنىقتى جالپى جاعدايدى ماڭىزدى ورىنعا قويۋ، جەكە مۇددەنى كوزدەمەۋ كەرەك. ەكىنشى، جاعدايدى ساباسىنا ءتۇسىرۋ، وت ۇستىنە ماي قۇيماۋ كەرەك. ءۇشىنشى، بەيبىتشىلىكتى قالپىنا كەلتىرۋگە شارت - جاعداي ازىرلەۋ، قايشىلىقتى ونان ارى ۋشىقتىرماۋ كەرەك. ءتورتىنشى، دۇنيە ءجۇزى ەكونوميكاسىنا جاسايتىن كەرى ىقپالدى ازايتۋ، دۇنيە جۇزىلىك كاسىپ تىزبەگى مەن قامداۋ تىزبەگىنىڭ ورنىقتىلىعىن بۇلدىرمەۋ كەرەك. جۇڭگو جاق ۋكراينا داعدارىسىنا قاتىستى جاق، قاتىناسۋشى جاق ەمەس، ءبىراق ءوز تاسىلىمەن تاتۋلاسۋعا ءناسيحاتتاپ كەلەدى. جۇڭگو داعدارىستى بەيبىت جولمەن شەشۋگە ءتيىمدى بارلىق قۇلشىنىستى شابىتتاندىرادى جانە قولدايدى، رەسەي مەن ۋكراينا ەكى جاق مويىندايتىن، ءارقايسى جاق تەڭ تۇرعىدا ات سالىساتىن، بارلىق بەيبىتشىلىك جوباسى جونىندە ءادىل تالقى جۇرگىزەتىن حالىقارالىق بەيبىتشىلىك ءماجىلىسىن دەر كەزىندە اشۋدى قولدايدى، بۇل جونىندە گەرمانيانى قامتىعان قاتىستى جاقتارمەن تىعىز بايلانىستى ساقتاۋدى قالايدى.
ەكى جاق پالەستين - يزرايل قاقتىعىسى سياقتى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىردى. ەكى جاق تۇگەلدەي بىلاي دەپ قارادى: بىرلەسكەن مەملەكەتتەر ۇيىمى حاۋىپسىزدىك كەڭەسىنىڭ 2728 - ءنومىرلى قارارىن تياناقتاندىرىپ، وقيعانىڭ كەڭەيۋىنەن ساقتانىپ، جاعدايدىڭ ۋشىعۋىنان ساقتانىپ، گازا رايونىنا ادامگەرشىلىك كومەكتىڭ كەدەرگىسىز، باياندى جەتكىزىلۋىنە كەپىلدىك ەتىپ، پالەستين ماسەلەسىنىڭ ”ەكى ەل جوباسى“ نەگىزىندە ەرتەرەك كەلىسسوز ارقىلى شەشىلۋىن قولداپ، ىقپالدى مەملەكەتتەردى ءوڭىردىڭ تىنىشتىعى مەن ورنىقتىلىعىن قورعاۋدا سىندارلى رول اتقارۋعا ۇندەپ، پالەستين ماسەلەسىنىڭ ەرتەرەك جان - جاقتى، ءادىل، باياندى شەشىلۋىن ىلگەرىلەتۋ كەرەك.
كەزدەسۋدەن كەيىن شي جينپيڭ شولتسپەن بىرگە سەيىلدەپ، تۇسكى استا بىرگە بولىپ، كەڭ كولەمدى كەڭەس تاقىرىبى جونىندە ىشكەرىلەي پىكىر اۋىستىردى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
