پاريج وليمپياداسىنا قاتىناساتىن جۇڭگو ۋاكىلدەر ۇيىرمەسى قۇرىلدى 

حالىق گازەتىنىڭ ءتىلشىسى جىڭ ي، تاۋ شياڭ – ان 7 – ايدىڭ 13 – كۇنى بەيجيڭنەن حابارلايدى. پاريج وليمپياداسىنا قاتىناساتىن جۇڭگو ۋاكىلدەر ۇيىرمەسىن قۇرۋ جانە اتتانىسقا كەلتىرۋ ءماجىلىسى 7 – ايدىڭ 13 – كۇنى مەملەكەتتىك دەنە تاربيە باس مەكەمەسىندە اشىلدى.

33 – كەزەكتى جازدىق وليمپيك سپورت جارىسى 7 – ايدىڭ 26 – كۇنىنەن 8 – ايدىڭ 11 – كۇنىنە دەيىن فرانسيانىڭ پاريج قالاسىندا وتكىزىلەدى. جۇڭگو دەنە تاربيە ۋاكىلدەر ۇيىرمەسى 716 ادامنان قۇرالادى، مۇندا، سپورتشىلاردىڭ سانى 405 ادام، 136 ەر سپورتشىنى، 269 ايەل سپورتشىنى قامتيدى، قىزمەتكەرلەردىڭ سانى 311 ادام.

ۋاكىلدەر ۇيىرمەسىندەگى سپورتشىلاردىڭ ورتاشا جاسى 25 جاس، جاسى ەڭ ۇلكەنى 37 جاستاعى جەڭىل اتلەتيكا سپورتشىسى ليۋ حۇڭ، جاسى ەڭ كىشىسى 11 جاستاعى سىرعىما تاقتا سپورتشىسى جىڭ حاۋحاۋ. جارىسقا قاتىناساتىن سپورتشىلاردىڭ اراسىندا از ۇلتتاردان 26 سپورتشى بار.

سپورتشىلاردىڭ اراسىندا 182 سپورتشى وليمپياداعا بۇرىن قاتىناسقاندار، مۇنىڭ ىشىندە، 177 سپورتشى توكيو وليمپياداسىنا قاتىناسقان. ما لۇڭ، گۇڭ ليجياۋ قاتارلىلار وليمپيادادا اعا جۇلدەگەر بولعان 42 سپورتشى وليمپيادا جارىس الاڭىنا تاعى دا شىعادى. 223 سپورتشى وليمپياداعا تۇڭعىش رەت قاتىناسادى.

پاريج وليمپياداسىندا جيىنى 32 ءىرى ءتۇر بويىنشا 45 تارماق تۇردەگى 329 شاعىن ءتۇر ورنالاستىرىلعان، جۇڭگو دەنە تاربيە ۋاكىلدەر ۇيىرمەسى 30 ءىرى ءتۇر بويىنشا 42 تارماق تۇردەگى 236 شاعىن تۇردەگى جارىستارعا قاتىناسادى، بۇل شەكارا سىرتىنداعى وليمپيادا بويىنشا ەلىمىزدەن ەڭ كوپ سپورتشى قاتىناسقان ءبىر رەتكى وليمپيادا.

قازىر، ءارقايسى تۇرلەر بويىنشا مەملەكەتتىك كوماندالار دايىندالىپ بولىپ، ساقاداي ساي تۇر، الدا پاريج وليمپياداسىنا قاتىناسۋ نىساناسى مەن مىندەتىن ورىنداۋعا تولىق دايىندالدى.

كەلۋ قاينارى: حالىق تورابى