مەملەكەتتىك ساياسي كەڭەس 14 - كەزەكتى كوميتەتىنىڭ 3 - ءماجىلىسى بەيجيڭدە اشىلدى

3 - ايدىڭ 4 - كۇنى تۇستەن كەيىن جۇڭگو حالىق ساياسي ءماسليحات كەڭەسى 14 - كەزەكتى مەملەكەتتىك كوميتەتىنىڭ 3 - ءماجىلىسى بەيجيڭدەگى حالىق سارايىندا اشىلدى. سۋرەتتە: شي جينپيڭ، لي چياڭ، جاۋ لىجي، ساي چي، ديڭ شۋەشياڭ، لي شي، حان جىڭ ءتوراعالار مىنبەسىنەن ورىن الدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

مەملەكەتتىك ساياسي كەڭەستىڭ ءتوراعاسى ۋاڭ حۋنيڭ ساياسي كەڭەس 14 - كەزەكتى مەملەكەتتىك كوميتەتى تۇراقتى كوميتەتى اتىنان ماجىلىسكە قىزمەتتەن بايانداما جاسادى.

سۋرەتتى شينحۋا اگەنتتىگىنىڭ ءتىلشىسى ليۋ ۋەيبيڭ تۇسىرگەن

شينحۋا اگەنتتىگى، 3 – ايدىڭ 4 – كۇنى، بەيجيڭ. زەيىن - زەردە، كۇش - قۋاتتى شوعىرلاندىرىپ، كوركەم جۇڭگو كارتيناسىن بىرگە كەستەلەپ، قايراتتانا العا ۇمتىلىپ، تاعى دا تىڭ ءداۋىردىڭ داستانىن جازۋدا. جۇڭگو حالىق ساياسي ءماسليحات كەڭەسى 14 - كەزەكتى مەملەكەتتىك كوميتەتىنىڭ 3 - ءماجىلىسى 3 - ايدىڭ 4 - كۇنى تۇستەن كەيىن حالىق سارايىندا اشىلدى. مەملەكەتتىك ساياسي كەڭەستىڭ 2000 نان استام مۇشەسى جۇڭگو كوممۋنيستىك پارتياسى ورتالىق كوميتەتىنىڭ شەشىمدەرى مەن ورنالاستىرۋلارىن توڭىرەكتەپ، پارتيا مەن مەملەكەتتىڭ وزەكتى مىندەتىن تىعىز ارقاۋ ەتىپ، مىندەت اتقارىپ، جاۋاپكەرشىلىك وتەپ، ۇكىمەت ءىسىن بەلسەنە كەڭەسىپ، اقىل - كەڭەس بەرىپ، كەڭ كولەمدە ورتاق تانىم ۇيىستىرىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋگە اقىل - پاراسات جانە كۇش - قۋات توپتادى.

ناۋرىز ايىنداعى بەيجيڭدە كوكتەم سامالى ەسەدى. حالىق سارايىنىڭ ۇلكەن زالىندا شىراقتار جاقۇتتاي جارقىراپ، زال سالتاناتتى، دۋماندى مەرەيگە شومدى. جۇڭگو حالىق ساياسي ءماسليحات كەڭەسىنىڭ گەربى ءتوراعالار مىنبەسىنىڭ تورىنە ءىلىنىپ، ەكى جاعىنا بەستەن نارت قىزىل تۋ قويىلعان.

مەملەكەتتىك ساياسي كەڭەس 14 - كەزەكتى كوميتەتىنىڭ 3 - ماجىلىسىنە قاتىناسۋعا ءتيىستى مۇشە 2154 ادام، ناقتى قاتىناسقانى 2110 ادام، بۇل بەلگىلەمەدەگى ادام سانىنا ۇيلەسەدى.

مەملەكەتتىك ساياسي كەڭەستىڭ ءتوراعاسى ۋاڭ حۋنيڭ، مەملەكەتتىك ساياسي كەڭەس ءتوراعاسىنىڭ ورىنباسارلارى شى تايفىڭ، حۋ چۇنحۋا، شىن يۋەيۋە، ۋاڭ يۇڭ، جوۋ چياڭ، پابالا گىلەلاڭجيە، حى حوۋحۋا، لياڭ جىنيىڭ، باتىر، سۋ حۇي، شاۋ حۇڭ، گاۋ يۇنلۇڭ، چىن ۋ، مۋ حۇڭ، شيان حۇي، ۋاڭ دۇڭفىڭ، جياڭ شينجى، جياڭ زوجۇن، حى باۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن ءتوراعالار مىنبەسىنىڭ الدىڭعى قاتارىنان ورىن الدى.

پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ساي چي، ديڭ شۋەشياڭ، لي شي، حان جىڭ قاتارلىلار ءتوراعالار مىنبەسىنەن ورىن الىپ، ءماجىلىستىڭ اشىلعاندىعىن قۇتتىقتادى.

تۇستەن كەيىن ساعات 3 تە شى تايفىڭ ءماجىلىستىڭ اشىلعاندىعىن جاريالادى، زالداعىلار تۇگەل ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.

ءماجىلىس الدىمەن ساياسي كەڭەس 14 - كەزەكتى مەملەكەتتتىك كوميتەتى 3 - ءماجىلىسىنىڭ كەڭەستىك ءتارتىبىن قاراپ ماقۇلدادى.

ۋاڭ حۋنيڭ ساياسي كەڭەس 14 - كەزەكتى مەملەكەتتىك كوميتەتى تۇراقتى كوميتەتى اتىنان ماجىلىسكە قىزمەتتەن بايانداما جاسادى.

ۋاڭ حۋنيڭ مىنالاردى ءبىلدىردى: 2024 - جىل − جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى، ”14 - بەسجىلدىق“ جوباداعى نىسانا - مىندەتتەردى جۇزەگە اسىرۋداعى شەشۋشى جىل. شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، وزگەرىستەرگە بايىپپەن توتەپ بەرىپ، كەشەندى شارا قولدانىپ، تۇتاس جىلداعى ەكونوميكالىق، قوعامدىق دامۋدىڭ باستى نىسانا - مىندەتتەرى ءساتتى ورىندالىپ، جۇڭگو ۇلگىسىندەگى وسىزامانداندىرۋدا كەلەلى تىڭ تابىستارعا قول جەتىپ، بۇكىل پارتيانىڭ، بۇكىل ەلدەگى ءار ۇلت حالقىنىڭ جاڭا داۋىردەگى جۇڭگوشا سوتسياليزمنىڭ تىڭ جەڭىسىنە قول جەتكىزۋ بەكىمى مەن سەنىمى اناعۇرلىم بەكەمدەلدى.

ۋاڭ حۋنيڭ وتكەن جىلداعى حالىق ساياسي كەڭەسىنىڭ قىزمەتىن قورىتىندىلادى. ول بىلاي دەدى: 2024 - جىل − حالىق ساياسي كەڭەسى قۇرىلعاندىعىنىڭ 75 جىلدىعى. باس شۋجي شي جينپيڭ جۇڭگو حالىق ساياسي ءماسليحات كەڭەسى قۇرىلعاندىعىنىڭ 75 جىلدىعىن قۇتتىقتاۋ جينالىسىندا ماڭىزدى ءسوز سويلەپ، جاڭا ءداۋىردىڭ جاڭا جورىعىنداعى حالىق ساياسي كەڭەسى ىستەرىنىڭ دامۋىنا العا باسۋ بەتالىسىن كورسەتىپ، ءتۇبىرلى تياناق ازىرلەدى. شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، ساياسي كەڭەس مەملەكەتتىك كوميتەتى جانە ونىڭ تۇراقتى كوميتەتى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، جۇڭگو كوممۋنيستىك پارتياسى 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، پارتيا باسشىلىعىنىڭ، بىرلىكساپتىڭ، كەڭەستىك دەموكراتيانىڭ ورگانيكالى ۇشتاسۋىنا تاباندى بولىپ، حالىق ساياسي كەڭەسىنىڭ سيپاتى مەن ورنىنا تاباندى بولىپ، نازاردى پارتيا مەن مەملەكەتتىڭ وزەكتى مىندەتىنە شوعىرلاندىرىپ، مىندەت اتقارىپ، جاۋاپكەرشىلىكتى وتەۋگە تاباندى بولىپ، حالىق ساياسي كەڭەسىنىڭ حالىق ءۇشىن قىزمەت ەتۋىنە تاباندى بولىپ، مىندەت اتقارۋ قابىلەتى قۇرىلىسىن رەفورما، جاڭالىق جاراتۋ رۋحىمەن ىلگەرىلەتۋگە تاباندى بولدى. جۇڭگو كوممۋنيستىك پارتياسىنىڭ باسشىلىعىن ساياسي كەڭەس قىزمەتىنىڭ بارلىق جاعىندا تياناقتاندىرىپ، باس شۋجي شي جينپيڭنىڭ جۇڭگو حالىق ساياسي ءماسليحات كەڭەسى قۇرىلعاندىعىنىڭ 75 جىلدىعىن قۇتتىقتاۋ جينالىسىندا سويلەگەن ماڭىزدى ءسوزىنىڭ رۋحىن ۇيرەنۋدى، دايەكتىلەندىرۋدى ەڭ ماڭىزدى ورىنعا قويىپ، باس شۋجي شي جينپيڭنىڭ حالىق ساياسي كەڭەسى قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسىن ونان ارى ءتۇسىنىپ، نازاردى رەفورمانى ونان ارى جاپپاي تەرەڭدەتۋگە، جۇڭگو ۇلگىسىندەگى وسىزامانداندىرۋدى ىلگەرىلەتۋگە شوعىرلاندىرىپ، ارناۋلى كوميتەتتەردىڭ نەگىزدىك رولىن بەلسەنە ساۋلەلەندىرىپ، ساياسي كەڭەس مۇشەلەرىنىڭ مىندەت اتقارۋ بەلسەندىلىگىن، ىرىقتىلىعىن، جاسامپازدىعىن تاسقىنداتىپ، ءتۇرلى قىزمەتتەردە تىڭ ىلگەرىلەۋشىلىككە قول جەتكىزدى.

