شيزاڭنىڭ رىكازى قالاسىندا تۋىلعان 6.8 بال جەر سىلكىنىسى اپاتىنان كەيىن 47 مىڭ 300 دەن استام وقۋشى ۋاعىندا وقۋ باستادى 

جۇڭگو اقپارات تورابىنىڭ ءتىلشىسى جياڭ فيبو، شيە مۋ 3 – ايدىڭ 5 – كۇنى رىكازىدان حابارلايدى. 3 ـ ايدىڭ 5 ـ كۇنى شيزاڭ اۆتونوميالى رايونى رىكازى قالاسىنداعى ورتا، باستاۋىش مەكتەپتەردىڭ كوكتەمگى وقۋ باستاۋ كۇنى. رىكازى قالالىق ۇكىمەتتىڭ تانىستىرۋىنا قاراعاندا، 1 – ايداعى جەر سىلكىنىسىندە ديڭرى ، لازى، ديڭجيە، ساجيا، اڭرىن سىندى 5 اۋدانداعى 243 مەكتەپ اپاتقا ۇشىراعان، بۇل مەكتەپتەردە وقيتىن وقۋشىلاردىڭ سانى 47 مىڭ 600 وقۋشى بولاتىن. 3 – ايدىڭ 5 – كۇنى 308 وقۋشى جۇمىس سەبەبىنەن، اۋرۋ سەبەبىنەن رۇقسات الۋدان سىرت، 47 مىڭ 300 دەن استام وقۋشى مەكتەپكە قالىپتى كەلىپ وقۋ باستاعان.

1 – ايدىڭ 7 – كۇنى ساعات 9 دان 5 مينۋت وتكەندە، شيزاڭ اۆتونوميالى رايونى رىكازى قالاسى ديڭرى اۋدانىندا 6.8 بال جەر سىلكىنگەن. وسى رەتكى جەر سىلكىنىسىندە ديڭرى اۋدانىنداعى 79 مەكتەپ تۇرلىشە دارەجەدە بۇلىنگەن، مۇنىڭ ىشىندە 76 مەكتەپ حاۋىپتەن ارىلتىپ جوندەۋ جانە بەكەمدەپ جوندەۋ ارقىلى حاۋىپسىز وقۋ باستاۋ شارت - جاعدايىنا جەتكەن. چاڭدۋ اۋىلى، سوگو اۋىلى، چۇيلو اۋىلىنداعى 3 باستاۋىش مەكتەپ اۋىر دارەجەدە ءبۇلىنىپ، بۇكىل مەكتەپتى قايتادان سالۋعا تۋرا كەلگەن. رىكازى قالاسى بۇل 3 مەكتەپتە ”ءبولىپ ورنالاستىرۋ، جاقىن ماڭدا وقۋعا ءتۇسىرۋ“ ءتاسىلىن قولدانىپ، 1479 وقۋشىنى اۋدان قالاشىعىنداعى 1 ـ ورتالاۋ مەكتەپكە، اۋداندىق 1 ـ باستاۋىش مەكتەپكە، اۋداندىق 2 ـ باستاۋىش مەكتەپكە، اۋداندىق پارتكومنىڭ پارتيا مەكتەبىنە كوشىرىپ ورنالاستىرعان.

رىكازى قالاسى ديڭرى اۋداندىق وقۋ – اعارتۋ مەكەمەسىنىڭ باستىعى ۋاڭ رىن بىلاي دەدى: جەر سىلكىنىسى تۋىلعاننان كەيىن، وقۋ – اعارتۋ تاراۋلارى تۇتاس اۋدانداعى مەكتەپتەردى ءبىر - بىرلەپ تەكسەرىپ، اپات ءبىرشاما اۋىر بولعان 3 مەكتەپتى ءبىر تۇتاس جوسپارلاپ - ورنالاستىرىپ، ۋاعىندا وقۋ باستاۋعا كەپىلدىك ەتتى. تۇتاس اۋدانداعى مەكتەپتەر وقىتۋشى ـ قىزمەتكەرلەردى ساباقحانا، اسحانا، جاتاق قاتارلىلاردى تازالاۋعا الدىن الا ۇيىمداستىرىپ، وقۋشىلاردىڭ وقۋلىعىن ۇستەلگە دايىنداپ قويىپ، بالالارعا مەيىرگە تولى ۇيرەنۋ ورتاسىن جاراتتى.

ۇعىسۋعا قاراعاندا، شيزاڭداعى وقۋ – اعارتۋ تاراۋلارى ديڭرى اۋدانىندا ورتا، باستاۋىش مەكتەپتەردەگى پسيحيكالىق اقاۋسىزدىق جاعىنداعى تىرەكتى وقىتۋشىلاردىڭ ءبىلىم اسىرۋ كۋرسىن الدىن الا ورىستەتكەن، وقۋ باستالعاننان كەيىن، وسى تىرەكتى وقىتۋشىلارعا سۇيەنىپ، وقۋشىلارعا پسيحيكالىق جاقتان قولداۋ كورسەتىلەدى ەكەن.

كەلۋ قاينارى: حالىق تورابى