شاعىن قىدىرما جۇلدىز جەر شارىنا سوعىلا ما؟ ماماندار الاڭداۋدىڭ قاجەتى جوق ەكەنىن ايتتى 

جۋىردا، ”2024YR4“ اتتى شاعىن قىدىرما جۇلدىز ”8 جىلدان كەيىن جەر شارىنا سوعىلۋى مۇمكىن“ دەگەن اقپارات ينتەرنەتتە قىزۋ تالقى قوزعادى.

جۇڭگونىڭ استرونوميا ماماندارىنىڭ ايتۋىنشا، قازىرگى سوعىلۋ ىقتيمالدىعى تەك مەجەلەنگەن ءمان عانا، قازىر ونان دا ماڭىزدىسى ۇزدىكسىز باقىلاۋ مەن وربيتاسىن ەسەپتەۋ. بولاشاقتا ادامزاتقا ايقىن حاۋىپ توندىرگەن كۇننىڭ وزىندە دە، قورعاناتىن امال دا وتە كوپ، جۇڭگو قازىر ”جەرگە جاقىن شاعىن قىدىرما جۇلدىزداردان قورعانۋ جۇيەسىن“ ورنالاستىرا باستادى، دۇنيە جۇزىندەگى عالىمدار دا ”قىدىرما جۇلدىزداردان ساقتانۋدى“ دانەكەر ەتكەن سەلبەستىك ورىستەتۋدە.

وسىنىڭ الدىنداعى حابار:

”2024YR4“ شاعىن قىدىرما جۇلدىزى 2024 – جىلى 12 – ايدىڭ 27 – كۇنى تۇڭعىش رەت بايقالعان. مەجەگە قاراعاندا، بۇل شاعىن قىدىرما جۇلدىزدىڭ ديامەترى 40-90 مەتر بولىپ، ءبىر عيماراتتىڭ ۇلكەندىگىمەن قارايلاس ەكەن.

2025 - جىلى 1 – ايدان بەرى، NASA استرونومدارى تەلەسكوپپەن وسى شاعىن قىدىرما جۇلدىزدى وكشەلەي باقىلاعان. قازىر بۇل شاعىن قىدىرما جۇلدىزدىڭ جەر شارىنان قاشىقتىعى 48 ميلليون كيلومەتردەن اسادى. سوعىلۋ ىقتيمالدىعى وتە از بولعانىمەن، استرونومدار اناعۇرلىم ناقتى تۇيىندەردى بايقاۋ ءۇشىن ونى ءجىتى باقىلاۋدا.

حاباردا بىلاي دەلىنگەن: ”2024YR4“ شاعىن قىدىرما جۇلدىزىنىڭ ۇلكەن-كىشىلىگى پلانەتالارعا ”اسا حاۋىپتى“ شاعىن قىدىرما جۇلدىزدارمەن سالىستىرعاندا الدە قايدا كىشكەنە. ”پلانەتالارعا اسا حاۋىپتى“ شاعىن قىدىرما جۇلدىزدار دەپ ديامەترى ءبىر كيلومەتر نەمەسە ودان دا ۇلكەن كەلەتىن عارىشتىق تاۋ جىنىستارى ايتىلادى، ولار تىرشىلىككە ويرانداۋ سيپاتتى ىقپال جاساۋى مۇمكىن. مەجەگە قاراعاندا، دينوزاۆردىڭ تۇقىمىنىڭ قۇرۋىن تۋدىرعان شاعىن قىدىرما جۇلدىزدىڭ ديامەترى شامامەن 10 كيلومەتر ەكەن.

كەلۋ قاينارى: حالىق تورابى