ساحارادا ساياحاتتاعاندا وبا ىندەتىمەن جۇعىمدالۋدان اباي بولعان ءجون 

شينحۋا اگەنتتىگىنىڭ ءتىلشىسى لياڭ جۇن 8 – ايدىڭ 29 – كۇنى لانجوۋدان حابارلايدى. بيىل كوپتەگەن ساياحاتشىلار كەڭ ساحاراعا بارىپ ساياحاتتاۋدا، كەيبىرەۋلەر سۋىرعا جەم بەرىپ، ونىمەن بىرگە تۇسكەن سۋرەتىن ينتەرنەتتە جاريالاۋدى قىزىق كورۋدە، الايدا، بۇلاي ىستەۋدىڭ حاۋىپتى ەكەنىن بىلمەيتىندەر كوپ. اۋرۋدان ساقتانۋ ماماندارى مىنانى ەسكەرتەدى: سۋىر دەنەسىندە وبا باكتەرياسى مەكەندەيتىن حايۋانات. وبا ىندەتىنىڭ تارالۋ قاينارى سانالاتىن ولكە، قالالارعا ساياحاتتاي بارعان كەزدە، ءسوزسىز، سۋىردان الىس جۇرگەن ءجون، سۋىردىڭ تىرناپ الۋىنان، تىستەپ الۋىنان ساقتانىپ، وبا ىندەتىنە شالدىعۋ حاۋپىنەن ساق بولعان ابزال.

سۋرەتتە: ىنىنەن شىققان سۋىر. شينحۋا اگەنتتىگى

ەلىمىزدە وبا ىندەتىنىڭ 12 ءتۇرلى تابيعي ىندەت قاينارى بار، مۇنىڭ بىرەۋى گيمالاي سۋىرى تابيعي ىندەت قاينارى، چيڭحاي، گانسۋ، شينجياڭ، شيزاڭ، سىچۋان قاتارلى جەرلەردەگى كەڭ – بايتاق ۇستىرتتەگى، ساحاراداعى جانە تاۋلى وڭىردەگى جەرلەرگە تارالعان.

گانسۋ ولكەلىك اۋرۋدان ساقتانۋ – تىزگىندەۋ ورتالىعىنىڭ مەڭگەرۋشى شيپاگەرى، گانسۋ ولكەلىك جەرگىلىكتى اۋرۋلاردان ساقتانۋ بىرلەستىگىنىڭ باستىعى شي جينشياۋدىڭ ايتۋىنشا، سۋىردىڭ دەنەسىندە ەلىمىزدەگى A تۇردەگى جۇقپالى اۋرۋ — وبانىڭ باكتەرياسى بار. ەكولوگيالىق ورتانىڭ ۇزدىكسىز جاقسارۋىنا بايلانىستى، سۋىردى قامتىعان ءتۇرلى جابايى حايۋاناتتاردىڭ سانى جىلدان – جىلعا ارتۋدا، ساياحاتشىلاردىڭ ساحارادا سۋىردى كورەتىن، وعان جاقىندايتىن ورايى دا بىرتىندەپ كوبەيۋدە. ادامداردىڭ وبا باكتەرياسىنا بولعان تابيعي يممۋنيتەت قۋاتى جوق، ەگەر تىشقان، سۋىر قاتارلى حايۋاناتتاردى جەسە جانە ونى الىپ جۇرسە، وبا ىندەتىنە شالدىعۋ حاۋپىن ارتتىرادى.

شي جينشياۋ: ”وبا — ادام مەن حايۋانات بىردەي شالدىعاتىن تابيعي اۋرۋ قاينارىندىق اۋرۋ، بۇل اۋرۋدىڭ تۋىلۋى شۇعىل، تارالۋى تەز، ولىمگە دۋشار ەتۋ مولشەرى جوعارى“ دەيدى. وبا ىندەتى — وبا باكتەرياسىنان تارالاتىن وتە جۇقپالى اۋرۋ. باتىس سولتۇستىكتەگى ساحارادا وبانىڭ تارالۋ حاۋپى ءبىرشاما تومەن، الايدا، وبانىڭ تابيعي ىندەت كوزى سانالاتىن وڭىرلەردە، وتە – موتە، حايۋاناتتاردا بولاتىن ىندەتتەر ءجيى تۋىلاتىن وڭىرلەردە، سۋىر مەن تىشقان ۇنەمى بايقالاتىن وڭىرلەردە ادامنىڭ وباعا شالدىعۋ حاۋپى بولادى.

سۋرەتتە: ىنىنەن شىققان سۋىر. شينحۋا اگەنتتىگى

شي جينشياۋ مىنانى ءبىلدىردى: ساياحاتشىلار ساحارادا ساياحاتتاعان كەزدە، اۋىرىپ ولگەن تىشقان تەكتەستەر (سۋىردى قامتيدى)، ءتۇز قويانى، تۇلكى، قاسقىر، ءيت، مىسىق قاتارلى حايۋاناتتارعا جولاماعانى ءجون، ءتۇز حايۋاناتتارىنىڭ تەرىسىن سىدىرماعانى، سويىپ جەمەگەنى ءجون. مۇنان سىرت، ساياحاتشىلار ۇزىن جەڭدى كيىم كيىپ، قۇرت، بۇرگە قاتارلىلاردىڭ شاعۋىنىڭ سەبەبىنەن وبامەن جۇعىمدالۋدان ساقتانعانى ابزال.

كەلۋ قاينارى: حالىق تورابى