شي جينپيڭ اۋمىن ەرەكشە اكىمشىلىك رايونى ۇكىمەتىنىڭ قارسى الۋ كەشكى قوناعاسىنا قاتىناستى ءارى ماڭىزدى ءسوز سويلەدى

12 - ايدىڭ 19 - كۇنى كەشتە مەملەكەت ءتوراعاسى شي جينپيڭ اۋمىن ەرەكشە اكىمشىلىك رايونى ۇكىمەتىنىڭ قارسى الۋ كەشكى قوناعاسىنا قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

«حالىق گازەتى»، 12 - ايدىڭ 19 - كۇنى، اۋمىن (تىلشىلەر شۇي جۇن، ۋاڭ جوۋ). مەملەكەت ءتوراعاسى شي جينپيڭ 12 - ايدىڭ 19 - كۇنى كەشتە اۋمىن ەرەكشە اكىمشىلىك رايونى ۇكىمەتىنىڭ قارسى الۋ كەشكى قوناعاسىنا قاتىناستى ءارى ماڭىزدى ءسوز سويلەدى. شي جينپيڭ بىلاي دەپ اتاپ كورسەتتى: وتكەن 5 جىل اۋمىن تاريحىنداعى وزگەشە 5 جىل بولدى، دۇنيە جۇزىندەگى 100 جىلدىق وزگەرىستىڭ جەدەل وزگەرۋى مەن عاسىر ىندەتىنىڭ قاتاڭ سىناعى الدىندا 5 - كەزەكتى ەرەكشە اكىمشىلىك رايون ۇكىمەتى اۋمىن قوعامىنىڭ ءار سالاسىنداعىلاردى ىنتىماقتاستىرىپ جانە باستاپ، قيىندىققا قارسى اتتانىپ، ناقتى ىستەر تىندىرىپ، ەكونوميكانىڭ ۇزدىكسىز جاقسارۋىن ىلگەرىلەتىپ، ءتۇرلى ىستەردى جاپپاي العا باستىرىپ، اۋمىن ەرەكشەلىگىنە يە ”ءبىر ەل، ەكى ءتۇزىمنىڭ“ تابىستى امالياتىنىڭ شىت جاڭا تاراۋىن جازدى.

اۋمىن شىعىس ازيا سپورت جينالىسى دەنە تاربيە سارايىنىڭ قوناعاسى زالى دۋماندى مەرەيگە شومدى. ساعات 18 مولشەرىندە شي جينپيڭ مەن حانىمى پىڭ لييۋان اۋمىن ەرەكشە اكىمشىلىك رايونىنىڭ اكىمى حى ي - چىڭ مەن حانىمى جىڭ سۋجىننىڭ سەرىك بولۋىندا زالعا كىردى، تۇتاس الاڭداعىلار ورىندارىنان تۇرىپ، شاپالاق سوعىپ قارسى الدى.

قىزۋ قول شاپالاق ءۇنى ىشىندە شي جينپيڭ ىستىق ىقىلاسقا تولى ءسوز سويلەدى. ول اۋەلى ورتالىق ۇكىمەت جانە بۇكىل ەلدەگى ءار ۇلت حالقى اتىنان بارلىق اۋمىن تۇرعىندارىنا جانە اۋمىننىڭ دامۋىنا كوڭىل بولگەن، قولداۋ كورسەتكەن حالىقارالىق دوستارعا ىقىلاستى سالەم جولدادى جانە ىزگى تىلەك ءبىلدىردى.

شي جينپيڭ مىنالاردى ءبىلدىردى: وتكەن 5 جىلدا اۋمىن ەكونوميكاسىنىڭ ۇيلەسىمدى كوپ نەگىزدى دامۋى جاڭا ناتيجەلەرگە قول جەتكىزىپ، حالىق تۇرمىسىنىڭ قۇت - ىرىس دەڭگەيى تىڭ ساتىعا كوتەرىلىپ، وتاندى ءسۇيۋدىڭ، اۋمىندى ءسۇيۋدىڭ ساياسي، قوعامدىق نەگىزى كۇن سايىن بەكەمدەلىپ، حالىقاراداعى ىقپالى مەن تانىمالدىعى بارىنشا جوعارىلادى. وسى 5 جىلدا اۋمىننىڭ دامۋىندا قول جەتكەن كورنەكتى ناتيجەلەر − ”ءبىر ەل، ەكى ءتۇزىم“ باعىتىن جاپپاي، دۇرىس دايەكتىلەندىرۋدىڭ ارقاسى، ورتالىق ۇكىمەت پەن وتاننىڭ ىشكى وڭىرلەرىنىڭ زور كۇشپەن قولداۋىنىڭ ارقاسى، حالىقارالىق قوعامنىڭ بەلسەنە ات سالىسۋىنىڭ ارقاسى، مۇنى ەرەكشە اكىمشىلىك رايون ۇكىمەتى قوعامنىڭ ءار سالاسىنداعىلارمەن ىنتىماقتاسا وتىرىپ قاجىرلىلىقپەن قۇلشىنىپ، قول سالا ىستەپ جاراتتى.

شي جينپيڭ مىنالاردى ءبىلدىردى: اۋمىن ”ءبىر ەل، ەكى ءتۇزىم“ سىندى وسى ءبىر وزگەشە ابزالدىققا يە، دامۋدىڭ بەرىك نەگىزىن قالادى، مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ قۋاتتى شىعىس جەلىنىڭ دەمەۋىمەن اناعۇرلىم بيىككە ۇشۋعا، اناعۇرلىم الىسقا بارۋعا، اناعۇرلىم جاقسى دامۋدى جۇزەگە اسىرۋعا شارت - جاعدايى، قارىمى ابدەن جەتەدى.