ۋاڭ حۋنيڭ مىنالاردى ءبىلدىردى: 2025 – جىل − ”14 - بەسجىلدىق“ جوبا اياقتالاتىن جىل، سونداي - اق رەفورمانى ونان ارى جاپپاي تەرەڭدەتۋدەگى ماڭىزدى جىل. حالىق ساياسي كەڭەسى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، جۇڭگو كوممۋنيستىك پارتياسى 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، باس شۋجي شي جينپيڭنىڭ جۇڭگو حالىق ساياسي ءماسليحات كەڭەسى قۇرىلعاندىعىنىڭ 75 جىلدىعىن قۇتتىقتاۋ جينالىسىندا سويلەگەن ماڭىزدى ءسوزىنىڭ رۋحىن دايەكتىلەندىرىپ، تياناقتاندىرىپ، جۇڭگو كوممۋنيستىك پارتياسى ورتالىق كوميتەتىنىڭ شەشىمدەرى مەن ورنالاستىرۋلارىن جانە حالىق ساياسي كەڭەسى قىزمەتى جونىندەگى تالاپتارىن تياناقتاندىرۋ، ەل ءىشى - سىرتىنداعى جۇڭحۋا ۇلاندارىنىڭ اقىل - پاراساتى مەن كۇش - قۋاتىن ۇيىستىرۋ سىندى ساياسي جاۋاپكەرشىلىكتى شىنايى ارقالاپ، وزەكتى ارقاۋ ەتۋگە، جالپى جاعدايعا قىزمەت ەتۋگە تاباندى بولىپ، ”14 - بەسجىلدىق“ جوباداعى نىسانا - مىندەتتەردى جوعارى ساپامەن ورىنداۋعا دەم بەرىپ، ”15 - بەسجىلدىق“ جوبانىڭ تاماشا باستاماسىن جۇزەگە اسىرۋعا بەرىك نەگىز قالاۋى كەرەك.

ۋاڭ حۋنيڭ مىنالاردى ءبىلدىردى: جۇڭگو كوممۋنيستىك پارتياسىنىڭ حالىق ساياسي كەڭەسىنە جاپپاي باسشىلىعىنا تاباندى بولىپ، پارتيانىڭ جاسامپاز نازارياسىمەن قارۋلانۋدى ۇزدىكسىز تەرەڭدەتىپ، يدەيالىق - ساياسي جەتەكشىلىكتى كۇشەيتىپ، كەڭ كولەمدە ورتاق تانىم ۇيىستىرىپ، جۇڭگو ۇلگىسىندەگى وسىزامانداندىرۋدى ىلگەرىلەتۋمەن تىعىز بايلانىستىرىپ، ۇكىمەت ءىسىن كەڭەسىپ، اقىل - كەڭەس بەرىپ، حالىق ساياسي كەڭەسىنىڭ كەڭەستىك دەموكراتيا مەحانيزمىن اقاۋسىزداندىرىپ، ءسوزسىز، جەڭىسكە جەتۋ سەنىمىن بەكەمدەپ، ەكپىندەي ىلگەرىلەيتىن كۇش ۇيىستىرىپ، جاڭا ءداۋىردىڭ جاڭا جورىعىندا حالىق ساياسي كەڭەسى قىزمەتىنىڭ تىڭ ساتىعا كوتەرىلۋىن ىلگەرىلەتىپ، ىنتىماقتاسا كۇرەس جۇرگىزۋ ورتاق يدەيالىق - ساياسي نەگىزىن ۇزدىكسىز بەكەمدەپ، جۇڭگو ۇلگىسىندەگى وسىزامانداندىرۋ ءۇشىن جۇرت تىلەگىن، ورتاق تانىمدى، اقىل - پاراساتتى، كۇش - قۋاتتى كەڭ كولەمدە ۇيىستىرۋ كەرەك.

