شينجياڭنىڭ بۇل جەرلەرىندە ەڭ جوعارى تەمپەراتۋرا 40 سەلتسي گرادۋستان اسادى
تەڭىز دەڭگەيىنەن ەرەكشە بيىك وڭىرلەر ءالى دە قىس ماۋسىمىندا تۇر
2024.05.17 15:51 كەلۋ قاينارى : حالىق تورابى
انار بۇلتى/ شينجياڭ گازەتىنىڭ حابارى. الداعى بىرنەشە كۇندە تەمپەراتۋرا جوعارىلايدى. 5 – ايدىڭ 17 – كۇنىنەن 19 – كۇنىنە دەيىن، شينجياڭنىڭ كوپ جەرىندە تەمپەراتۋرا مەجەمەن 35 سەلتسي گرادۋستان اسادى، ءىشىنارا وڭىرلەردىڭ ەڭ جوعارى تەمپەراتۋراسى 37 سەلتسي گرادۋسقا جەتەدى، ءتىپتى ونان دا جوعارىلاۋى مۇمكىن.
ۇعىسۋعا قاراعاندا، 5 ـ ايدىڭ 15 ـ كۇنىنەن باستاپ، شينجياڭدى جوعارى تەمپەراتۋرالى اۋا رايى شارپىدى. 5 – ايدىڭ 15 – كۇنى ساعات 12 دەن 16 مينۋت وتكەندە، شينجياڭ اۋا رايى ستانسياسى جوعارى تەمپەراتۋرادان ساقتانۋدىڭ قىزعىلت ءتۇستى ساقتىق سيگنالىن جاريالادى، بۇل شينجياڭ اۋا رايى ستانسياسىنىڭ بيىل تۇڭعىش رەت جوعارى تەمپەراتۋرادان ساقتانۋدىڭ ساقتىق سيگنالىن جاريالاۋى. 5 – ايدىڭ 16 – كۇنى تۇستەن بۇرىن، شينجياڭ اۋا رايى ستانسياسى جوعارى تەمپەراتۋرادان ساقتانۋدىڭ ساقتىق سيگنالىن تاعى جاريالادى، مەجەمەن 5 – ايدىڭ 17 – كۇنى كۇندىزدەن 20 ـ كۇنىنە دەيىن وڭتۇستىك شينجياڭ مەن شىعىس شينجياڭنىڭ باسىم كوپ بولەك جەرىندە 35 سەلتسي گرادۋستان جوعارى تەمپەراتۋرا جارىققا شىعادى، ءىشىنارا وڭىرلەردە ەڭ جوعارى تەمپەراتۋرا 37 سەلتسي گرادۋستان جوعارى بولادى، 5 ـ ايدىڭ 19 ـ كۇنىنەن 20 ـ كۇنىنە دەيىن، تۇرپان قالاسىنىڭ، قۇمىل قالاسىنىڭ وڭتۇستىك بولىگى، بايىنعولين وبلىسىنىڭ وڭتۇستىك بولەگى قاتارلى جەرلەردىڭ ءىشىنارا وڭىرلەرىندە 40 سەلتسي گرادۋستان جوعارى بولادى.
ىستىقتىڭ شىرقاۋ شەگى جارىققا شىققان تۇرپان قالاسىندا جۋىقتان بەرى ەڭ جوعارى تەمپەراتۋرا 40 سەلتسي گرادۋس اينالاسىندا بولىپ تۇر. 5 ـ ايدىڭ 16 ـ كۇنى ءۇرىمجى قالاسىندا دا جوعارى تەمپەراتۋرالى اۋا رايى جالعاسىپ، ميدۇڭ رايونىنىڭ ەڭ جوعارى اۋا تەمپەراتۋراسى 38 سەلتسي گرادۋسقا جەتتى. كوپشىلىك ىستىقتان ساقتانۋعا كوڭىل ءبولىپ، دالالىق ارەكەت ۋاقىتىن ازايتىپ، سۋدى كوبىرەك ءىشىپ، دەنەسىنىڭ سۋ قۇرامىن ساقتاۋى كەرەك.
شينجياڭنىڭ كوپ جەرىندە جوعارى تەمپەراتۋرالى اۋا رايى بولۋمەن بىرگە، تەڭىز دەڭگەيىنەن بيىك وڭىرلەر ءالى دە قىس ماۋسىمىندا تۇر. جۇڭگو اۋا رايى تورابى شىعارعان بۇكىل ەلدىڭ جاز ماۋسىمىنا كىرۋ بارىسى كارتاسىنان قاراعاندا، 5 ـ ايدىڭ 15 ـ كۇنىنە دەيىن، شينجياڭنىڭ ءىشىنارا وڭىرلەرى جاز ماۋسىمىنا قادام تاستاعان، تەڭىز دەڭگەيىنەن بيىك وڭىرلەر ءالى دە قىس ماۋسىمىندا تۇر.
5 - ايدىڭ 16 - كۇنى بايىنبۇلاق پەن تاشقورعاندا ەڭ تومەنگى تەمپەراتۋرا جەكە – جەكە 2 سەلتسي گرادۋس، 4 سەلتسي گرادۋس بولدى. الداعى بىرنەشە كۇندە بايىنبۇلاقتىڭ ەڭ تومەنگى تەمپەراتۋراسى 5 سەلتسي گرادۋستان، تاشقورعاننىڭ ەڭ تومەنگى تەمپەراتۋراسى 10 سەلتسي گرادۋستان اسپايدى. ماقتالى كيىمدى شەشۋ كەرەك پە، شەشپەۋ كەرەك پە دەگەن بۇل جەردەگىلەر ٴۇشىن ماسەلە بولدى دەۋگە بولادى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
