قىزمەتكەر قابىلدايمىز دەپ جالعان مالىمەت جاريالاۋ، جۇمىسقا قابىلداعاندا كەمسىتۋشىلىكتىڭ بولۋى قاتارلى جاعدايلارعا باعىتتاي وتىرىپ، ەكى تاراۋ ادام كۇشى بايلىعى بازارىن جۇيەلى باسقارۋدى كۇشەيتەدى

جۇڭگو اقپارات تورابىنىڭ 8 – ايدىڭ 29 – كۇنى بەرگەن حابارى. ادام كۇشى بايلىعى جانە قوعامدىق قامتاماسىزداندىرۋ مينيسترلىگىنىڭ ۋيشين تەكشەسىنىڭ حابارلاۋىنشا، جۋىردا ادام كۇشى بايلىعى جانە قوعامدىق قامتاماسىزداندىرۋ مينيسترلىگى مەن ورتالىقتىڭ ينتەرنەت حاۋىپسىزدىگى جانە ينفورماتسيالاندىرۋ كەڭسەسى «ادام كۇشى بايلىعى بازارىن جۇيەلى باسقارۋدى اناعۇرلىم كۇشەيتۋ تۋرالى ۇقتىرۋدى» بىرگە باسىپ تاراتقان، قازىرگى تاڭدا ادام كۇشى بايلىعى بازارىندا ساقتالىپ وتىرعان قىزمەتكەر قابىلدايمىز دەپ جالعان مالىمەت جاريالاۋ، قىزمەت ىزدەۋشىلەردىڭ جەكەلىك ينفورماتسياسىن جاريالاۋ، جۇمىسقا قابىلداعاندا كەمسىتۋشىلىكتىڭ بولۋى، بەلگىلەمەگە قايشى اقى الۋ قاتارلى كورنەكتى ماسەلەلەرگە نازاردى شوعىرلاندىرا وتىرىپ، باسقارۋ شارالارىن باعىتتامالى تۇردە ورتاعا قويىپ، ەڭبەكشىلەر مەن ادام ىستەتۋشى ورىنداردىڭ زاڭدى ۇقىق – مۇددەسىن شىنايى قامتاماسىزداندىرادى.

«ۇقتىرۋدا» مىنالار ايقىن تۇراقتاندىرىلعان: ادام كۇشى بايلىعى بازارىنا كىرۋگە رۇقسات بەرۋدى باسقارۋدى كۇشەيتىپ، بازارعا كىرۋگە رۇقسات بەرۋ ءتۇزىمىن كەمەلدەندىرۋ، ينتەرنەتتىك تەكشەلەردەگى كاسىپ تانىستىرۋشى دەلدالداردىڭ ارەكەتىن ساراپتاپ تەكسەرۋدى جانە پارىقتاۋدى ورىستەتىپ، قۇلاققاعىس ەتۋگە جانە سەرت بەرۋگە ءتيىستى ىستەردى تەكسەرۋ كەرەك. ينتەرنەت ارقىلى قىزمەتكەر قابىلداۋ جاعىندا قىزمەت وتەۋگە باقىلاۋ – باسقارۋدى كۇشەيتىپ، قىزمەتكەر قابىلداۋ ينفورماتسياسىن باسقارۋدى قاتاڭداستىرىپ، ساندى مالىمەت حاۋىپسىزدىگى مەن جەكەلەردىڭ ينفورماتسياسىن قورعاۋدى كۇشەيتىپ، ينتەرنەتتەگى كاسىپ تانىستىرۋشى دەلدالداردىڭ ارەكەتىن جۇيەگە ءتۇسىرىپ باسقارۋ كەرەك. جۇمىستاندىرۋ جاعىنداعى كەمسىتۋ ارەكەتى جونىندە باقىلاۋ – باسقارۋ جۇرگىزىپ، قىزمەتكەر قابىلداۋ ينفورماتسياسىن باسقارۋ ءتۇزىمىن كەمەلدەندىرىپ، باقىلاۋ – تەكسەرۋ جانە ۇزدىكسىز قاداعالاۋدى كۇشەيتىپ، قىزمەتكەر قابىلداعاندا جىنىس، جاس، ماعلۇمات قاتارلى جاقتاردان كەمسىتكەن مازمۇندار بار قىزمەتكەر قابىلداۋ ينفورماتسياسىن جاريالاۋدان ساقتانۋ كەرەك.

كەلۋ قاينارى: حالىق تورابى