شي جينپيڭ 8 - كەزەكتى جۇڭگو - رەسەي كورمەسىنە قۇتتىقتاۋ حاتىن جولدادى

2024.05.20 16:24 كەلۋ قاينارى : حالىق تورابى

　　شينحۋا اگەنتتىگى، 5 - ايدىڭ 17 – كۇنى، بەيجيڭ. 5 - ايدىڭ 17 - كۇنى مەملەكەت ءتوراعاسى شي جينپيڭ 8 - كەزەكتى جۇڭگو - رەسەي كورمەسىنە قۇتتىقتاۋ حاتىن جولدادى.

　　شي جينپيڭ مىنالاردى اتاپ كورسەتتى: ەكى ەلدىڭ بىرگە قۇلشىنۋىندا، جۇڭگو - رەسەي قارىم - قاتىناسى نىق قاداممەن العا باسىپ، ناقتى سەلبەستىك جەتىستىكتەرى ارقىلى ەكى ەل حالىقتارىن باقىتقا كەنەلتتى. بيىل − جۇڭگو مەن رەسەيدىڭ ديپلوماتيالىق قارىم - قاتىناس ورناتقانىنىڭ 75 جىلدىعى. جاڭا تاريحي باستامادا ەكى ەل قارىم - قاتىناسى جاڭا تاريحي ورايعا ءدوپ كەلىپ، اناعۇرلىم كەڭ دامۋ بولاشاعىن ايگىلەيدى.

　　شي جينپيڭ مىنالاردى باسا دارىپتەدى: كوپ جىلدىق جەتىلدىرۋ، دامىتۋ ارقىلى جۇڭگو - رەسەي كورمەسى ەكى جاقتى ەكونوميكا - ساۋدا سەلبەستىگىن ىلگەرىلەتەتىن ماڭىزدى تۇعىرعا اينالدى. ەكى ەلدىڭ ءار سالاسىنىڭ وسى كەزەكتى كورمە ورايىنان تولىق پايدالانىپ، ىشكەرىلەي اۋىس - كۇيىس جاساپ، ورايدان بىرگە يگىلىكتەنىپ، جۇڭگو مەن رەسەيدىڭ ءوزارا ءتيىمدى سەلبەستىگىن ىلگەرىلەتۋگە بىرگە كەرپىش بولىپ قالانىپ، ەكى ەلدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ دامۋىنا تىڭ قوزعاۋشى كۇش قوسۋىن ءۇمىت ەتەمىن.

　　8 - كەزەكتى جۇڭگو - رەسەي كورمەسىنىڭ نەگىزگى تاقىرىبى ”سەلبەستىك، ءوزارا سەنىمدىلىك، وراي“ بولدى، ساۋدا مينيسترلىگى، حيلۇڭجياڭ ولكەلىك حالىق ۇكىمەتى، رەسەي ەكونوميكانى دامىتۋ مينيسترلىگى، رەسەي ونەركاسىپ جانە ساۋدا مينيسترلىگى بىرگە وتكىزدى، سول كۇنى حيلۇڭجياڭ ولكەسىنىڭ حاربين قالاسىندا اشىلدى.

　　كەلۋ قاينارى: حالىق تورابى

جاۋاپتى رەداكتورى : مانەپ ەربول ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved