شي جينپيڭ اۋمىنعا باردى

12 - ايدىڭ 18 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ارناۋلى ۇشاقپەن اۋمىنعا باردى، 12 - ايدىڭ 20 - كۇنى وتكىزىلەتىن اۋمىننىڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسىنا جانە اۋمىن ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتىنا قاتىناسادى ءارى اۋمىندى كوزدەن كەشىرەدى. سۋرەتتە: شي جينپيڭ مەن پىڭ لييۋان قارسى الا شىققان كوپشىلىككە قۇرمەت بىلدىرۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 12 - ايدىڭ 18 - كۇنى، اۋمىن. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 12 - ايدىڭ 18 - كۇنى تۇستەن كەيىن ارناۋلى ۇشاقپەن اۋمىنعا باردى، 12 - ايدىڭ 20 - كۇنى وتكىزىلەتىن اۋمىن وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسىنا جانە اۋمىن ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتىنا قاتىناسادى ءارى اۋمىندى كوزدەن كەشىرەدى.

ساعات 16 مولشەرىندە شي جينپيڭ وتىرعان ارناۋلى ۇشاق اۋمىن حالىقارالىق اۋەجايىنا باياۋ قوندى. شي جينپيڭ مەن حانىمى پىڭ لييۋان ۇشاق ەسىگىنەن شىعىپ، قارسى الا شىققان كوپشىلىككە قول بۇلعاپ قۇرمەت ءبىلدىردى. اۋمىن ساقشى وركەسترى ىستىق مەرەيگە تولعان قارسى الۋ مۋزىكاسىن ورىنداپ، بيشىلەر ويناقى ايداعار ءبيىن، ارىستان ءبيىن ورىندادى. ۇشاق باسپالداعىنىڭ جانىندا ەكى ءوسپىرىم شي جينپيڭ مەن پىڭ لييۋانعا گۇل ۇسىندى. اۋمىن ەرەكشە اكىمشىلىك رايونىنىڭ اكىمى حى ي - چىڭ مەن حانىمى جىڭ سۋجىننىڭ سەرىك بولۋىندا، شي جينپيڭ مەن پىڭ لييۋان قارسى الا شىققاندارمەن ىقىلاسپەن قول الىستى. نەشە جۇزدەگەن اۋمىندىق جاستار مەن ورەندەر جانە ءار سالا بۇقاراسىنىڭ ۋاكىلدەرى مەملەكەت تۋىن، ەرەكشە اكىمشىلىك رايوننىڭ رايون تۋىن جانە گۇلدەرىن بۇلعاپ، قىزۋ قارسى الاتىندىقتارىن ءبىلدىردى.

شي جينپيڭنىڭ بۇل جولى اۋمىنعا بارۋى ەل ءىشى - سىرتىنىڭ ايرىقشا نازارىن اۋداردى، جۇڭگولىق، شەتەلدىك تىلشىلەر اۋەجايدا كۇتىپ تۇردى. شي جينپيڭ تىلشىلىك رايونىنا بارىپ، سول جەردەگى تىلشىلەرمەن امانداستى. ول مىنانى ءبىلدىردى: ءار جولى كورىكتى اۋمىنعا كەلگەندە ەرەكشە قۋانامىن. بۇل جولى باۋىرلاستارمەن بىرگە اۋمىننىڭ وتان قۇشاعىنا ورالعاندىعىنىڭ 25 جىلدىعىن قۇتتىقتاپ، اۋمىننىڭ وسى بىرنەشە جىلداعى جاڭا دامۋىن، جاڭا وزگەرىسىن كورمەكپىن. ول ورتالىق ۇكىمەت جانە بۇكىل ەلدەگى ءار ۇلت حالقى اتىنان بارلىق اۋمىن تۇرعىندارىنا ىقىلاستى سالەم جولدادى جانە ىزگى تىلەك ءبىلدىردى.

شي جينپيڭ بىلاي دەپ اتاپ كورسەتتى: 25 جىلدان بەرى اۋمىن ەرەكشەلىگىنە يە ”ءبىر ەل، ەكى ءتۇزىم“ امالياتى دۇنيە ءجۇزى جاپپاي مويىنداعان تابىسقا قول جەتكىزىپ، تاسقىنداعان تىرشىلىك تىنىسى مەن وزگەشە تارتىمدىلىعىن ايگىلەدى. مەملەكەتتىڭ دامۋى كۇن سايىن تۇلەجىپ، بوگەۋ بەرمەس ەكپىنمەن دامىپ كەلەدى، اۋمىننىڭ دامۋى مىعىم نەگىزگە يە بولدى، بولاشاقتان ءۇمىت كۇتۋگە بولادى. بۇل − اۋمىن تۇرعىندارىنىڭ داڭقى جانە بۇكىل مەملەكەت حالىقىنىڭ ماقتانىشى. ”ءبىر ەل، ەكى ءتۇزىمنىڭ“ تۇزىمدىك ابزالدىعىن تولىق ساۋلەلەندىرىپ، باتىلدىقپەن كۇرەس جۇرگىزىپ، باتىلدىقپەن جاڭالىق اشقاندا عانا، اۋمىننىڭ اناعۇرلىم كوركەم بولاشاعىن، ءسوز جوق، جاراتۋعا بولادى.

شي جينپيڭ بىلاي دەپ باسا دارىپتەدى: اۋمىن − وتاننىڭ الاقانىنداعى جارقىراعان مەرۋەرت، مەن بۇل ارانىڭ دامۋى مەن بارلىق تۇرعىنداردىڭ باقىتىن ەسىمنەن شىعارعان ەمەسپىن. الداعى بىرنەشە كۇندە ارالاپ، ءار سالاداعى دوستارمەن كەڭ كولەمدە ىشكەرىلەي اڭگىمەلەسىپ، اۋمىننىڭ دامۋ ۇلى جوسپارىن بىرگە اقىلداسامىن.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى لي حۇڭجۇڭ، جۇڭگو كوممۋنيستىك پارتياسى ورتال‍ىق كوميتەتى ساياسي بيۋروسىنىڭ مۇشەسى، ورتالىق اسكەري ىستەر كوميتەتى ءتوراعاسىنىڭ ورىنباسارى حى ۋەيدۇڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسار حى ليفىڭ، مەملەكەتتىك ساياسي كەڭەس ءتوراعاسىنىڭ ورىنباسارى، قوسىمشا باس حاتشىسى ۋاڭ دۇڭفىڭ قاتارلى ساپارلاستارى وسى ۇشاقپەن بىرگە كەلدى. جۇڭگو كوممۋنيستىك پارتياسى ورتالىق كوميتەتى شياڭگاڭ، اۋمىن قىزمەتى كەڭسەسىنىڭ، مەملەكەتتىك كەڭەس شياڭگاڭ، اۋمىن ىستەرى كەڭسەسىنىڭ مەڭگەرۋشىسى شيا باۋلۇڭ الدىن الا كەلىپ، اۋەجايعا بارىپ قارسى الدى.

مەملەكەتتىك ساياسي كەڭەس ءتوراعاسىنىڭ ورىنباسارى حى حوۋحۋا، اۋمىن ەرەكشە اكىمشىلىك رايونىنىڭ ەندى مىندەتكە وتىراتىن اكىمى سىن حاۋحۇي، اۋمىن ەرەكشە اكىمشىلىك رايونىنىڭ مىندەتتەگى اكىمشىلىك، زاڭ شىعارۋ، ءادىليا قۇرىلىمدارىنىڭ جاۋاپتىلارى قاتارلىلار اۋەجايعا بارىپ قارسى الدى.

ورتالىق ۇكىمەتتىڭ اۋمىندا تۇراتىن بايلانىس جاساۋ كەڭسەسىنىڭ مەڭگەرۋشىسى جىڭ شينسۇڭ، سىرتقى ىستەر مينيسترلىگىنىڭ اۋمىنعا ارناۋلى جىبەرىلگەن قىزمەتكەرلەر مەكەمەسىنىڭ ارناۋلى قىزمەتكەرى ليۋ شيانفا، جۇڭگو حالىق ازاتتىق ارمياسىنىڭ اۋمىنداعى اسكەري ءبولىمىنىڭ قولباسشىسى يۇي چاڭجياڭ، كوميسسارى لين چيڭحۋا قاتارلىلار دا اۋەجايعا بارىپ قارسى الدى.

كەلۋ قاينارى: حالىق تورابى