الدىڭعى جارتى جىلدا شەتەل ساۋداگەرلەرى قارجى قوسقان كاسىپورىنداردىڭ سانى سايكەس مەزگىلدەگىدەن %14.2 ارتتى (جاڭا ساندى مالىمەت، جاڭا ءتۇيىن)

«حالىق گازەتى»، 7 - ايدىڭ 14 – كۇنى، بەيجيڭ (ءتىلشى لو شانشان). ساۋدا مينيسترلىگى بىرنەشە كۇننىڭ الدىندا جاريالاعان ساندى مالىمەتتە كورسەتىلۋىنشە، بيىل الدىڭعى جارتى جىلدا ەلىمىزدە شەتەل ساۋداگەرلەرى قارجى قوسقان 26 مىڭ 870 كاسىپورىن جاڭادان قۇرىلىپ، سايكەس مەزگىلدەگىدەن %14.2 ارتقان.

2013 - جىلدان 2022 - جىلعا دەيىن ەلىمىزدىڭ شەتەل قارجىسىن باۋراۋ كولەمى حالىق اقشاسى بويىنشا ءۇرتىس 10 جىل ورنىقتى ارتتى. بيىل الدىڭعى جارتى جىلدا ەلىمىزدىڭ شەتەل قارجىسىن باۋراۋ كولەمى 500 ميلليارد يۋانعا تاياپ، تاياۋداعى 10 جىلداعى ەڭ جوعارى ورەدە تۇردى.

كاسىپ سالاسىنان قاراعاندا، الدىڭعى جارتى جىلدا جاساۋ كاسىبىندە ناقتى پايدالانىلعان شەتەل قارجىسى 141 ميلليارد 860 ميلليون يۋان بولىپ، بۇكىل ەل بويىنشا ناقتى پايدالانىلعان شەتەل قارجىسىنىڭ سالىستىرماسى %28.4 كە جەتىپ، وتكەن جىلدىڭ ۇقساس مەزگىلىندەگىدەن 2.4 پايىز جوعارىلادى. جوعارى تەحنيكالى جاساۋ كاسىبىنىڭ ناقتى پايدالانىلعان شەتەل قارجىسى 63 ميلليارد 750 ميلليون يۋان بولىپ، بۇكىل ەل بويىنشا ناقتى پايدالانىلعان شەتەل قارجىسىنىڭ %12.8 ىن ۇستاپ، سايكەس مەزگىلدەگىدەن 2.4 پايىز جوعارىلادى. ەمدەۋ اسپاپتارى مەن جابدىقتارى جانە اسپاپتار مەن كورسەتكىش اسپاپتار جاساۋ كاسىبى، كاسىپتىك تەحنيكالىق قىزمەت وتەۋ كاسىبىنىڭ ناقتى پايدالانىلعان شەتەل قارجىسى سايكەس مەزگىلدەگىدەن جەكە - جەكە %87.5 جانە %43.4 ارتتى.

كەلەسى قادامدا ەلىمىز ءتۇيىندى سالالاردا سىرتقا ەسىك اشۋدى تەرەڭدەتىپ، دالمە - ءدال بولۋ دەڭگەيىن جوعارىلاتىپ، حالىقارالىق ماڭداي الدى ساۋدا ورتاسىن كۇش سالا قالىپتاستىرىپ، شەتەل كاپيتالىمەن قۇرىلعان كاسىپورىنداردىڭ كىرۋىنە، تۇراقتاپ تۇرۋىنا، ويداعىداي دامۋىنا مۇمكىندىك جاسايدى.

كەلۋ قاينارى: حالىق تورابى