شي جينپيڭ سولومون ارالدارىنىڭ زۇڭليى مانەلەمەن كەزدەستى

7 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن سولومون ارالدارىنىڭ زۇڭليى مانەلەمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

شينحۋا اگەنتتىگى، 7 - ايدىڭ 12 – كۇنى، بەيجيڭ (ءتىلشى جىڭ ميڭدا). 7 - ايدىڭ 12 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن سولومون ارالدارىنىڭ زۇڭليى مانەلەمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو جاق سولومون ارالدارىن جاقسى دوس، جاقسى سەرىك، جاقسى باۋىرلاس دەپ قارايدى، سولومون ارالدارى جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى. جۇڭگو جاق سولومون ارالدارى جاقپەن ستراتەگيالىق بايلانىستى كۇشەيتىپ، ءبىر - ءبىرىنىڭ وزەكتى مۇددەسىن قورعاۋىن جانە ءجىتى قاداعالاپ وتىرعان كەلەلى ىستەرىن باتىل قولداپ، ”ءبىر بەلدەۋ، ءبىر جولدى“ بىرگە قۇرۋدى سولومون ارالدارى جاقتىڭ دامۋ ستراتەگياسىمەن ءتۇيىلىستىرۋدى ىلگەرىلەتىپ، اۋىل - قىستاقتى دامىتۋ، ەمدەۋ قىزمەت وتەۋى، نەگىزدىك قۇرىلعى، باياندى دامۋ، كليمات وزگەرىسىنە توتەپ بەرۋ سياقتى سالالارداعى سەلبەستىكتى تەرەڭدەتىپ، جاڭا داۋىردەگى جۇڭگو - سولومون ارالدارى تاعدىرلاس ورتاق تۇلعاسىن قول ۇستاسا قۇرىپ، ەكى ەل حالىقتارىن اناعۇرلىم ويداعىداي باقىتقا كەنەلتۋدى قالايدى.

شي جينپيڭ بىلاي دەپ باسا دارىپتەدى: جۇڭگو جاق باستان - اياق دەربەس، ءوز - وزىنە قوجايىن بولۋ بەيبىت ديپلوماتيالىق ساياساتىنا تاباندى بولىپ، ءار ەل مەيلى ۇلكەن - كىشى، كۇشتى - ءالسىز، باي - كەدەي بولسىن، بارلىعىنىڭ تەرەزەسى تەڭ بولۋىن دارىپتەيدى. جۇڭگونىڭ سولومون ارالدارى سياقتى تىنىق مۇحيتتاعى ارال ەلدەرىمەن دوستىق سەلبەستىك ورىستەتۋى − ارال ەلدەرىنىڭ دامۋىن جۇزەگە اسىرۋىنا شىن نيەتىمەن كومەكتەسۋى، ”تۇستىك ەلدەر سەلبەستىگى“ اياسىنداعى ءوزارا قارايلاسىپ، ءوزارا كومەكتەسۋى بولىپ تابىلادى، بۇل ”دۇنيە ءجۇزىنىڭ وڭتۇستىگىنىڭ“ بىرگە دامۋ كاتەگورياسىنا جاتادى، 3 - جاققا باعىتتالمايدى، ەشقانداي جەكە مۇددەنى كوزدەمەيدى. جۇڭگو جاق سولومون ارالدارىنىڭ دامۋدى جۇزەگە اسىرۋىنا شاماسىنىڭ جەتىسىنشە ۇزدىكسىز كومەكتەسىپ، بىرلەسكەن مەملەكەتتەر ۇيىمى، تىنىق مۇحيتتاعى ارال ەلدەرى تالقى مىنبەسى سياقتى كوپ جاقتى قۇرىلىمدارداعى سايكەسۋدى، سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

مانەلە مىنالاردى ءبىلدىردى: مەنىڭ وسى رەتكى جۇڭگوداعى ساپارىم فۋجياننان باستالدى، جۇڭگونىڭ دامۋدا قول جەتكىزگەن وراسان زور تابىستارىن شىنايى بايقادىم، سونداي - اق سولومون ارالدارى مەن جۇڭگونىڭ سەلبەستىگىنىڭ وراسان زور كومەسكى كۇشى مەن كەڭ بولاشاعىن سەزىندىم. جۇڭگو وركەندەپ كەلە جاتقان ەلدەرگە ۇلگى ورناتتى. جۇڭگو جاق بۇكىل ادامزاتتىڭ ورتاق قۇندىلىعىن دارىپتەيدى، كوپ جاقتىلىققا تاباندى بولادى، ”شاعىن شەڭبەرمەن“ اينالىسپايدى، وڭىرلىك ساياسيمەن شۇعىلدانبايدى، باسقا ەلدەردەن ءبىر تاراپتى تاڭداپ، سول جاقتا تۇرۋدى تالاپ ەتپەيدى، حالىقارالىق قوعامنىڭ ىنتىماقتى، سەلبەستىكتى كۇشەيتۋىن دارىپتەيدى. اسىرەسە، ءتوراعا شي جينپيڭنىڭ دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن العا قويۋى دۇنيە ءجۇزىنىڭ بەيبىتشىلىگى مەن ورنىقتىلىعىن جانە بىرگە دامۋىن جەبەۋگە ءتيىمدى، سولومون ارالدارى سياقتى شاعىن ەلدەر جونىنەن ءتىپتى دە ماڭىزدى مانگە يە. ”ءبىر بەلدەۋ، ءبىر جولدى“ بىرگە قۇرۋعا ات سالىسۋدىڭ ارقاسىندا سولومون ارالدارى نەگىزدىك قۇرىلعى قۇرىلىسى سياقتى سالالاردا كورنەكتى ىلگەرىلەۋشىلىككە قول جەتكىزدى. سولومون ارالدارى جاق ءبىر جۇڭگو پرينسيبىن باتىل اتقارادى، ءارقانداي فورماداعى ”تايۋاندى دەربەستەندىرۋگە“ باتىل قارسى تۇرادى، جۇڭگو ۇكىمەتىنىڭ مەملەكەتتىڭ تۇتاستىعىن جۇزەگە اسىرۋ ءۇشىن جاساعان بارلىق قۇلشىنىستارىن تاباندىلىقپەن قولدايدى. سولومون ارالدارى جاق سولومون ارالدارى مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىن ونان ارى تەرەڭدەتىپ، سولومون ارالدارى مەن جۇڭگونىڭ تاعدىرلاس ورتاق تۇلعاسىن قۇرۋدى ءۇمىت ەتەدى.

ەكى جاق «جۇڭحۋا حالىق رەسپۋبليكاسى مەن سولومون ارالدارىنىڭ بىرلەسكەن مالىمدەمەسىن» جاريالاپ، جۇڭگو مەن سولومون ارالدارىنىڭ جاڭا داۋىردەگى ءوزارا قۇرمەت ەتۋ، بىرگە دامۋ سىندى جالپى بەتتىك ستراتەگيالىق سەرىكتەستىك قارىم - قاتىناسىن تەرەڭدەتىپ، جاڭا داۋىردەگى جۇڭگو مەن سولومون ارالدارى تاعدىرلاس ورتاق تۇلعاسىن قۇرۋدى ءبىر اۋىزدان قۇپتادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى