شي جينپيڭ گابوننىڭ ۋاقىتتىق زۇڭتۇڭى ىنگۋەمامەن جۇڭگو مەن گابوننىڭ ديپلوماتيالىق قارىم - قاتىناس ورناتقانىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

2024.04.22 16:45 كەلۋ قاينارى : حالىق تورابى

　　شينحۋا اگەنتتىگى، 4 – ايدىڭ 21 – كۇنى، بەيجيڭ. 4 - ايدىڭ 20 - كۇنى مەملەكەت ءتوراعاسى شي جينپيڭ گابوننىڭ ۋاقىتتىق زۇڭتۇڭى ىنگۋەمامەن جۇڭگو مەن گابوننىڭ ديپلوماتيالىق قارىم - قاتىناس ورناتقانىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن قۇتتىقتادى.

　　شي جينپيڭ بىلاي دەپ اتاپ كورسەتتى: جۇڭگو مەن گابون − ءداستۇرلى دوس ەلدەر، ەكى ەلدىڭ دوستىعى ۋاقىت وتكەن سايىن بەكەمدەلە ءتۇستى. جارتى عاسىردان بەرى حالىقارالىق جاعداي اۋمالى - توكپەلى بولسا دا، جۇڭگو مەن گابون باستان - اياق تەڭ تۇرعىدا مامىلە جاساپ، ءبىرىن - ءبىرى قولداپ، ەكى جاقتى قارىم - قاتىناستىڭ ساپاسىن ۇزدىكسىز ارتتىرىپ، دارەجەسىن جوعارىلاتىپ، ەكى ەل حالىقتارىنا ناقتى ىرىس – قۇت جاراتتى. مەن جۇڭگو - گابون قارىم - قاتىناسىنىڭ دامۋىنا ايرىقشا ءمان بەرەمىن، ىنگۋەما زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن جاڭا باستاما ەتىپ، جۇڭگو مەن گابوننىڭ ءداستۇرلى دوستىعىن جالعاستىرىپ، ەكى جاقتى ناقتى سەلبەستىكتى تەرەڭدەتىپ، جۇڭگو مەن گابوننىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ مازمۇنىن بايىتىپ، جوعارى دەڭگەيدەگى جۇڭگو - افريكا تاعدىرلاس ورتاق تۇلعاسىن قول ۇستاسا قۇرۋدى قالايمىن.

　　ىنگۋەما مىنانى ءبىلدىردى: ديپلوماتيالىق قارىم - قاتىناس ورناتقان 50 جىلدان بەرى گابون مەن جۇڭگو ءوزارا سەنىم ارتىپ، شىنايى مامىلە جاسادى، ەكى جاقتى قارىم - قاتىناس ورنىقتى دامىدى، ەكونوميكا، قوعام جانە اسكەري ىستەر سياقتى سالالارداعى ءوزارا ءتيىمدى سەلبەستىكتە سۇبەلى تابىستارعا قول جەتتى. گابون جاق ءبىر جۇڭگو پىرينسىبىندە بەرىك تۇرادى، تايۋان − جۇڭگونىڭ ايرىلماس ءبىر بولەگى دەپ قارايدى. گابون جاق جۇڭگو جاقپەن بىرگە گابون مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز بەكەمدەلۋىن، دامۋىن ىلگەرىلەتىپ، ەكى ەل حالىقتارىن باقىتقا كەنەلتۋدى قالايدى.

　　كەلۋ قاينارى: حالىق تورابى

جاۋاپتى رەداكتورى : مانەپ ەربول ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved