لي چياڭ گەرمانيانىڭ زۇڭليى شولتسپەن كەڭەس وتكىزدى
2024.04.17 16:07 كەلۋ قاينارى : حالىق تورابى
4 – ايدىڭ 16 – كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن گەرمانيانىڭ زۇڭليى شولتسپەن كەڭەس وتكىزدى. كەڭەستەن بۇرىن لي چياڭ حالىق سارايىنىڭ شىعىس قاقپاسىنىڭ سىرتىنداعى الاڭدا شولتستى قارسى الۋ سالتىن وتكىزدى. سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن
«حالىق گازەتى»، 4 – ايدىڭ 16 – كۇنى، بەيجيڭ (تىلشىلەر چىن شاڭۋىن، ۋاڭ دي). مەملەكەتتىك كەڭەستىڭ زۇڭليى لي چياڭ 4 – ايدىڭ 16 – كۇنى تۇستەن كەيىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن گەرمانيانىڭ زۇڭليى شولتسپەن كەڭەس وتكىزدى.
لي چياڭ مىنالاردى ءبىلدىردى: بيىل _ جۇڭگو مەن گەرمانيانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقانىنىڭ 10 جىلدىعى. ەكى جاقتىڭ بىرگە قۇلشىنۋىندا، قازىر جۇڭگو - گەرمانيا قارىم - قاتىناسىنىڭ دامۋى جالپى جاقتان ورنىقتى بولىپ، تىلدەسۋ مەن سەلبەستىكتە بەلسەندى ىلگەرىلەۋشىلىككە قول جەتتى. ءتوراعا شي جينپيڭ بۇگىن تۇستەن بۇرىن زۇڭلي مىرزامەن كەڭەس وتكىزىپ، ءبىرقىدىرۋ ماڭىزدى ورتاق تانىمعا كەلىپ، جۇڭگو - گەرمانيا قارىم - قاتىناسىنىڭ ىشكەرىلەي دامۋىنا ايقىن باعدار كورسەتتى. جۇڭگو جاق گەرمانيا جاقپەن بىرگە ۇزدىكسىز قۇلشىنىپ، تىلدەسۋ بارىسىندا ءتۇسىنىسۋدى، ءوزارا سەنىمدىلىكتى ارتتىرىپ، سەلبەستىك بارىسىندا ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرىپ، جۇڭگو - گەرمانيا قارىم - قاتىناسىنىڭ ۇزدىكسىز تىڭ ساتىعا كوتەرىلۋىن، تىڭ تابىستارعا قول جەتكىزۋىن ىلگەرىلەتىپ، ەكى ەل حالىقتارىنا ءتىپتى دە زور باقىت جاراتىپ، دۇنيە ءجۇزىنىڭ بىرگە دامۋىن جەبەۋدى قالايدى.
لي چياڭ مىنالاردى اتاپ كورسەتتى: ەكى جاق جۇڭگو - گەرمانيا ۇكىمەتتەرى كەڭەسى سياقتى ءار دارەجەلى كەڭەس مەحانيزمىنىڭ رولىن تولىق ساۋلەلەندىرىپ، ءتۇرلى سەلبەستىكتى ءبىر تۇتاس جوسپارلاپ، سايكەستىرىپ ىلگەرىلەتىپ، ەكى جاق ساۋداسىنىڭ ءتىپتى دە جاقسى، بارابار دامۋىن ىلگەرىلەتىپ، جاڭا ەنەرگيالى اۆتوموبيل، سيفرلى ەكونوميكا، جاساندى زەردە، جاسىل دامۋ سياقتى سەلبەستىكتىڭ جاڭا ارتۋ تۇيىندەرىن جاراتىپ، ادامداردىڭ بارىس - كەلىسىن ىشكەرىلەي كەڭەيتىپ، جەرگىلىكتى ورىندار، مادەنيەت، دەنە تاربيە، جاستار، وقۋ - اعارتۋ، عىلمي زەرتتەۋ سياقتى سالالارداعى اۋىس - كۇيىستى، سەلبەستىكتى اناعۇرلىم زور تەبىنمەن قولداۋى كەرەك. جۇڭگو جاقتىڭ جوعارى دەڭگەيدە ەسىك اشۋدى كەڭەيتۋ بەكىمى وزگەرمەيدى، گەرمانيانىڭ ءتىپتى دە كوپ ساپالى ونىمدەرىن يمپورت ەتۋدى قالايمىز، گەرمانيا سياقتى ءار ەل كاسىپورىندارىنىڭ جۇڭگودا قارجى قوسىپ، شارۋاشىلىقتى گۇلدەندىرۋىنە ءتىپتى دە جاقسى ساۋدا ورتاسىن ازىرلەيمىز. گەرمانيا جاقتىڭ جوعارى تەحنيكالى ونىمدەردى جۇڭگوعا ەكسپورت ەتۋ شەكتەمەسىن جەڭىلدەتىپ، شىنايى شارالار قولدانىپ، گەرمانيا - جۇڭگو قارجى قوسقان كاسىپورىندارعا ءادىل، جاريالى، كەمسىتپەيتىن تيجارات - ساۋدا ورتاسىن ازىرلەۋىن ءۇمىت ەتەمىز.
لي چياڭ مىنالاردى دارىپتەدى: بازاردى جانە دۇنيە ءجۇزىن كوزدە ۇستاپ، ەكونوميكالىق زاڭدىلىقتى شىعار ءتۇيىن ەتىپ، ءوندىرىس قۋاتى ماسەلەسىنە وبەكتيۆ، ديالەكتيكالىق مامىلە جاساۋ كەرەك. بازار تۇرعىسىنان قاراعاندا، ءوندىرىس قۋاتىنىڭ از - كوپتىگىن قامداۋ مەن قاجەتسىنۋ قاتىناسى بەلگىلەيدى، قامداۋ مەن قاجەتسىنۋدىڭ تەپە - تەڭدىگى سالىستىرمالى بولادى، بىركەلكىسىزدىك جاپپاي ءومىر سۇرەدى، ۇيلەسىمدى ءوندىرىستىڭ قاجەتتەن جوعارى بولۋى جۇيەلى باسەكەگە جانە جارامدىسىن الىپ، جارامسىزىن قاتاردان قالدىرۋعا ءتيىمدى. دۇنيە ءجۇزى تۇرعىسىنان قاراعاندا، قامداۋ مەن قاجەتسىنۋ دۇنيە جۇزىلىك سيپات الادى، تۇرلىشە ەلدەردىڭ ءوندىرىس قۋاتىنىڭ جوعارى - تومەندىگىن وزدەرىنىڭ سالىستىرمالى ابزالدىعى بەلگىلەيدى، سەلبەستىكتى كۇشەيتكەندە عانا بىرگە دامۋعا بولادى. جۇڭگونىڭ جاڭا ەنەرگيا كاسىبىنىڭ ابزالدىعى ۇكىمەتتىڭ قوسىمشا قاراجاتىنا سۇيەنىپ ەمەس، قايتا ناعىز ونەرگە سۇيەنىپ قولعا كەلگەن، جۇيەلى بازار باسەكەسى ارقىلى قالىپتاسقان. جۇڭگونىڭ جاڭا ەنەرگيا كاسىبى ۇزدىكسىز قامداعان ساپالى ءوندىرىس قۋاتى دۇنيە ءجۇزىنىڭ جاسىل دامۋىنا ماڭىزدى ۇلەس قوسادى. جۇڭگو گەرمانيامەن، ەۆروپامەن بىرگە ءادىل باسەكەدە، اشىق سەلبەستىكيە تاباندى بولۋدى قالايدى. ەۆروپا جاقتىڭ بازارلاندىرۋ جانە ادىلدىك پرينسيبىن ۇستانىپ، ساۋدالىق قۇتقارۋ شارالارىن بايىپتىلىقپەن قولدانۋىن ءۇمىت ەتەمىن.
شولتس مىنالاردى ءبىلدىردى: جۇڭگو _ گەرمانيانىڭ ماڭىزدى سەلبەستىك سەرىگى. گەرمانيا جاق جۇڭگو جاقپەن بىرگە ءار دارەجەلى پىكىرلەسۋدى، تىلدەسۋدى كۇشەيتىپ، فينانس، اۋىل شارۋاشىلىعى، جاسىل تيپكە بۇرىلىس جاساۋ، تۋىندامالى ەنەرگيا سياقتى سالالارداعى سەلبەستىكتى تەرەڭدەتىپ، مادەنيەت، وقۋ - اعارتۋ، دەنە تاربيە جانە حالىقتىق اۋىس - كۇيىستى ىلگەرىلەتىپ، كليمات وزگەرىسى سياقتى دۇنيە جۇزىلىك سايىستارعا بىرگە توتەپ بەرىپ، گەرمانيا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. گەرمانيا جاق جۇڭگو جاقتىڭ گەرمانياعا ۆيزاسىز شەكارادان كىرۋ ساياساتىن اتقارعانىنا العىس ايتادى، جۇڭگو ازاماتتارىنىڭ گەرمانياعا بارۋىنا اناعۇرلىم كوپ قولايلىلىق جاراتۋدى قالايدى. گەرمانيا قول ۇزۋگە، ساۋدا قورعانىمپازدىعىنا قارسى تۇرادى، جۇڭگومەن بىرگە ءادىل باسەكە ورتاسىن جاراتۋعا قۇلشىنىپ، ەكى جاقتىڭ سەلبەستىگىن كەڭەيتۋدى قالايدى.
ەكى ەل زۇڭليلەرى 7 - كەزەكتى جۇڭگو گەرمانيا ۇكىمەتتەرى كەڭەسى، 3 - كەزەكتى جۇڭگو - گەرمانيا جوعارى دارەجەلى قازىنا - فينانس سۇحپاتى ناتيجەلەرىن ويداعىداي تياناقتاندىرىپ، تۇڭعىش كەزەكتى جۇڭگو - گەرمانيا كىليمات وزگەرىسى جانە جاسىل تيپكە بۇرىلىس جاساۋ جوعارى دارەجەلى سۇحپاتى، جاڭا كەزەكتى جۇڭگو - گەرمانيا جوعارى دارەجەلى حاۋىپسىزدىك سۇحپاتى، 26 - كەزەكتى جۇڭگو - گەرمانيا عىلىم - تەحنيكا سەلبەستى كوميتەتى ءماجىلىسى سياقتى مەحانيزمدىك سۇحپاتتاردى جاقسى وتكىزىپ، كەيىنگى كەزەكتى ۇكىمەت كەڭەسىنە جاقسى دايىندالىپ، ەكونوميكا - ساۋدا، قارجى قوسۋ، عىلىم - تەحنيكا، كاسىپ سالاسى، گۋمانيتارلىق سياقتى سالالارداعى سەلبەستىكتى ۇزدىكسىز تەرەڭدەتۋگە بىردەي ماقۇل بولدى.
كەڭەستەن كەيىن ەكى ەل زۇڭليلەرى جۇڭگو - گەرمانيا ەكونوميكا اقىلشىلار كوميتەتىنىڭ اڭگىمە ماجىلىسىنە بىرگە قاتىناسىپ، اۆتوماتتى توراپ ارقىلى بىرلەسىپ كولىك جۇرگىزۋ، اينالمالى ەكونوميكا، سيىر قۇتىرىق اۋرۋىنان ساقتانۋ جانە ونى تىزگىندەۋ، جاس المانى جۇڭگوعا جەتكىزۋ - كارەنتيندەۋ سياقتى كوپ ءتۇرلى ەكى جاقتى سەلبەستىك قۇجاتتارىنا قول قويۋعا كۋا بولدى ءارى تىلشىلەرمەن كەزدەستى.
كەڭەستەن بۇرىن لي چياڭ حالىق سارايىنىڭ شىعىس قاقپاسىنىڭ سىرتىنداعى الاڭدا شولتستى قارسى الۋ سالتىن وتكىزدى.
ۋ جىڭلۇڭ جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