مەملەكەتتىك ساياسي كەڭەس ءتوراعاسىنىڭ ورىنباسارى جياڭ زوجۇن ساياسي كەڭەس 14 - كەزەكتى مەملەكەتتىك كوميتەتىنىڭ تۇراقتى كوميتەتى اتىنان ماجىلىسكە ساياسي كەڭەس 14 - كەزەكتى مەملەكەتتىك كوميتەتىنىڭ 2 - ماجىلىسىنەن بەرگى ۇسىنىس جوبا قىزمەتى جاعدايىنان بايانداما جاسادى. مەملەكەتتىك ساياسي كەڭەس 14 - كەزەكتى كوميتەتىنىڭ 2 - ماجىلىسىنەن بەرى جيىنى 6019 ۇسىنىس جوبا ورتاعا قويىلدى، تەكسەرۋ ارقىلى 5091 ۇسىنىس جوبا ەستەلىككە الىندى، %99.9 ۇسىنىس جوبا ءبىر جاقتى ەتىلىپ، جاۋاپ قايتارىلدى. ۇسىنىس جوبالاردا جۇڭگو ۇلگىسىندەگى وسىزامانداندىرۋدى ىلگەرىلەتۋ، رەفورمانى ونان ارى جاپپاي تەرەڭدەتۋ، جوعارى ساپالى دامۋدى ىلگەرىلەتۋ، قوعامنىڭ جاراسىمدىلىعى مەن ورنىقتىلىعىن قورعاۋ سياقتىلار تىعىز توڭىرەكتەلىپ، ءبىر توپ ۇسىنىس - پىكىر ەكونوميكالىق، قوعامدىق دامۋدى ىلگەرىلەتۋدىڭ ساياساتتىق شارالارىنا اينالىپ، قاتىستى دامۋ جوباسىندا، زاڭ - ەرەجەلەردە جانە تۇزىمدىك قۇجاتتاردا تياناقتاندىرىلىپ، ۇسىنىس جوبانىڭ رولى ونان ارى ايگىلەندى.

ما شيڭرۇي، ۋاڭ ي، يىن لي، ليۋ گوجۇڭ، لي گانجيە، لي شۋلەي، لي حۇڭجۇڭ، حى ۋەيدۇڭ، حى ليفىڭ، جاڭ يوۋشيا، جاڭ گوچيڭ، چىن ۋىنچيڭ، چىن جينيڭ، چىن مين - ىر، يۋان جياجۇن، حۋاڭ كۇنميڭ، ليۋ جينگو، ۋاڭ شياۋحۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭۋەي، لوساڭ جياڭسۇن، شوكىرات زاكىر، ۋ جىڭلۇڭ، شىن ي - چين، جاڭ جۇن، يىڭ يۇڭ قاتارلى باسشى جولداستار دا ءتوراعالار مىنبەسىنەن ورىن الدى.

جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك حالىق قۇرىلتايى تۇراقتى كوميتەتىنىڭ، مەملەكەتتىك كەڭەستىڭ قاتىستى تاراۋلارىنداعى جاۋاپتى جولداستار ۇسىنىس بويىنشا اشىلۋ ماجىلىسىنە سىرتتاي قاتىناستى. شەتەلدەردىڭ جۇڭگودا تۇراتىن ەلشىلەرى، شەتەلدەگى حۋاچياۋلار قاتارلىلار ۇسىنىس بويىنشا اشىلۋ ماجىلىسىنە قاتىناستى.

كەلۋ قاينارى: حالىق تورابى