جۇڭگو اۋرۋدان ساقتانۋ جانە ونى تىزگىندەۋ ورتالىعى جۋىردا قارتتاردىڭ، سابيلەردىڭ، بالالاردىڭ ادام شوعىرلانعان ورىنعا بارۋىنان مۇمكىندىگىنشە ساقتانۋىن ەسكەرتتى 

10 – ايدىڭ 8 – كۇنى، مەملەكەتتىك دەنساۋلىق ساقتاۋ – سالاماتتىق كوميتەتى اقپار جاريالاۋ ءماجىلىسىن اشتى. جۇڭگو اۋرۋدان ساقتانۋ جانە ونى تىزگىندەۋ ورتالىعىنىڭ زەرتتەرمەنى چاڭ جاۋرۇيدىڭ تانىستىرۋىنشا، جۋىردا تىنىس جولى جۇعىمدالعان ناۋقاستاردىڭ سانى ارتقان، قارتتاردىڭ جانە نارەستەلەردىڭ، بالالاردىڭ جابىق ورتاداعى ادام شوعىرلانعان ورىندارعا بارۋدان مۇمكىندىگىنشە ساقتانعانى ءجون.

چاڭ جاۋرۇي بىلاي دەپ تانىستىردى: كۇز مەزگىلى مەن قىس مەزگىلى — تىنىس جولى جۇقپالى اۋرۋلارى ءجيى تۋىلاتىن مەزگىل، تىنىس جولى جۇعىمدالعان ناۋقاستاردىڭ سانى ءبىرشاما ارتادى. جۋىردان بەرى، تىنىس جولىنىڭ جۇعىمدالۋىن تۋدىراتىن اۋرۋ قاينارلارى، باستىسى، ۆيرۋستار مەن باكتەريالاردى قامتيدى. ۆيرۋستار، باستىسى، جۇقپالى تۇماۋ ۆيرۋسى، جاڭا تيپتى ايدارشا ۆيرۋس، تىنىس جولى بىرىككەن كلەتكالى ۆيرۋسى جانە بەز ۆيرۋسى قاتارلىلار؛ باكتەريالار، باستىسى، وكپەنى قابىندىراتىن تىزبەكتى شارشا باكتەريا قاتارلىلار. مۇنان سىرت، وكپەنى قابىندىراتىن ميكروپلازما، وكپەنى قابىندىراتىن حلاميديا دا تىنىس جولى اۋرۋىنا شالدىقتىرۋى مۇمكىن.

چاڭ جاۋرۇي: ”تىنىس جولى جۇقپالى اۋرۋىنا شالدىقتىراتىن اۋرۋ قاينارى ۇقسامايدى، ولاردىڭ جاسىرىن مەزگىلى دە ۇقسامايدى“ دەيدى. مىسالى، جۇقپالى تۇماۋدىڭ جاسىرىن مەزگىلى ادەتتە 1 – 4 كۇن، كوبىنەسە 2 كۇن بولادى، كوكجوتەلدىڭ جاسىرىن ۋاقىتى 7 – 10 كۇن بولادى. سوندىقتان، تىنىس جولى جۇقپالى اۋرۋلارىنىڭ بەلگىسى بايقالعان ادامدارعا اۋرۋ بەلگىسىن باقىلاۋدى ويداعىداي ىستەۋ كەرەك، ەگەر اۋرۋ بەلگىسى اۋىرلاسسا نەمەسە ۇزاق ۋاقىت بويى جالعاسسا، دەر كەزىندە ەمدەلگەنى ءجون.

بەيجيڭ چاۋياڭ ەمحاناسىنىڭ مەڭگەرۋشى شيپاگەرى تۇڭ چاۋحۇي مىنانى ءبىلدىردى: كۇز بەن قىس مەزگىلىندە كۇن سۋىق بولادى، كۇندىز بەن تۇنگى تەمپەراتۋرانىڭ پارقى زور، تىنىس جولى جۇقپالى اۋرۋلارىنا وڭاي شالدىعۋدان سىرت، سوزىلمالى تىنىس جولى نەگىزدىك اۋرۋى بار ناۋقاستاردىڭ اۋرۋى دا وڭاي قايتالايدى. سوندىقتان، وكپەنىڭ سوزىلمالى توسىلۋى، كەڭىردەكشەنىڭ سوزىلمالى قابىنۋى، كەڭىردەكشەنىڭ كەڭەيۋى قاتارلى اۋرۋلارعا شالدىققاندار كۇز بەن قىس مەزگىلىندە اۋرۋدىڭ اسقىنۋىنان بارىنشا ساقتانعانى ءجون.

چاڭ جاۋرۇي مىنانى ەسكەرتتى: تىنىس جولى جۇقپالى اۋرۋلارى ءجيى تۋىلاتىن مەزگىلدە، جۇرتشىلىقتىڭ تازالىقتى، سالاماتتى تۇرمىس ءتاسىلىن جاقسى ساقتاعانى، سونىمەن بىرگە، يممۋنيتەت ءتارتىبى بويىنشا دەر كەزىندە ۆاكسينا ەكتىرگەنى ءجون. قارتتاردىڭ جانە سابيلەردىڭ، بالالاردىڭ تۇيىق ورتاداعى ادامدار شوعىرلانعان جەرلەرگە بارۋدان مۇمكىندىگىنشە ساقتانعانى ابزال. ەگەر ونداي جەرگە ءسوزسىز بارۋ قاجەت بولسا، ماسكىنى عىلىمي تاعىپ، جۇعىمدالۋ حاۋپىن ازايتقان ءجون. ەگەر وتباسىندا تىنىس جولى جۇقپالى اۋرۋىنا شالدىققان ادام بار بولسا، ناۋقاس ادامنىڭ وتباسىنداعى باسقا ادامدارمەن، وتە – موتە، قارتتارمەن، بالالارمەن جاقىن ارالىقتا جۋىسۋىنان مۇمكىندىگىنشە ساقتانعان ابزال.

كەلۋ قاينارى: حالىق تورابى