شي جينپيڭ اۋمىنعا 3 جاقتان تىلەك ءبىلدىردى، ءبىرىنشى، بيىكتە تۇرىپ الىسقا كوز جىبەرىپ، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسى سياقتى مەملەكەتتىڭ دامۋ ستراتەگياسىمەن اناعۇرلىم بەلسەندى، ىرىقتى تۇردە ۇشتاسىپ، حالىقارالىق ساحنادا اناعۇرلىم زور ىسكەرلىك كورسەتۋ كەرەك. ەكىنشى، ءبارىن قامتىپ، وتاندى ءسۇيۋ، اۋمىندى ءسۇيۋ تۋى استىندا اناعۇرلىم اشىق، سيىسىمدى بولىپ، ىنتىماقتاسا كۇش بىرىكتىرىپ، جاھانداعى دارىندىلاردى كەڭىنەن قابىلداپ، كورىكتى اۋمىندى بىرگە قۇرۋ كەرەك. ءۇشىنشى، قايراتتانا العا ۇمتىلىپ، اناعۇرلىم زور باتىلدىقتى ايگىلەپ، باتىلدىقپەن رەفورما جاساپ، جاڭالىق اشىپ، ”ءبىر ەل، ەكى ءتۇزىمنىڭ“ تۇزىمدىك ابزالدىعىن اناعۇرلىم ويداعىداي ساۋلەلەندىرىپ، اۋمىن دامۋىنىڭ جاڭا جاعدايىن اشۋ كەرەك.

شي جينپيڭ مىنالاردى ءبىلدىردى: ۇلى وتاننىڭ بەرىك ارتقى تىرەك بولۋىندا اۋمىن ەرەكشە اكىمشىلىك رايونى، ءسوز جوق، كۇش ۇستىنە كۇش قوسىپ، قايراتتانا ءىس تىندىرىپ، جاڭا شارىقتاۋدى جۇزەگە اسىرىپ، جاڭا شۇعىلالى ناتيجە جاراتا الادى (ءسوزدىڭ تولىق مازمۇنىن «حالىق گازەتىنىڭ» 2 - بەتىنەن وقي الاسىزدار).

حى ي - چىڭ ارناۋ سوزىندە مىنالاردى ءبىلدىردى: اۋمىننىڭ وتان قۇشاعىنا ورالعاندىعىنىڭ 25 جىلدىعى قارساڭىندا، ءتوراعا شي جينپيڭ اۋمىنعا تاعى دا كەلدى، بۇل − اۋمىن ەرەكشە اكىمشىلىك رايونىنىڭ ءىرى ءىسى، قۋانىشتى ءىسى جانە سالتاناتتى ءىسى. ءتوراعا شي جينپيڭنىڭ اۋمىنعا دەگەن تەرەڭ سۇيىسپەنشىلىگى، ىقىلاستى قامقورلىعى اۋمىندىق باۋىرلاستاردى تەرەڭ شابىتتاندىرىپ، ايرىقشا داڭققا بولەدى. اۋمىن وتان ۇلى شاڭىراعىنىڭ ءبىر مۇشەسى رەتىندە، جاڭا ءداۋىردىڭ جاڭا جورىعىندا جاڭا جاۋاپكەرلىك ارقالاپ، تىڭ ىسكەرلىك كورسەتىپ، مەملەكەتتى قۇدىرەتتەندىرۋ قۇرىلىسىنا، ۇلتتىڭ گۇلدەنۋى ۇلى ىسىنە اناعۇرلىم زور ۇلەس قوسادى. مەن ءتوراعا شي جينپيڭنىڭ شىنايى قامقورلىعى مەن ورتالىق ۇكىمەتتىڭ زور كۇشپەن قولداۋىندا، 6 - كەزەكتى اكىم سىن حاۋحۇي مىرزانىڭ جاڭا كەزەكتى ەرەكشە اكىمشىلىك رايون ۇكىمەتىنە جانە قوعامنىڭ ءار سالاسىنداعىلارعا جەتەكشىلىك ەتىپ، اۋمىن ەرەكشەلىگىنە يە ”ءبىر ەل، ەكى ءتۇزىم“ امالياتىنىڭ جاڭا تاراۋىن جازاتىندىعىنا كامىل سەنەمىن.

ساي چي، لي حۇڭجۇڭ، حى ۋەيدۇڭ، حى ليفىڭ، ۋاڭ شياۋحۇڭ، ۋاڭ دۇڭفىڭ، شيا باۋلۇڭ قاتارلىلار قارسى الۋ كەشكى قوناعاسىنا قاتىناستى.

مەملەكەتتىك ساياسي كەڭەس ءتوراعاسىنىڭ ورىنباسارى حى حوۋحۋا، شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ ەندى مىندەتكە وتىراتىن اكىمى سىن حاۋحۇي، بۇرىنعى اكىمى سۇي شى - ان، اۋمىن ەرەكشە اكىمشىلىك رايونى ۇكىمەتىنىڭ نەگىزگى ءمانساپتىلارى، اۋمىنداعى ءار سالا ۋاكىلدەرى قاتارلىلار دا كەشكى قوناعاسىعا قاتىناستى.

كەلۋ قاينارى: حالىق تورابى