جاۋ لىجي 14 - كەزەكتى مەملەكەتتىك حالىق قۇرىلتايىنىڭ 3 - ماجىلىسىنە قاتىناسقان اقپارات قىزمەتكەرلەرىنە امانداسا باردى

شينحۋا اگەنتتىگى، 3 - ايدىڭ 12 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 3 - ايدىڭ 12 - كۇنى تۇستەن كەيىن بەيجيڭدەگى حالىق سارايىندا 14 - كەزەكتى مەملەكەتتىك حالىق قۇرىلتايى 3 - ءماجىلىسىنىڭ اقپاراتتىق حابارلاۋىنا قاتىناسقان ورتالىقتاعى نەگىزگى اقپارات ورىندارىنداعى جاۋاپتى جولداستار مەن اقپارات قىزمەتكەرلەرىنە امانداسا بارىپ، حالىق قۇرىلتايى ءتوراعالار القاسى مەن مەملەكەتتىك حالىق قۇرىلتايىنىڭ تۇراقتى كوميتەتى اتىنان قۇرىلتايدىڭ اقپارات ۇگىتىنە قاتىناسقان بارلىق اقپارات قىزمەتكەرىنەن حال سۇرايتىندىعىن جانە راقىمەت ايتاتىندىعىن ءبىلدىردى. ول بىلاي دەپ اتاپ كورسەتتى: پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىندا، ءماجىلىس حاتشىلار باسقارماسى، ءارقايسى قاتىستى تاراۋلار، نەگىزگى اقپارات ورىندارى ىنتىماق، ورنىقتىلىق، شابىتتاندىرۋ، ۇنامدى جاقتاعى ۇگىتتى نەگىز ەتۋ باعىتىنا تاباندى بولىپ، دۇرىس جولدان جازباي، جاڭالىق اشىپ، ءماجىلىستىڭ اقپارات - ۇگىت قىزمەتىن بار كۇشپەن ويداعىداي ىستەپ، پارتيا ورتالىق كوميتەتى تاپسىرعان كەلەلى ساياسي مىندەتتى تابىسپەن ورىندادى.

جاۋ لىجي بىلاي دەپ اتاپ كورسەتتى: نەگىزگى اقپارات ورىندارى ۇگىتتەۋ، حابارلاۋ قيمىلىن دەن قويا جوسپارلاپ جانە ۇيىمداستىرىپ، جالىندى دا ومىرشەڭ، جاراسىمدى، سيىسىمدى، ىنتىماقتاسا العا باسقان، قايراتتانا العا ۇمتىلعان تاماشا راي قالىپتاستىردى. ءبىرىنشى، باس شۋجي شي جينپيڭنىڭ ماڭىزدى قيمىلدارىن كورنەكتىلەندىرىپ حابارلادى. جوعارى ولشەمگە، قاتاڭ تالاپقا تاباندى بولىپ، باس شۋجي شي جينپيڭنىڭ ءماجىلىس كەزىندەگى ماڭىزدى قيمىلدارىن شوعىرلى حابارلاپ، باس شۋجي شي جينپيڭ العا قويعان جاڭا كوزقاراستاردى، جاڭا تۇجىرىمداردى، جاڭا تالاپتاردى ىشكەرىلەي ۇگىتتەپ، باس شۋجي شي جينپيڭنىڭ ۋاكىلدەرمەن مەملەكەت ىستەرىن بىرگە اقىلداسۋى جونىندەگى تارتىمدى اڭگىمەلەرى مەن اسەرلى ساتتەرىن جاندى بەينەلەپ، باس شۋجيدىڭ كوسەمدىك قاسيەتى مەن حالىققا دەگەن سۇيىسپەنشىلىگىن تولىق ايگىلەدى. ەكىنشى، سەنىم مەن كۇش - قۋاتتى جەتكىزدى. ءماجىلىستىڭ نەگىزگى تاقىرىبىن تىعىز ارقاۋ ەتىپ، وتكەن ءبىر جىلدا ەلىمىزدىڭ ەكونوميكالىق، قوعامدىق دامۋىندا قول جەتكەن تىڭ تابىستاردى بەلسەنە ۇگىتتەپ، پارتيا ورتالىق كوميتەتىنىڭ جاعداي جونىندەگى عىلمي تۇجىرىمىن، شەشىمدەرى مەن ورنالاستىرۋلارىن ىشكەرىلەي ءتۇسىندىرىپ، جۇڭگو ەكونوميكاسىنىڭ بولاشاعى نۇرلى دەيتىن ايتىلىمدى بارىنشا اسقاقتاتىپ، جۇڭگو ەكونوميكاسىنىڭ اسا زور سەرپىمدىلىگى مەن ۇزاق ۋاقىت جاقسارۋ بەتالىسىن تولىق ايگىلەدى. اقپار جاريالاۋ ءماجىلىسىنىڭ، تىلشىلەر ءماجىلىسىنىڭ، ”ۋاكىلدەر ءدالىزىنىڭ“، ”مينيسترلەر ءدالىزىنىڭ“ حابارلارى دۇرىس، تولىق بولىپ، تاماشا ونىمدىلىككە قول جەتكىزدى. ءۇشىنشى، ناقتى، جوعارى ءونىمدى دەموكراتيالىق امالياتتى ايگىلەدى. حالىق قۇرىلتايى قىزمەتىنىڭ جاڭا ونىمدىلىكتەرىن، جاڭا تاجىريبەلەرىن ىشكەرىلەي حابارلاپ، حالىق قۇرىلتايى ۋاكىلدەرىنىڭ، اسىرەسە، نەگىزگى ساتىنىڭ ءبىرىنشى شەبىندەگى ۋاكىلدەردىڭ مىندەت وتەۋ كەلبەتىن جاندى بەينەلەپ، حابارلاۋدا تەرەڭ، مەيىرىلى، بۇقارامەن ەتەنە بولىپ، ءماجىلىستىڭ دەموكراتيالى، ىنتىماقتى، شىندىققا تالپىنعان، ەكپىندەي ىلگەرىلەگەن كەلبەتىن تولىق بەينەلەدى.

جاۋ لىجي مىنالاردى باسا دارىپتەدى: ۇزاق ۋاقىتتان بەرى نەگىزگى اقپارات ورىندارى حالىق قۇرىلتايى ءتۇزىمىن ۇگىتتەۋ ءۇشىن قىرۋار ءونىمدى قىزمەت ىستەدى. كوپشىلىكتىڭ حالىق قۇرىلتايى ءتۇزىمى، حالىق قۇرىلتايى قىزمەتى، حالىق قۇرىلتايى ۋاكىلدەرى سىندى اقپاراتتىڭ ”باي كەنىشىن“ ۇزدىكسىز تەرەڭ قازىپ جانە ودان ويداعىداي پايدالانىپ، مەملەكەتتىڭ ءتۇبىرلى ساياسي ءتۇزىمىنىڭ جۇرت جۇرەگىنە تەرەڭ ۇيالاۋىن بىرگە ىلگەرىلەتىپ، جۇڭگو حيكاياسىن، جالپى بارىستىق حالىق دەموكراتياسى حيكاياسىن بىرگە جاقسى بايانداۋىن ءۇمىت ەتەمىن.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت ۇگىت ءبولىمىنىڭ باستىعى لي شۋلەي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى لي حۇڭجۇڭ قاتارلىلار بىرگە امانداسا باردى.

ورتالىق ۇگىت ءبولىمى، ورتالىق ينتەرنەت حاۋىپسىزدىگى جانە ينفورماتسيالاندىرۋ كەڭسەسى، حالىق گازەتى مەكەمەسى، شينحۋا اگەنتتىگى، ورتالىق راديو - تەلەۆيزيا باس ستانسياسى، ساۋلە گازەتى مەكەمەسى، ەكونوميكا گازەتى مەكەمەسى، جۇڭگو گازەتى مەكەمەسى، جۇڭگو اقپارات اگەنتتىگى، زاڭ - ءتۇزىم گازەتى مەكەمەسى سياقتى ورىندارداعى جاۋاپتى جولداستار مەن ءبىرىنشى شەپتەگى رەداكتورلاردىڭ، تىلشىلەردىڭ ۋاكىلدەرى قيمىلعا قاتىناستى.

كەلۋ قاينارى: حالىق تورابى